সমগ্ৰ দেশৰ লগতে অসমতো ক’ৰ’না ভাইৰাছৰ দ্ৰুত সংক্ৰমণ অব্যাহত থকাৰ সময়তে একাংশই ৰাজ্যৰ ক’লা বজাৰত সুৰাৰ ৰমৰমীয়া বেহা অব্যাহত ৰাখিছে।
চতুৰ্থ পৰ্যায়ৰ ল’কডাউনৰ সামৰণিৰ পাছত কেন্দ্ৰ চৰকাৰে আনল’ক-১.০ ঘোষণা কৰি কিছু নীতি-নিৰ্দেশনা শিথিল কৰি দিয়াৰ পাছতে সুৰাৰ ৰমৰমীয়া বেহাই পুনৰ গা কৰি উঠিছে।
আজি বঙাইগাঁও জিলাৰ মাণিকপুৰ আৰক্ষী থানাৰ কৰ্তব্যৰত আৰক্ষীয়ে নিয়মীয়া তালাচীৰ সময়ত ৩১ নং ৰাষ্ট্ৰীয় ঘাইপথত এখন অৰুণাচলী সুৰা ভৰ্তি ট্ৰাক জব্দ কৰে।
আৰক্ষীয়ে ডব্লিউ বি-২৩ চি-২১৩৭ নম্বৰৰ ট্ৰাকখনৰ লগতে ৮০০ কাৰ্টুন সুৰা জব্দ কৰে।
জানিব পৰা মতে, অৰুণাচল প্ৰদেশৰ ভালুকপুঙৰ পৰা ধুবুৰী অভিমুখে ট্ৰাকখন গৈ আছিল।
ট্ৰাক চালকক আৰক্ষীয়ে আটক কৰি সোধপোচ অভ্যাহত ৰাখিছে । ট্ৰাকখনত থকা সুৰাখিনিৰ আনুমানিক বজাৰ মূল্য ৩০ লাখৰো অধিক হ’ব বুলি ধাৰণা কৰা হৈছে।