মহাৰাষ্ট্ৰৰ থানে জিলাৰ এখন আদিবাসী আৱাসিক বিদ্যালয়ত সংঘটিত এক ভয়ংকৰ ঘটনাই তীব্ৰ চাঞ্চল্যৰ সৃষ্টি কৰিছে। বিদ্যালয়খনৰ ২২গৰাকী ছাত্ৰীৰ শ্লীলতা হানি কৰাৰ অভিযোগ উঠিছে এজন কৰ্মচাৰীৰ বিৰুদ্ধে। ইতিমধ্যে আৰক্ষীয়ে অভিযোগৰ ভিত্তিত গণপত গাৱালী নামৰ লোকজনক গ্ৰেপ্তাৰ কৰিছে। অভিযুক্তজনক জেৰা কৰাৰ লগতে ঘটনাৰ সম্পূৰ্ণ তদন্ত আৰম্ভ কৰিছে আৰক্ষীয়ে।
সৰ্বভাৰতীয় সংবাদ মাধ্যমত প্ৰকাশ পোৱা তথ্য অনুসৰি, যোৱা বুধবাৰে বিদ্যালয়খনৰ দশম শ্ৰেণীৰ এগৰাকী ছাত্ৰীয়ে স্থানীয় আৰক্ষী থানাত গণপত গাৱালীৰ বিৰুদ্ধে অভিযোগ দাখিল কৰে। অভিযোগ অনুসৰি, ছাত্ৰীগৰাকীক অকলশৰীয়া অৱস্থাত পাই অভিযুক্তজনে তেওঁৰ শ্লীলতা হানি কৰাৰ লগতে অসৎ প্ৰস্তাৱো আগবঢ়াইছিল। অভিযোগ লাভ কৰাৰ পাছতে আৰক্ষীয়ে ঘটনাটোৰ তদন্ত আৰম্ভ কৰে আৰু বিদ্যালয়খনত উপস্থিত হৈ ছাত্ৰ-ছাত্ৰীসকলৰ সৈতে কথা পাতে।
তদন্তৰ সময়তে আৰক্ষীৰ সন্মুখত পোহৰলৈ আহে অধিক ভয়ংকৰ তথ্য। অভিযোগ কৰা প্ৰথমগৰাকী ছাত্ৰীৰ উপৰি বিদ্যালয়খনৰ আৰু ২১গৰাকী ছাত্ৰীয়েও গণপত গাৱালীৰ বিৰুদ্ধে একেধৰণৰ অভিযোগ উত্থাপন কৰে। তেওঁলোকেও অভিযুক্তজনৰ বিৰুদ্ধে শ্লীলতা হানিৰ অভিযোগ দাখিল কৰে। ইয়াৰ পাছতেই আৰক্ষীয়ে গণপতক গ্ৰেপ্তাৰ কৰি শিশু যৌন অপৰাধৰ পৰা সুৰক্ষা আইন, অৰ্থাৎ পকচো আইনৰ অধীনত গোচৰ ৰুজু কৰে।
জানিব পৰা মতে, ঘটনাস্থলীৰ বিদ্যালয়খন এখন চৰকাৰী আৱাসিক বিদ্যালয় আৰু অভিযুক্ত গণপত তাত ৰান্ধনীৰ কামত নিয়োজিত আছিল। সেয়ে চৰকাৰী প্ৰতিষ্ঠান এখনত এনে গুৰুতৰ ঘটনা কেনেকৈ সংঘটিত হ’বলৈ পালে, সেই প্ৰশ্নও এতিয়া উত্থাপিত হৈছে। একে সময়তে অভিযুক্তজনক বিদ্যালয়খনত কেনেকৈ নিযুক্তি দিয়া হৈছিল আৰু তেওঁৰ পটভূমি সম্পৰ্কে কিবা পৰীক্ষা কৰা হৈছিল নে নাই, সেয়াও তদন্তৰ আওতালৈ অনা হৈছে। বিদ্যালয় কৰ্তৃপক্ষৰ ভূমিকাও আৰক্ষীয়ে পৰীক্ষা কৰি আছে।
আৰক্ষীৰ তদন্তত আন এক গুৰুতৰ তথ্যও পোহৰলৈ আহিছে। প্ৰায় দুবছৰ পূৰ্বে অন্য এখন বিদ্যালয়ত কৰ্মৰত থকাৰ সময়তো গণপত গাৱালীৰ বিৰুদ্ধে একেধৰণৰ অভিযোগ উঠিছিল বুলি জানিব পৰা গৈছে। সেই গোচৰত তেওঁ কিছুদিন কাৰাবাসতো আছিল আৰু শেহতীয়াকৈ জামিনত মুকলি হৈছিল। এনে পটভূমি থকা এজন লোকক পুনৰ ছাত্ৰ-ছাত্ৰীৰ সৈতে জড়িত বিদ্যালয়ত কাম কৰাৰ সুযোগ কিয় দিয়া হ’ল, এতিয়া সেই প্ৰশ্নই সমগ্ৰ ঘটনাক অধিক গুৰুতৰ কৰি তুলিছে। ঘটনাটোৱে বিদ্যালয়সমূহত শিশু সুৰক্ষা আৰু কৰ্মচাৰী নিযুক্তিৰ ক্ষেত্ৰত পৰ্যাপ্ত সাৱধানতা অৱলম্বন কৰা হৈছে নে নাই, সেই বিষয়েও নতুনকৈ প্ৰশ্ন তুলিছে।
