পাকিস্তানৰ হৈ এজেন্ট হিচাপে কাম কৰাৰ অভিযোগত গ্ৰেপ্তাৰ হোৱা ভাৰতীয় যুৱতী জ্যোতি মালহোত্ৰাক গ্ৰেপ্তাৰৰ পিছতেই বিষয়টোৱে সৰ্বত্ৰ চৰ্চা লাভ কৰিছে। অভিযোগ উত্থাপন হৈছে যে হাৰিয়ানাৰ বিজেপিৰো সদস্যা আছিল জ্যোতি মালহোত্ৰা।
জ্যোতি মালহোত্ৰাক গ্ৰেপ্তাৰ কৰাৰ পিছতেই এতিয়া পোহৰলৈ আহিছে ন ন তথ্য। শেহতীয়া খবৰ অনুসৰি জ্যোতি পাকিস্তনলৈ যোৱাৰ কথা তেওঁৰ পৰিয়ালেও গম পোৱা নাছিল। জ্যোতি মালহোত্ৰাৰ পিতৃ হৰিশ মালহোত্ৰাৰ ভাষ্য – ‘তাই দিল্লীলৈ যাওঁ বুলি কৈছিল। দিল্লীলৈ যোৱাৰ কথা কৈ তাই পাকিস্তানলৈ গৈছিল। সেয়ে আমি এই বিষয়ে একো গমেই পোৱা নাছিলো।
জানিব পৰা মতে, জ্যোতি মালহোত্ৰাই এবাৰ নহয়, দুবাৰ পাকিস্তান ভ্ৰমণ কৰিছিল। দিল্লীত থকা পাকিস্তান উচ্চায়ুক্তৰ এজন বিষয়াই জ্যোতিক পাকিস্তানত থকাৰ ব্যৱস্থা কৰি দিছিল। জ্যোতিয়ে পাকিস্তানৰ কেইবাজনো আই এছ আই এজেণ্টক লগ পাইছিল। আনকি পাক-আফগান সীমান্তলৈও গৈছিল জ্যোতি। আনকি তেওঁ চোৰাংচোৱা হ’বলৈও প্ৰশিক্ষণ লৈছিল।
পূৰ্বে কন্যাৰ পাকিস্তান ভ্ৰমণ সন্দৰ্ভত হৰিশ মালহোত্ৰাৰ প্ৰাৰম্ভিক বক্তব্য আছিল যে যিকোনো ব্যক্তিয়েই পাকিস্তান ভ্ৰমণৰ বাবে যাব পাৰে। কাৰোবাক চিনি পালে ফোনো কৰিব পাৰে। কিন্তু এদিন পিছত তেওঁৰ বক্তব্য সলনি হ’ল।
মঙলবাৰে সৰ্বভাৰতীয় সংবাদ মাধ্যমৰ সৈতে হোৱা এক সাক্ষাৎকাৰত হৰিশ মালোহোত্ৰাই কয় যে জ্যোতিয়ে তেওঁক দিল্লীলৈ যোৱাৰ কথা কৈছিল। কিন্তু তাৰ পৰা ক’লৈ গ’ল সেয়া গম পোৱা নাছিল। পিতৃয়ে দাবী কৰে যে তেওঁৰ কন্যাই তেওঁক দিল্লীত কাম কৰা বুলি কৈছিল।
শুকুৰবাৰে হাৰিয়ানাৰ নিউ আগৰসেন এক্সটেনচন এলেকাৰ পৰা গ্ৰেপ্তাৰ কৰা হৈছিল ৩৩ বছৰীয়া জ্যোতিক। শনিবাৰে আদালতত হাজিৰ কৰাৰ পাছত তেওঁক পাঁচদিনীয়া আৰক্ষীৰ জিম্মালৈ প্ৰেৰণ কৰা হয়। ইতিমধ্যে পোহৰলৈ অহা তথ্য অনুসৰি জ্যোতিয়ে লস্কৰ ঘাটিত চোৰাংচোৱাৰ প্ৰশিক্ষণ লাভ কৰিছিল। পাকিস্তান-আফগানিস্তান সীমান্তত সংঘটিত হোৱা সন্ত্ৰাসবাদী কাৰ্যকলাপতো জ্যোতি জড়িত আছিল। তাতে কিছুদিন প্ৰশিক্ষণো লৈছিল। জ্যোতি যোৱা অঞ্চলটো উগ্ৰপন্থীৰে ভৰপূৰ বুলি ক’ব পাৰি। সাধাৰণ মানুহৰ ভৰিৰ ছাপো সেই অঞ্চলত দেখা নাযায়। সেই প্ৰেক্ষাপটত জ্যোতি মালহোত্ৰাই তাত কি কৰিছিল আৰু কাৰ সংস্পৰ্শত আছিল বুলি প্ৰশ্ন উত্থাপন হৈছে।
