হংকঙৰ এখন আদালতে গণতন্ত্ৰপন্থী সংবাদ মাধ্যমৰ উদ্যোগী জিমি লাই-ক ২০ বছৰৰ কাৰাদণ্ডৰ শাস্তি প্ৰদান কৰিছে। বিদেশী শক্তিৰ সৈতে ষড়যন্ত্ৰ আৰু উচটনিমূলক প্ৰকাশন সম্পৰ্কীয় গোচৰত দোষী সাব্যস্ত হোৱাৰ পিছত তেওঁক এই শাস্তি প্ৰদান কৰা হৈছে।
সোমবাৰে হংকং উচ্চ ন্যায়ালয়ৰ তিনিজনীয়া এখন বিচাৰপীঠে এই ৰায় দিয়ে। ৭৮ বছৰীয়া জিমি লাই এতিয়া বন্ধ হৈ থকা এপল ডেইলী কাকতৰ প্ৰতিষ্ঠাপক।
পাঁচ বছৰতকৈও অধিক সময় কাৰাগাৰত বন্দী হৈ আছে লাই। ইয়াৰ পূৰ্বে তেওঁক একাধিক গোচৰত বিভিন্ন কাৰাদণ্ডৰ শাস্তি প্ৰদান কৰা হৈছে।
চীনৰ অৰ্ধ স্বায়ত্তশাসিত ভূখণ্ড হংকঙত ৰাষ্ট্ৰীয় নিৰাপত্তাৰ কঠোৰ আইন জাপি দিছে বেইজিঙে। এই আইনৰ অধীনত বিদেশী শক্তিৰ সৈতে ষড়যন্ত্ৰৰ দুটা আৰু উচটনিমূলক প্ৰকাশনৰ এটা গোচৰত যোৱা ডিচেম্বৰ মাহত জিমি লাইক দোষী সাব্যস্ত কৰা হৈছিল।
সেই সময়ত পশ্চিমীয়া চৰকাৰ আৰু মানৱ অধিকাৰ সংগঠনসমূহে জিমি লাইক মুক্তিৰ আহ্বান জনাইছিল। কিছুমানে এই গোচৰটোক “প্ৰহসনৰ বাহিৰে একো নহয়” বুলিও গৰিহণা দিছে।
জিমি লাইৰ পৰিয়াল, অধিবক্তা, সমৰ্থক আৰু প্ৰাক্তন সহকৰ্মীসকলে কয় যে তেওঁ বিভিন্ন স্বাস্থ্যজনিত জটিলতাত ভুগিছে। তেওঁৰ হৃদৰোগ আৰু উচ্চ ৰক্তচাপ আছে। তেওঁলোকে আশংকা কৰে যে তেওঁৰ কাৰাগাৰতে মৃত্যু হ’ব পাৰে।
জিমি লাইৰ লগতে এপল ডেইলীৰ ছয়জন প্ৰাক্তন জ্যেষ্ঠ কৰ্মচাৰী, এজন মানৱ অধিকাৰ কৰ্মী আৰু এজন আইনী সহায়কক সোমবাৰে শাস্তি প্ৰদান কৰা হ’ব।
ব্ৰিটেইনৰ প্ৰধানমন্ত্ৰী কেইৰ ষ্টাৰমাৰে কয় যে যোৱা মাহত বেইজিঙত চীনৰ ৰাষ্ট্ৰপতি ছি জিনপিঙৰ সৈতে হোৱা বৈঠকৰ সময়ত তেওঁ জিমি লাইৰ গোচৰটো উত্থাপন কৰিছিল। ষ্টাৰমাৰে কয় যে তেওঁলোকৰ আলোচনা “সন্মানজনক” আছিল। জিমি লাই ব্ৰিটেইনৰ নাগৰিক।
আমেৰিকাৰ ৰাষ্ট্ৰপতি ড’নাল্ড ট্ৰাম্পেও হংকঙৰ মিডিয়া সম্ৰাটগৰাকীক মুকলি কৰি দিবলৈ আহ্বান জনাইছে।
