কাছাৰ কাগজ কল আৰু নগাওঁ কাগজ কলক পুনৰুজ্জীৱিত কৰি তুলিবলৈ বাৰম্বাৰ অনুৰোধ, দাবী-প্ৰতিবাদ ইত্যাদিয়েও গা লৰাব পৰা নাই কেন্দ্ৰীয় চৰকাৰৰ। ফলত অন্ধকাৰ ভৱিষ্যতৰ পিনে ঠেলি দিয়া শ শ কৰ্মচাৰীৰ স্বাৰ্থৰ প্ৰতি লক্ষ্য ৰাখি এইচ্ছ পি চি পেপাৰ মিলছ ৰিভাইভেল একশ্যন কমিটীয়ে আন্দোলনৰ পথ ল’বলৈ বাধ্য হৈছে। কমিটীয়ে যোৱা ২৬ ছেপ্টেম্বৰত ৬ নং আৰু ৩৭ নং ৰাষ্ট্ৰীয় ঘাইপথ অৱৰোধ কৰে যদিও তাৰ পিছতো কোনো সঁহাৰি নাপালে কেন্দ্ৰীয় চৰকাৰৰ পৰা।
এই কাৰণতে কাগজ কল দুটা পুনৰুজ্জীৱিত কৰাৰ দাবীত পুনৰ আন্দোলনৰ পথ ল’বলৈ বাধ্য হৈছে একশ্যন কমিটী।
২৬টাতকৈও অধিক সংগঠনৰ দ্বাৰা গঠিত একশ্যন কমিটীয়ে ২৩ অক্টোবৰত এখন সংবাদ মেলত জনোৱামতে, তেওঁলোকে অহা ২২ নৱেম্বৰত এই দাবীত বৰাক উপত্যকা বন্ধৰ আহ্বান জনাব।
একশ্যন কমিটীৰ মুখ্য আহ্বায়ক মানবেন্দ্ৰ চক্ৰৱৰ্তীয়ে কয় যে উক্ত দিনা বৰাক বন্ধৰ লগতে ৰে’ল ৰোকো কাৰ্য্যসূচী ল’ব।
চক্ৰৱৰ্তীয়ে কয়, “যোৱা ৩ অক্টোবৰত মধ্য প্ৰদেশত থকা নেপা পেপাৰ মিল পুনৰুজ্জীৱিত কৰাৰ বাবে কেন্দ্ৰই ৪৬৯ কোটি টকাৰ পেকেইজত অনুমোদন দিছে। কিন্তু অসমত আমাৰ সমস্যা সমাধানৰ বাবে না ৰাজ্য চৰকাৰ না কেন্দ্ৰীয় চৰকাৰে গুৰুত্ব দিছে। কেন্দ্ৰীয় চৰকাৰৰ এই বৈষম্যমূলক আচৰণ আৰু অসম চৰকাৰৰ নিস্পৃহতাই আমাক পুনৰ আন্দোলনৰ পথ ল’বলৈ বাধ্য কৰিলে।”
তেওঁ লগতে কয়, “আমি আমাৰ আগন্তুক প্ৰতিবাদী কাৰ্য্যসূচী সন্দৰ্ভত বৰাকৰ তিনিওখন জিলা কাছাৰ, কৰিমগঞ্জ আৰু হাইলাকান্দিৰ উপায়ুক্তকেইজনক লিখিতভাৱে জনাইছো।”
উল্লেখযোগ্য যে ২০১৭ চনৰ ১৩ মাৰ্চৰ পৰা নগাওঁ কাগজকলৰ উৎপাদন বন্ধ হৈ থকাৰ বিপৰীতে ২০১৫ চনৰ অক্টোবৰৰ পৰা কাছাৰ কাগজকল বন্ধ হৈ আছে। ফলত ইয়াত কৰ্মৰত শ শ কৰ্মচাৰীৰ পৰিয়ালত হাহাকাৰ অৱস্থাৰ সৃষ্টি হৈছে।
কেন্দ্ৰ আৰু ৰাজ্য চৰকাৰে কেইবাবাৰো প্ৰতিশ্ৰুতি দিও কাগজকল দুটা পুনৰুজ্জীৱিত কৰাৰ বাবে কোনো কাৰ্য্যকৰী ব্যৱস্থা লোৱা নাই।
