পুলৱামা-কাণ্ডৰ প্ৰত্যুত্তৰ হিচাপে ২৫ ফেব্ৰুৱাৰিৰ পুৱতি নিশা পাকিস্তান অধিকৃত কাশ্মীৰত থকা সন্ত্ৰাসবাদীৰ ঘাটিবোৰত বোমা পেলোৱাৰ দৰে ভাৰতীয় বায়ুসেনা অনুৰূপ এটা পদক্ষেপৰ বাবে আগ বাঢ়িছিল ২০০৮ চনৰ মুম্বাই আক্ৰমণৰ পিছতো। অৱশ্যে চৰকাৰৰ অন্তমি সেউজ সংকেতটো নাপালে বাবে সেয়া স্থগিত হ’ল।
আজি পুৱতি নিশা সন্ত্ৰাসবাদীৰ ঘাটিত বোমা নিক্ষেপৰ কেইঘণ্টামানৰ পিছতে এজন প্ৰাক্তন যুঁজাৰু বিমান পাইলটে সেই প্ৰস্তুতিক সুঁৱৰি আজি এই কথা প্ৰকাশ কৰিছে।
অৰুণাচলৰ পাছিঘাট নিৱাসী এই প্ৰাক্তন পাইলটজনৰ নাম মহন্ত পাংগিং। বায়ুসেনাৰ এজন প্ৰাক্তন পাইলট হিচাপে তেওঁ পাকিস্তানৰ সন্ত্ৰাসবাদীৰ ঘাটিত কৰা এই বোমা আক্ৰমণত আনন্দ প্ৰকাশ কৰে।
“পলমকৈ হ’লেও উচিত কামটো হ’ল”, আজি দিয়া এটা টুইটত এইদৰে কয় প্ৰাক্তন পাইলটজনে।
তেওঁ মুম্বাই আক্ৰমণৰ পিছত লেজাৰ নিয়ন্ত্ৰিত বোমা নিক্ষেপৰ বাবে (যিটো আজি কৰা হ’ল) সষ্টম হোৱা দলটোৰ গ্ৰুপ কমাণ্ডাৰ আছিল।
“অৱশেষত পাকিস্তান অধিকৃত কাশ্মীৰৰ সন্ত্ৰাসবাদীৰ ঘাটিবোৰত IAF Mirage 2000 ৰ পৰা লেজাৰ নিয়ন্ত্ৰিত বোমাৰে আঘাত কৰা হ’ল। আমি ২০০৮ চনত মুম্বাই আক্ৰমণৰ পিছত পাকিস্তান অধিকৃত কাশ্মীৰৰ মুজ্জাফৰাবাদত থকা শিবিৰবোৰত আক্ৰমণ কৰিবলৈ ওলাইছিলো। অৱশেষত চৰকাৰে শেষ সিদ্ধান্ত নল’লে। মোৰ কমাণ্ডত থকা আমাৰ ছুখই বাহিনীটো জড়িত আছিল। এতিয়া পলমকৈ হ’লেও হ’ল।” নিজৰ উচ্ছ্বাস প্ৰকাশ কৰি টুইটটোত প্ৰাক্তন গ্ৰুপ কমাণ্ডাৰজনে কয়।
তেওঁৰ টুইটটোৰ পৰা এইটো জানিব পাৰি যে ১১ বছৰ পূৰ্বে অকাৰ্য্যকৰী ৰূপত ৰৈ যোৱা এয়াৰ ষ্ট্ৰাইকটোক লৈ তেওঁৰ বেছ উৎসাহ আছিল।
মন কৰিব লগীয়া যে ছুখই-৩০ উপ-বাহিনী এটাক নেতৃত্ব দিয়া মহন্ত পাংগিং হ’ল উত্তৰ-পূবৰ একমাত্ৰ ব্যক্তি। তেওঁৰ ৩,৩০০ ঘণ্টাতকৈ অধিক সময় ছুখই-৩০, মিগ-২৯, জাগুৱাৰ, হাণ্টাৰকে ধৰি বিভিন্ন যুদ্ধবিমান চলোৱাৰ অভিজ্ঞতা আছে। তেওঁ ৰাষ্ট্ৰপতিৰ পদক,- বায়ুসেনা মেডেল লাভ কৰিছিল। অৱসৰ লোৱাৰ পিছৰ পৰা তেওঁ বিভিন্ন সামাজিক কামকাজত জড়িত হৈ আছে।