সোমবাৰে পূব ফ্ৰান্সৰ এজন জাৰ্মান নাগৰিকৰ পত্নীক তেওঁৰ শোৱা কোঠাৰ পৰা উদ্ধাৰ কৰা হৈছে। অভিযোগ অনুসৰি, জাৰ্মান লোকজনে যোৱা ১২ বছৰ ধৰি পত্নীক শোৱা কোঠাতে বন্দী কৰি ৰাখিছিল।
গৃহবন্দী কৰি পত্নীক বাৰে বাৰে ধৰ্ষণ কৰাৰ উপৰিও অত্যাচাৰ অব্যাহত ৰাখিছিল ব্যক্তিগৰাকীয়ে। সোমবাৰে সংবাদ মাধ্যমৰ আগত আৰক্ষীয়ে কয় যে অভিযুক্তক গ্ৰেপ্তাৰ কৰা হৈছে।
আৰক্ষী সূত্ৰৰ মতে, জাৰ্মান আৰক্ষীৰ পৰা তথ্য লাভ কৰি তেওঁলোকে পূব ফ্ৰান্সৰ ফৰবাক অঞ্চলৰ এটা এপাৰ্টমেণ্টত অভিযান চলায়। আৰক্ষী বিষয়াসকলে শোৱা কোঠাত উলংগ হৈ পৰি থকা এগৰাকী ৫৩ বছৰীয়া জাৰ্মান মহিলাক উদ্ধাৰ কৰে। ইয়াৰ পিছতে মহিলাগৰাকীৰ স্বামীক গ্ৰেপ্তাৰ কৰা হয়।
ফ্ৰান্সৰ সংবাদ মাধ্যম “বিএফএমটিভি”ক আৰক্ষীয়ে জনোৱা মতে, জাৰ্মানীৰ সীমান্তৱৰ্তী অঞ্চলৰ দম্পতীহালৰ শোৱা কোঠাৰ খিৰিকীবোৰ কাঁইটীয়া তাঁৰেৰে আগুৰি আছে। বন্দী অৱস্থাত মহিলাগৰাকীয়ে কেনেবাকৈ নিজৰ মোবাইলত জাৰ্মান আৰক্ষীৰ সৈতে যোগাযোগ কৰিবলৈ সক্ষম হয়।
জাৰ্মান প্ৰশাসনৰ পৰা এই খবৰ পোৱাৰ পিছত ফ্ৰান্সৰ আৰক্ষীয়ে অভিযান আৰম্ভ কৰে। অভিযুক্তই পত্নীক অপহৰণ কৰি ধৰ্ষণ কৰাৰ লগতে নৃশংসভাৱে অত্যাচাৰ কৰাৰ অভিযোগ উত্থাপন হৈছে।
