সৰ্বভাৰতীয় মজলিছ-ই-ইত্তেহাদুল মুছলিমীন (এআইএমআইএম)ৰ মুৰব্বী আছাদুদ্দিন ওৱেইছিয়ে শনিবাৰে (২২ নৱেম্বৰ) কয় যে সীমাঞ্চল অঞ্চলৰ ন্যায় প্ৰদান হ’লে বিহাৰত জনতা দল (ইউনাইটেড) (জেডিইউ) নেতৃত্বাধীন ৰাষ্ট্ৰীয় গণতান্ত্ৰিক মিত্ৰজোঁটৰ চৰকাৰক সমৰ্থন কৰিবলৈ তেওঁৰ দল সাজু।
বিহাৰৰ পূৰ্ণিয়া জিলাৰ আমৌৰ বিধানসভা সমষ্টিত ৰাজহুৱা সভাত ভাষণ দি ওৱেইছিয়ে কয় যে পূৰ্বৰ চৰকাৰসমূহে সীমাঞ্চল অঞ্চলৰ সৈতে ন্যায় কৰা নাছিল বুলি নিউ ইণ্ডিয়ান এক্সপ্ৰেছত প্ৰকাশিত এক প্ৰতিবেদনত প্ৰকাশ পাইছে।
নীতিশ কুমাৰক কেৱল পাটনা আৰু ৰাজগীৰ (নালন্দা)ৰ উন্নয়নত গুৰুত্ব দিয়াৰ অভিযোগ উত্থাপন কৰি ওৱাইচিয়ে কয় যে এন ডি এৰ শাসনৰ সময়ত বিহাৰৰ বাকী অংশ অৱহেলিত আছিল।
তেওঁ জোৰ দি কয় যে উন্নয়ন কেৱল পাটনা আৰু ৰাজগীৰতে সীমাবদ্ধ থাকিব নালাগে।
মন কৰিবলগীয়া যে শেহতীয়া বিধানসভা নিৰ্বাচনত মুছলমান প্ৰধান সীমাঞ্চল অঞ্চলত পূৰ্ণিয়া, কিষানগঞ্জ, আৰৰিয়া, আৰু কাটিহাৰকে ধৰি ৫খন আসনত এ আই আই এম আই এমে জয়লাভ কৰিছিল।
তেওঁৰ ভাষণত তেওঁ কয় যে অঞ্চলটোৱে নদীৰ খহনীয়া, প্ৰব্ৰজন, আৰু দুৰ্নীতিৰ সৈতে যুঁজি আছে, আৰু চৰকাৰে এই সমস্যাসমূহৰ সমাধান কৰিব লাগে।
নৱনিৰ্বাচিত বিধায়কসকলৰ বাবে এআইএমআইএমৰ পৰিকল্পনাৰ কথা উল্লেখ কৰি ওৱেইছিয়ে নিজৰ দলৰ বিধায়কসকলক নিৰীক্ষণ কৰিব বুলি উল্লেখ কৰি জবাবদিহিতা ভিত্তিক পৰিকল্পনা ঘোষণা কৰে।
তেওঁ কয় যে আমাৰ বিধায়কসকলে সপ্তাহত দুবাৰকৈ নিজৰ সমষ্টিৰ দলীয় কাৰ্যালয়ত বহি মানুহৰ অভিযোগ শুনিব।
ইয়াৰ সুবিধাৰ বাবে দলৰ মুৰব্বীগৰাকীয়ে কয় যে বিধায়কসকলে মানুহৰ সৈতে হোৱা মত বিনিময়ৰ ফটো আৰু তেওঁলোকৰ স্থানৰ ফটো হোৱাটছএপৰ জৰিয়তে প্ৰেৰণ কৰিব লাগিব।
তেওঁ জনসাধাৰণক কয় যে, “এইটোৱে আমাক তেওঁলোকৰ অৱস্থান অনুসৰণ কৰাত সহায় কৰিব।”
ছমাহৰ ভিতৰত এই নতুন প্ৰক্ৰিয়া আৰম্ভ হোৱাৰ সম্ভাৱনা আছে।
অঞ্চলটোৰ জনসাধাৰণৰ সৈতে যোগাযোগত থাকিবলৈ ছমাহৰ মূৰে মূৰে এবাৰ অঞ্চলটো ভ্ৰমণ কৰাৰ সংকল্প পুনৰবাৰ উল্লেখ কৰে ওৱেইছিয়ে।
উল্লেখযোগ্য যে সীমাঞ্চল অঞ্চলৰ ২৪খন বিধানসভাৰ আসনৰ ভিতৰত ১৪খন এন ডি এয়ে জয়লাভ কৰাৰ বিপৰীতে ২০২০ৰ বিধানসভা নিৰ্বাচনত লাভ কৰা ৫খন আসন এ আই আই এম আই এমে ধৰি ৰাখিবলৈ সক্ষম হয়।
মন কৰিবলগীয়া যে ২০২০ চনত ওৱেইছিৰ দলৰ পৰা জয়ী হোৱা চাৰিজন বিধায়কে ৰাষ্ট্ৰীয় জনতা দলত যোগদান কৰে।
