ৰাজ্য চৰকাৰে বাৰম্বাৰ প্ৰতিশ্ৰুতি দি অহাৰ পিছতো ৰাজ্যৰ কাগজ কল দুটা পুনৰুজ্জীৱিত কৰাৰ ক্ষেত্ৰত কোনোধৰণৰ কাৰ্যকৰী পদক্ষেপ গ্ৰহণ নকৰাৰ প্ৰতিবাদত আৰু কাগজ কল দুটা সক্ৰিয় কৰাৰ দাবীত অহা ২২ নৱেম্বৰত এইচ পি চি পেপাৰ মিলছ ৰিভাইভেল একশ্যন কমিটীয়ে ১২ ঘণ্টীয়া বৰাক বন্ধৰ আহ্বান জনাইছে।
১১ ছেপ্তেম্বৰত শিলচৰত শিক্ষাবিদ ড০ সৌৰিন্দ্র কুমাৰ ভট্টাচাৰ্যৰ সভাপতিত্বত পেপাৰ মিলছ ৰিভাইভেল একশ্যন কমিটীয়ে আয়োজন কৰা এখন নাগৰিক সভাত এই কথা সদৰী কৰাৰ লগতে সেই দিনা জৰ উপৰি ৰে’ল ৰোকো কাৰ্যসূচীও ৰূপীয়ণ কৰা হ’ব বুলি জানিবলৈ দিয়ে। প্রতি বৰাকৰ কেইবাটাও শীৰ্ষ দল-সংগঠনে সমর্থন জনাইছে।
সভাৰ আৰম্ভণিতে একশ্যন কমিটীৰ মুখ্য আহ্বায়ক মানবেন্দ্ৰ চক্রৱর্তীয়ে কিছুদিনৰ আগতে কেন্দ্ৰীয় চৰকাৰে মধ্যপ্ৰদেশৰ নেপা কাগজ কল পুনৰুজ্জীৱিত কৰিবলৈ ৪৬৯ কোটি টকা অনুমোদন জনোৱাৰ কথা উল্লেখ কৰি ইয়াৰ বিপৰীতে অসমৰ কাগজ কল পুনৰুজ্জীৱিত কৰিবলৈ এতিয়ালৈকে কোনো ধৰণৰ সিদ্ধান্ত গ্ৰহণ নকৰি ৰাজহুৱাখণ্ডৰ উদ্যোগ দুটা চৰকাৰে চিৰদিনৰ বাবে বন্ধ কৰাৰ চক্ৰান্ত কৰিছে বুলি মন্তব্য কৰে।
আনহাতে উক্ত সভাতে সৰ্বভাৰতী মহিলা কংগ্ৰেছৰ সভানেত্ৰী, শিলচৰৰ সাংসদ সুস্মিতা দেবে পাঁচগ্রাম আৰু জাগীৰোডৰ কাগজ কল দুটা ৰুগ্ন কৰি ৰখাৰ আঁৰত কেন্দ্ৰীয় চৰকাৰৰ চক্ৰান্ত আছে বুলি উল্লেখ কৰি কাগজ কল দুটাক চৰকাৰে ব্যক্তিগতখণ্ডক গতাই দিব পাৰে বুলি সন্দেহ কৰি কয় যে ৰাইজ এইক্ষেত্ৰত সজাগ হৈ থকাৰ প্রয়োজন।
দেওবাৰে অনুষ্ঠিত উক্ত নাগৰিক সভাত চি পি আই (এম),কংগ্ৰেছ, বৰাক উপত্যকা বংগ সাহিত্য আৰু সংস্কৃতি সন্মেলন, আকছা, চি পি আই এম এল, যানবাহন মালিক সন্থা, ট্ৰাক মালিক সন্থাকে ধৰি কেইবাটাও দল-সংগঠনৰ প্ৰতিনিধি উপস্থিত খাকি বন্ধৰ প্ৰতি সমৰ্থন আগবঢ়াই ভাষণ প্ৰদান কৰে।