দুটাকৈ কাৰ্যকাল শাসনৰ গাদীত থাকি অসম চুক্তি ৰূপায়ন কৰিব নোৱাৰা তথা মুছলমানৰ ৰক্ষক কংগ্ৰেছ আৰু এ আই য়ু ডি এফৰ লগত মিতিৰালি কৰা অগপই জাতি মাটি ৰক্ষা কৰাৰ নামত বিজেপিক সমালোচনা কৰাৰ অধিকাৰ নাই। অসম চৰকাৰৰ উদ্যোগ, পৰিবহন তথা সংসদীয় পৰিক্ৰমা মন্ত্ৰী চন্দ্ৰমোহন পাটোৱাৰীয়ে আজি গৌৰীসাগৰত এক নিৰ্বাচনী প্ৰচাৰ সভাত অংশগ্ৰহণ কৰি এই মন্তব্য কৰে।
ইয়াৰ উপৰি মন্ত্ৰী পাটোৱাৰীয়ে প্ৰাক্তন মুখ্য মন্ত্ৰী তথা একালৰ সতীৰ্থ প্ৰফুল্ল কুমাৰ মহন্তকো তীব্ৰ বাক্য বাণেৰে সমালোচনা কৰা দেখা যায়। তেওঁ কয় যে দুবাৰকৈ অগপ দলটো বিভাজন কৰি নতুন দল গঠন কৰা মহন্তৰ মন্তব্যৰ কোনো ভিত্তি নাই।
জাতি মাটি ভেটি ৰক্ষা আৰু পৰিৱৰ্তনৰ স্বাৰ্থত অসমৰ ৰাইজে বিজেপিক আঁকোৱালিৰ লোৱাৰ সময়তে নিজকে জাতীয়তাবাদী বুলি কোৱা অগপ নেতাই যিহকে তিহকে বকিব লাগিছে। তদুপৰি নীতিহীন অগপৰ এনেবোৰ কথাত কোনো দিনে ‘কেয়াৰ’ নকৰে বুলিও মন্ত্ৰীগৰাকীয়ে মন্তব্য কৰে।
আনহাতে উক্ত সভাতে মন্ত্ৰী পাটোৱাৰীয়ে বাওপন্থী বুদ্ধিজীৱিৰ উচতনিত ৭০টাকৈ জাতীয়তাবাদী সংগঠনে ৰাজপথত চলোৱা আন্দোলনৰ কোনো ভেলু নাই তথা সেই সংগঠনসমূহৰ কোনো গণভিত্তি নাই বুলি তাৎপৰ্যমূলক মন্তব্য আগবঢ়ায়।
ইফালে ভোটবেংকৰ স্বাৰ্থত অসমখন বাংলাদেশী ৰাজ্যলৈ পৰিণত কৰা কংগ্ৰেছ আৰু এ আই য়ু ডি এফৰ সৈতে অগপই মিতিৰালি কৰি পঞ্চায়ত নিৰ্বাচন খেলাটো অতিশয় দুৰ্ভাগ্যজনক বুলিও তেওঁ মন্তব্য কৰে।
বিজেপিৰ গৌৰীসাগৰ মণ্ডলৰ দ্বাৰা অসম ৰাজ্যিক পৰিবহন নিগমৰ গৌৰীসাগৰ বাছ আস্থানৰ সন্মুখত অনুষ্ঠিত কৰা বিজেপিৰ নিৰ্বাচনী প্ৰচাৰ সভাখনত মন্ত্ৰী পাটোৱাৰীৰ উপৰি পৰ্যটন নিগমৰ অধক্ষ্য জয়ন্ত মল্ল বৰুৱাইও অংশগ্ৰহন কৰি ঐতিহাসিক অসম আন্দোলনক তীব্ৰ ভাষাৰে সমালোচনা কৰি ইয়াৰ পৰিসমাপ্তিত স্বাক্ষৰিত অসম চুক্তিক এক ব্যৰ্থতা দলিল বুলি কয়।
যি সময়ত সমগ্ৰ ভাৰতবৰ্ষতে বিদেশী নাগৰিক চিনাক্তকৰণৰ ভিত্তিবৰ্ষ ১৯৫১ চন কৰাৰ বিপৰীতে অসম আন্দোলনকাৰীসকলে বিদেশী নাগৰিকৰ চিনাক্ত বৰ্ষ ১৯৭১ চন কৰিলে। যাৰ বাবে সেই সময়ছোৱাৰ ২০টা বছৰত অসমত অনুপ্ৰৱেশ ঘটা অবৈধ বিদেশী নাগৰিকক অগপ দলে ৰক্ষনাবেক্ষণ দিলে।
ৰাজহুৱা সম্পতিৰ মাটি দখল কৰি নিজৰ নামত কৰা আমগুৰি সমষ্টিৰ প্ৰাক্তন বিধায়ক প্ৰয়াত অঞ্জন দত্তৰ দুহিতা অংকিতা দত্তইও পিতৃৰ পদাংককে অনুকৰণ কৰিব। সেয়েহে ৰাইজে দলটোৰপৰাও আঁতৰি থকা উচিত বুলি মন্তব্য কৰি জাতি মাটি ভেটি সুৰক্ষাৰ বাবে আগন্তুক পঞ্চায়ত নিৰ্বাচনত বিজেপিক ভোট দিবলৈ ৰাইজক আহ্বান জনায়।