হায়দৰাবাদৰ এখন আদালতে জনপ্ৰিয় তেলেগু অভিনেতা আল্লু অৰ্জুন আৰু আন অভিযুক্তসকলক অহা ২২ জুনত ব্যক্তিগতভাৱে আদালতত হাজিৰ হোৱাৰ নিৰ্দেশ দিছে। ২০২৪ বৰ্ষৰ ৪ ডিচেম্বৰত হায়দৰাবাদৰ সন্ধিয়া থিয়েটাৰত ‘পুষ্পা ২’ ছবিখনৰ প্ৰথম প্ৰদৰ্শনীৰ সময়ত সংঘটিত হোৱা এক ভয়ংকৰ পদপিষ্টৰ ঘটনাত এগৰাকী মহিলাৰ মৃত্যু হোৱাৰ গোচৰ সন্দৰ্ভত এই চমন জাৰি কৰা হৈছে।
ছবিখনৰ প্ৰদৰ্শনীৰ দিনা প্ৰিয় অভিনেতাজনক এবাৰ ওচৰৰ পৰা চোৱাৰ হেঁপাহতে অনুৰাগীসকলৰ মাজত এই পদপিষ্টৰ ঘটনা সংঘটিত হৈছিল। এই দুৰ্ঘটনাত ৩৫ বছৰীয়া এগৰাকী মহিলাৰ মৃত্যু হোৱাৰ লগতে তেওঁৰ আঠ বছৰীয়া পুত্ৰ আহত হৈছিল। ইয়াৰ পিছতে ২৪ ডিচেম্বৰত হায়দৰাবাদ আৰক্ষীয়ে আদালতত এই ঘটনা সন্দৰ্ভত ২৩ জন লোকৰ বিৰুদ্ধে চাৰ্জশ্বীট দাখিল কৰে। এই চাৰ্জশ্বীটত থিয়েটাৰখনৰ মালিক, অংশীদাৰ, মেনেজাৰ, ল’ৱাৰ-বেলকনি ইনচাৰ্জ আৰু গেটকীপাৰকে ধৰি ১০ জন লোকক ১ ৰ পৰা ১০ নম্বৰ অভিযুক্ত হিচাপে আৰু অভিনেতা আল্লু অৰ্জুনক ১১ নম্বৰ অভিযুক্ত হিচাপে নামাংকিত কৰা হৈছে। এই চাৰ্জশ্বীটৰ ভিত্তিতেই এতিয়া সকলো অভিযুক্তক আদালতত হাজিৰ হ’বলৈ নিৰ্দেশ দিয়া হৈছে।
মৃত মহিলাগৰাকীৰ পৰিয়ালে দাখিল কৰা অভিযোগৰ ভিত্তিত চিকাডপল্লী আৰক্ষী থানাত আল্লু অৰ্জুন, তেওঁৰ নিৰাপত্তাৰক্ষী আৰু থিয়েটাৰ কৰ্তৃপক্ষৰ বিৰুদ্ধে ভাৰতীয় ন্যায় সংহিতাৰ বিভিন্ন ধাৰাৰ অধীনত গোচৰ ৰুজু কৰা হৈছিল। এই গোচৰৰ ভিত্তিত ২০২৪ চনৰ ১৩ ডিচেম্বৰত আল্লু অৰ্জুনক গ্ৰেপ্তাৰ কৰা হৈছিল যদিও পিছদিনাই তেলেংগানা উচ্চ ন্যায়ালয়ে তেওঁক অন্তৱৰ্তীকালীন জামিন প্ৰদান কৰে আৰু পৰৱৰ্তী সময়ত তেওঁ নিয়মীয়া জামিন লাভ কৰে। দুৰ্ঘটনাৰ পিছত আল্লু অৰ্জুন, পুষ্পা ২ ছবিখনৰ নিৰ্মাতা আৰু লগতে তেলেংগানা চৰকাৰে ভুক্তভোগী ল’ৰাজনৰ পৰিয়ালটোলৈ আৰ্থিক সাহায্য আগবঢ়াইছিল।
