উত্তৰ প্ৰদেশৰ বাৰেলীৰ ছাবা নামৰ এগৰাকী মুছলমান যুৱতীয়ে হিন্দু যুৱকৰ লগত বিাবাহপাশত আৱদ্ধ হোৱা ঘটনাক লৈ এতিয়া চৰ্চাত নামি পৰিছে উত্তৰ প্ৰদেশৰ সংবাদ মাধ্যম তথা সামাজিক মাধ্যম ব্যৱহাৰকাৰীসক। ইছলাম ধৰ্মৰ পৰা হিন্দু ধৰ্মলৈ নিজকে ধৰ্মান্তৰিত কৰি এগৰাকী হিন্দু যুৱকৰ সৈতে বিবাহত আৱদ্ধ হৈছে যুৱতীগৰাকীয়ে।
হিন্দু ধৰ্ম গ্ৰহণ কৰাৰ পিছত ছাবাই নিজৰ নাম সলনি কৰিছে। ছাবাই নিজৰ নতু্ন নাম ৰাখিছে ছ’নী।
ধৰ্মান্তৰিত হোৱাৰ পিছতেই যোৱা ৩ ফেব্ৰুৱাৰী, শুকুৰবাৰে হিন্দু ধৰ্মৰ নিয়ম অনুসৰি বাৰেলীৰ অগস্ত্য মুনি আশ্ৰমত হিন্দু প্ৰেমিক অংকুৰ দেৱালৰ লগত বিয়াত বহিছে ছাবাই।
উল্লেখ্য যে যোৱা ১ ফেব্ৰুৱাৰী তাৰিখে ছাবাৰ পিতৃয়ে ছাবাৰ প্ৰেমিক অংকুৰ দেৱাল আৰু তেওঁৰ পৰিয়ালৰ বিৰুদ্ধে অপহৰণৰ গোচৰ ৰুজু কৰিছিল। এই গোচৰত পিতৃয়ে ছাবাৰ বয়স ১৬ বছৰ বুলি উল্লেখ কৰিছে। অংকুৰ আৰু অংকুৰৰ পৰিয়ালে তেওঁৰ ‘নাবালিকা’ কন্যাক অপহৰণ কৰাৰ লগতে প্ৰলোভিত কৰি হিন্দু ধৰ্মলৈ ধৰ্মান্তৰিত কৰি বিয়া কৰাইছে বুলি অভিযোগ উত্থাপন কৰিছে।
কিন্তু ছাবাৰ মতে ছাবাৰ বয়স ২১ বছৰ। ছাবাই নিজকে এগৰাকী প্ৰাপ্তবয়স্ক যুৱতী বুলি দাবী কৰি কৈছে যে ‘’মই এগৰাকী প্ৰাপ্তবয়স্ক যুৱতী। মই নিজৰ ইচ্ছামতে ধৰ্মান্তৰিত হৈ বিয়া হৈছিলো, মই হিন্দু ধৰ্মক ভাল পাওঁ।”
নৱবিবাহিতা ছাবাই পিতৃৰ অভিযোগৰ উত্তৰত কয় যে তেওঁৰ আন্তঃধৰ্মীয় বিবাহ তেওঁৰ ওপৰত জোৰকৈ কৰা হোৱা নাছিল। ছাবাই কৈছে যে তেওঁ এগৰাকী প্ৰাপ্তবয়স্ক, তেওঁ নিজৰ ইচ্ছামতে বিচৰা ব্যক্তিজনক বিয়া কৰাবলৈ সিদ্ধান্ত লৈছে আৰু তেওঁৰ পৰিয়ালে দাখিল কৰা ভুৱা অভিযোগৰ বাবে আৰক্ষীয়ে অংকুৰৰ বন্ধু বা পৰিয়ালৰ সদস্যক হাৰাশাস্তি নকৰিবলৈ অনুৰোধ জনায়।
ইয়াৰ লগতে ছাবাৰ পৰিয়ালৰ পৰা ছাবাই সংশয়ত ভুগিছে বুলি উল্লেখ কৰি ছাবা আৰু ছাবাৰ স্বামীক সুৰক্ষা প্ৰদান কৰিবৰ বাবেও আৰক্ষীক অনুৰোধ জনাইছে ছাবাই।
ছাবাই কৈছে যে হিন্দু ধৰ্মত তিনি তালাকৰ কোনো ধাৰণা নাই বাবেই তেওঁৰ হিন্দু ধৰ্মৰ প্ৰতি অপৰিসীম শ্ৰদ্ধা আছে।
উল্লেখ্য যে বৰেলীৰ বিশৰতগঞ্জ থানা এলেকাৰ বাসিন্দা অংকুৰ দেৱাল এগৰাকী কাপোৰৰ ব্যৱসায়ী। একেখন বজাৰৰে এজন মুছলমান ব্যৱসায়ীয়ে তেওঁৰ কন্যা ছাবাৰ সৈতে অংকুৰৰ দোকানলৈ সঘনাই গৈছিল। প্ৰায় ৬ বছৰ আগতে অংকুৰ দেৱলে ছাবাক লগ পাইছিল আৰু তেওঁলোকৰ বন্ধুত্ব প্ৰেমলৈ পৰিণত হৈছিল। তাৰ পিছত তেওঁলোকে ইজনে সিজনক বিয়া কৰাবলৈ সিদ্ধান্ত লয়।
কিন্তু তেওঁলোকৰ প্ৰেমৰ মাজত হেঙাৰ ৰূপে থিয় দিলে ধৰ্মীযই। ছাবা আৰু অংকুৰ দুয়োজনে পৰিয়ালক বিয়াৰ ব্যৱস্থা কৰিবলৈ আহ্বান জনাইছিল যদিও ছাবাৰ দেউতাকে নাকচ কৰিছিল।
যাৰ বাবে যোৱা ১ ফেব্ৰুৱাৰী বুধবাৰে অংকুৰৰ লগত ঘৰৰ পৰা ওলাই আহিছিল ছাবা। আৰু নিজকে হিন্দু ধৰ্মলৈ ৰূপান্তৰি কৰি প্ৰেমিক অংকুৰৰ সৈতে বিবাহপাশত আৱদ্ধ হৈছিল যুৱতীগৰাকী।
