কেন্দ্ৰীয় তদন্তকাৰী সংস্থা চমুকৈ চি বি আয়ে পুডুচেৰীৰ এজন ব্যৱসায়ীক চি বি আইৰ তদন্তৰ পৰা সকাহ দিয়াৰ প্ৰতিশ্ৰুতি দি ৩ কোটি টকাৰ উৎকোচ দাবী কৰাৰ অভিযোগত ভাৰতীয় আৰক্ষী সেৱাৰ (আই পি এছ) বিষয়া দীপক গেহলৱাটক গ্ৰেপ্তাৰ কৰিছে। ২০১২ বৰ্ষৰ হাৰিয়ানা কেডাৰৰ এইগৰাকী বিষয়াই বৰ্তমান দিল্লীত অসামৰিক বিমান পৰিবহণ সুৰক্ষা ব্যুৰোত (বি চি এ এছ) কৰ্মৰত হৈ আছিল। তেওঁক গ্ৰেপ্তাৰ কৰাৰ পিছতে সংস্থাটোৱে তেওঁৰ সৈতে জড়িত কেইবাখনো স্থানত তন্ন তন্নকৈ তালাচী চলাই বহুতো ডিজিটেল সামগ্ৰী, হাৰ্ড ডিস্ক আৰু গুৰুত্বপূৰ্ণ নথি–পত্ৰ জব্দ কৰিছে।
এই একেটা গোচৰতে যোৱা মাহত চি বি আয়ে দিল্লী আৰক্ষীৰ অপৰাধ শাখাৰ পৰিদৰ্শক প্ৰদীপ সিং আৰু ৰাজকুমাৰ নামৰ আন এজন ব্যক্তিক উৎকোচৰ ধন আদান–প্ৰদান কৰাত সহায় কৰাৰ অভিযোগত গ্ৰেপ্তাৰ কৰিছিল। সংস্থাটোৱে তেওঁলোকৰ পৰা ২৪.৭০ লাখ টকাও জব্দ কৰিছিল। প্ৰথম তথ্য প্ৰতিবেদন চমুকৈ এজাহাৰত চি বি আয়ে উল্লেখ কৰিছে যে এন. ৰাজা নামৰ ব্যৱসায়ীজন, তেওঁৰ সহযোগী ৰাজকুমাৰ আৰু আন কেইজনমানৰ সৈতে লগ লাগি প্ৰদীপ সিঙে চি বি আইৰ গোচৰৰ পৰা ৰেহাই পাবলৈ অবৈধভাৱে ধনৰ লেনদেন কৰিছিল।
পুডুচেৰী চৰকাৰৰ নিৰ্দেশত চি বি আয়ে ৰুজু কৰা নকল ঔষধ প্ৰস্তুত কৰা এক গোচৰত অভিযুক্ত হৈছিল এন. ৰাজা। ৰাজকুমাৰে এই ব্যৱসায়ীজন আৰু আৰক্ষী পৰিদৰ্শকজনৰ মাজত মধ্যভোগী হিচাপে কাম কৰিছিল। ২০২৬ চনৰ ১৪ মে‘ তাৰিখে দুয়ো দিল্লীৰ আই জি আই বিমানবন্দৰৰ সমীপৰ এৰ‘চিটিত পৰিদৰ্শকজনক লগ কৰিছিল। চি বি আইৰ সন্দেহ অনুসৰি, পৰিদৰ্শকগৰাকীয়ে তেওঁলোকক ওচৰতে থকা গেহলৱাটৰ কাৰ্যালয়লৈ লৈ গৈছিল। এজাহাৰত কোৱা হৈছে যে সেই সাক্ষাতৰ সময়তে আই পি এছ বিষয়াগৰাকীয়ে ব্যৱসায়ী ৰাজাক চি বি আইৰ ভিতৰত থকা তেওঁৰ প্ৰভাৱ খটুৱাই গোচৰৰ পৰা সকাহ দিয়াৰ আশ্বাস দিছিল।
ইয়াৰ দুদিন পিছত ব্যৱসায়ী ৰাজাই তেওঁৰ পত্নীক জনাইছিল যে বিষয়াগৰাকীয়ে চি বি আইৰ গোচৰত সহায় কৰাৰ বিনিময়ত ৩ কোটি টকা বিচাৰিছে আৰু ইয়াৰ আধা ধন আগতীয়াকৈ দাবী কৰিছে। চি বি আয়ে জনোৱা মতে, দিল্লীলৈ ১ কোটি টকা পঠিয়াবলৈ ব্যৱসায়ীজনে চেন্নাইৰ এজন হাৱালা ব্যৱসায়ীৰ সৈতে যোগাযোগ কৰিছিল। যোৱা ৮ জুনত দিল্লীৰ চান্দনী চ‘কত পৰিদৰ্শকগৰাকীক এই ধন হস্তান্তৰ কৰাৰ কথা আছিল। এই সকলোবোৰ তথ্যৰ ভিত্তিত সংস্থাটোৱে দুজন অভিযুক্তক গ্ৰেপ্তাৰ কৰাৰ লগতে এই সমগ্ৰ ষড়যন্ত্ৰত আই পি এছ বিষয়া দীপক গেহলৱাটৰ ভূমিকা সন্দৰ্ভত তদন্ত আৰম্ভ কৰিছিল আৰু অৱশেষত তেওঁকো গ্ৰেপ্তাৰ কৰে।
