হংকঙৰ উচ্চ ন্যায়ালয়ে ৰাষ্ট্ৰীয় নিৰাপত্তা আইনৰ অধীনত চলি থকা বিচাৰত ৪৫ গৰাকী গণতন্ত্ৰপন্থী কৰ্মীক চাৰিৰ পৰা দহ বছৰৰ কাৰাদণ্ডৰ শাস্তি প্ৰদান কৰিছে।
২০২১ চনত মুঠ ৪৭ গৰাকী গণতন্ত্ৰপন্থী কৰ্মীক কূটাঘাতৰ ষড়যন্ত্ৰৰ অভিযোগত গ্ৰেপ্তাৰ কৰা হৈছিল। তেওঁলোকৰ বিৰুদ্ধে বেইজিঙে জাপি দিয়া ৰাষ্ট্ৰীয় নিৰাপত্তা আইন অনুসৰি অভিযোগ উত্থাপন কৰা হৈছিল। ইয়াৰ ভিতৰত প্ৰাক্তন অধিবক্তা বেনি টাইক আন্দোলনৰ ‘সংগঠক’ হিচাপে চিনাক্ত কৰা হৈছিল।
লগতে পঢ়কঃ বিনামূলীয়া ৰেচনৰ হৰলুকি! প্ৰায় ৭০ হাজাৰ কোটি টকাৰ ক্ষতি, দেশজুৰি কেন্দ্ৰীয় প্ৰকল্পত দুৰ্নীতি
পশ্চিম ক’লুন দণ্ডাধীশ আদালতত ১১৮ দিনীয়া বিচাৰৰ অন্তত মে’ মাহত গণতন্ত্ৰপন্থী ১৪ গৰাকী কৰ্মীক দোষী সাব্যস্ত কৰা হৈছিল। ইয়াৰ ভিতৰত আছে অষ্ট্ৰেলিয়াৰ নাগৰিক গৰ্ডন এন জি আৰু আন্দোলন কৰ্মী ৱেন চাও।
বিচাৰৰ সন্মুখীন হোৱা ৪৭ গৰাকী প্ৰতিবাদকাৰীৰ ভিতৰত ৩১ গৰাকীয়েই দোষ স্বীকাৰ কৰিছিল। আৰু বাকী দুগৰাকীক দোষমুক্ত কৰা হয়।
বাতৰি অনুসৰি, শাস্তি লাভ কৰা এই প্ৰতিবাদকাৰীসকলৰ একাংশই চাৰে তিনি বছৰ ধৰি কাৰাবন্দী হৈ আছে। তেওঁলোকৰ বন্দীত্বৰ এই সময়ছোৱা কাৰাদণ্ডৰ সময়সীমাৰ ভিতৰত গণ্য হ’ব নে নহয় সেয়া তাৎক্ষণিকভাৱে স্পষ্ট হোৱা নাই।
লগতে পঢ়কঃ অবৈধ অস্ত্ৰৰ অবাধ ব্যৱহাৰ বন্ধ কৰিবলৈ উচ্চতম ন্যায়ালয়ৰ হস্তক্ষেপ; কৰ্ম পৰিকল্পনা প্ৰস্তুতৰ নিৰ্দেশ
এই ৰায় ঘোষণাৰ পূর্বে পুৱাৰে পৰা আদালত চৌহদত সমবেত হৈছিল শ শ লোক৷ পাতলীয়া বৰষুণত বহুতে হাতত ছাতি লৈ আদালতৰ কোঠাত সোমাবলৈ শাৰী পাতি ৰৈ আছিল। ৰায় ঘোষণা কৰাৰ সময়ত আদালতৰ কক্ষ ভৰি পৰিছিল।
