বৰপেটা জিলাৰ সৰ্থেবাৰী থানাৰ অন্তৰ্গত ১২ নং পূৱ সৰুক্ষেত্ৰী গাঁও পঞ্চায়তত সংঘটিত হৈছে ভয়ানক দুৰ্নীতি। বিজেপিৰ দখলত থকা পঞ্চায়তখনত প্ৰধান মন্ত্ৰী কৃষক সন্মান নিধি আঁচনিৰ ধন বিতৰণত ভয়ানক দুৰ্নীতি সংঘটিত হোৱাৰ অভিযোগ উত্থাপিত হৈছে।
গাঁও পঞ্চায়তৰ তত্ত্বাৱধানত প্ৰস্তুত কৰা তালিকাখনত প্ৰকৃত কৃষকৰ পৰিৱৰ্তে নাম আহিছে কৃষি কাৰ্যৰ লগত জড়িত নথকা বিজেপি কৰ্মী, ব্যৱসায় তথা ছাত্ৰ ছাত্ৰীৰ।
ইয়াৰ ভিতৰত অন্যতম পঞ্চায়তৰ সভাপতি ৰাতুল বৰ্মনৰ ঘনিষ্ঠ তথা বিজেপিৰ IT Cellৰ কৰ্মী দীপজ্যোতি লহকৰ।
উল্লেখ্য যে, দীপজ্যোতি লহকৰৰ মাতৃৰ নামো কৃষকৰ হিতাধিকাৰীৰ এই তালিকাত সন্নিৱিষ্ট হৈছে। দ্বীপজ্যোতিৰ পিতৃ এজন অৱসৰপ্ৰাপ্ত চৰকাৰী কৰ্মচাৰী।
আনহাতে এই ধনৰ বাবে যোগ্য হিচাপে বিবেচিত হৈছে পঞ্চায়তৰ সভাপতি ৰাতুন বৰ্মনৰ পত্নীও। https://pmkisan.gov.in নামৰ ৱেবছাইতত প্ৰকাশ পোৱা তথ্য অনুসৰি ইতিমধ্যে ৰাতুল বৰ্মনৰ পত্নীৰ বেংক একাউণ্টত ৫ টা কিস্তিৰ ধন জমা হৈছে।
বিজেপি দল আৰু পঞ্চায়তৰ সভাপতিৰ লগত ঘনিষ্ঠ হোৱা বাবে তালিকাত নাম আহিছে একেটা পৰিয়ালৰ কেইবাজনো সদস্যৰ নাম।
পঞ্চায়ত খনৰ অন্তৰ্গত ক্ষুদ্ৰ আমৃখোৱা, ন-কুছি আৰু চিনাদি আদিৰ দৰে ১০০% হিন্দু বসতিপূৰ্ণ গাঁৱৰ তালিকাত নাম আহিল একাধিক মুছলমানৰ। ইয়াৰ উপৰি এজন মানুহৰ নাম দুই তিনিবাৰলৈ তালিকাত অন্তৰ্ভুক্ত হৈছে।
ইয়াৰ পৰা এটা কথা অনুমান কৰিব পাৰি যে বিজেপি দলৰ একাংশ পঞ্চায়ত প্ৰতিনিধিয়ে হিন্দু বসতিপূৰ্ণ গাঁৱত একাংশ ভুৱা মুছলমানৰ নাম তালিকাত অন্তৰ্ভুক্ত কৰি কৃষকৰ ধন আত্মস্যাৎ কৰাত নামি পৰিছে।
উল্লেযোগ্য যে পঞ্চায়তখনৰ সভাপিত ৰাতুল বৰ্মন আৰু কাউঞ্চিলাৰ দুয়োজনে বিজেপিৰ নেতা। মুঠ ১০ টা ৱাৰ্ড থকা পঞ্চায়তখনৰ ৮ জন ৱাৰ্ড সদস্য হৈছে বিজেপি দলৰ।
