শাসকীয় বিজেপি চৰকাৰৰ ভুৱা প্ৰতিশ্ৰুতিৰ বিৰুদ্ধে আজি মৰিগাঁও সদৰৰ বিহুতলীত বিৰোধী দল কংগ্ৰেছে অনুষ্ঠিত কৰে এক বিশাল গণ সমাৱেশ।
সমাৱেশখনত মুখ্য অতিথিৰূপে উপস্থিত থকা নিখিল ভাৰত কংগ্ৰেছৰ সাধাৰণ সম্পাদক জীতেন্দ্ৰ সিঙে কয় যে ২০২১ৰ আগন্তুক বিধান সভাৰ নিৰ্বাচন অসমৰ অস্তিত্ব ৰক্ষাৰ নিৰ্বাচন হ’ব।অসমীয়া ভাষা-সংস্কৃতিৰ যুদ্ধ হ’ব ২০২১ৰ নিৰ্বাচনত।
বিজেপি বিৰোধী দলসমূহ একত্ৰিত হৈ মহাজোঁট গঠনেৰে বিজেপি চৰকাৰক ওফৰাব লাগিব বুলিও সাধাৰণ সম্পাদক জীতেন্দ্ৰ সিঙে কয়।
একেদৰে প্ৰদেশ কংগ্ৰেছৰ সভাপতি ৰিপুন বৰাই বিজেপি দলৰ লগতে কঠোৰ সমালোচনা কৰে প্ৰধানমন্ত্ৰী নৰেন্দ্ৰ মোদী, কেন্দ্ৰীয় গৃহমন্ত্ৰী অমৃত শ্বাহ আৰু অসম চৰকাৰৰ মন্ত্ৰীহিমন্ত বিশ্ব শৰ্মাক।
ইফালে কৃষক নেতা অখিল গগৈৰ লগত গোপন আলোচনাৰ কথা ৰাজহুৱা নকৰিলে ৰিপুন বৰাই। মধ্য অসমত তিৱা স্বায়ত্ত পৰিষদৰ নিৰ্বাচনৰ প্ৰভাৱ বিধান সভা নিৰ্বাচনত নপৰে বুলিও দাবী কৰি অসম প্ৰদেশ কংগ্ৰেছৰ সভাপতিগৰাকীয়ে।
যি দলৰ চৰকাৰ থাকে সেই দলৰে নিকাই পৰিষদ গঠন হোৱাতো সাধাৰণ কথা বুলি মন্তব্য কৰে সভাপতি বৰাই।
কিন্তু বিজেপিৰ ১০০+ প্ৰসংগ উল্লেখ কৰি বৰাই কয় ১০০+ নহয় এইবাৰ বিজেপি হ’ব হাণ্ড্ৰেড মাইনাছ। অসমত এইবাৰ কংগ্ৰেছৰ নেতৃত্বত মহাজোঁটৰ চৰকাৰ হ’ব বুলিও প্ৰদেশ কংগ্ৰেছৰ সভাপতিগৰাকীয়ে দাবী কৰে।
সমাৱেশত নগাঁও লোকসভা সমষ্টিৰ সাংসদ প্ৰদ্যুৎ বৰদলৈয়ে বিজেপি চৰকাৰৰ আঁচনিৰ টোপ, চেণ্ডিকেটৰাজ আৰু ভেটি ৰক্ষাৰ আশ্বাস দি কংগ্ৰেছ চৰকাৰৰ দিনত হোৱা ৰাজহুৱা সম্পত্তি, ভেটি সকলো বিক্ৰী কৰা দল বুলি কঠোৰ ভাষাৰে সমালোচনা কৰে।
উল্লেখ্য যে আজি মৰিগাঁৱৰ বিহুতলীত বিজেপিৰ ভুৱা প্ৰতিশ্ৰুতিৰ বিৰুদ্ধে গণ সমাৱেশেৰে বিৰোধী দল কংগ্ৰেছে আগন্তুক নিৰ্বাচনৰ ৰণশিঙা বজোৱা সমাৱেশখনত নিখিল ভাৰত কংগ্ৰেছৰ সাধাৰণ সম্পাদক জীতেন্দ্ৰ সিঙৰ উপৰিও সাংসদ প্ৰদ্যুৎ বৰদলৈ, প্ৰদেশ কংগ্ৰেছৰ সভাপতি ৰিপুণ বৰা, সাধাৰণ সম্পাদক ইমদাদ হুছেইন, লাহৰীঘাট সমষ্টিৰ বিধায়ক ডা: নজৰুল ইছলাম, মৰিগাঁও সমষ্টিৰ প্ৰাক্তন বিধায়িকা জোন জোনালী বৰুৱা, জিলা সভাপতি বীৰ কুমাৰ কোঁৱৰকে ধৰি কেইবাগৰাকীও কংগ্ৰেছৰ নেতা উপস্থিত থাকে।
উল্লেখ্য যে সমাৱেশখনত মৰিগাঁও, লাহৰীঘাট আৰু জাগীৰোড বিধান সভা সমষ্টি তিনিটাৰ পাঁচ সহস্ৰাধিক কংগ্ৰেছ কৰ্মীয়ে অংশগ্ৰহণ কৰে।