চেম্পিয়নৰ দৰে খেলি পুনৰ বিশ্ব চেম্পিয়নৰ খিতাপ দখল কৰিছে টিম ইণ্ডিয়াই। দক্ষিণ আফ্ৰিকাৰ বিৰুদ্ধে এখন মেচত পৰাস্ত হোৱাৰ পাছতো ভাৰতে প্রশ্নাতীতভাৱে প্রতিযোগিতাখনৰ শ্ৰেষ্ঠ দল হিচাপে আত্মপ্ৰকাশ কৰিছে। সঠিক সময়ত জিলিকি উঠিছে সূৰ্যকুমাৰ যাদৱৰ দলটো। যাৰ বাবেই টিম ইণ্ডিয়া চেম্পিয়ন হৈছে। অৱশ্যে প্ৰতিযোগিতাখনৰ আই চি চিৰ শ্ৰেষ্ঠ দলত স্থান লাভ কৰিলে মাত্ৰ ৪ গৰাকী ভাৰতীয়ই। আন বহুতে বঞ্চিত হ’বলগীয়া হ’ল।
বিশ্বকাপ শেষ হোৱাৰ ২৪ ঘণ্টাৰ ভিতৰতে আইচিচিয়ে প্ৰতিযোগিতাখনৰ শ্ৰেষ্ঠ দলটো বাছি উলিয়ালে। সেই দলত ভাৰতৰ চাৰিজন খেলুৱৈয়ে সুযোগ পাইছে। দক্ষিণ আফ্ৰিকা আৰু ইংলেণ্ডৰ পৰা দুজনকৈ খেলুয়ে সুযোগ পালে। পাকিস্তান, ৱেষ্ট ইণ্ডিজ আৰু জিম্বাবুৱেৰ পৰা এজনকৈ খেলুৱৈয়ে সুযোগ লাভ কৰে। ১২ নং খেলুৱৈ হিচাপে আমেৰিকাৰ শ্বেডলী ভান শ্বালৱিকে সুযোগ লাভ কৰে।
পাকিস্তানৰ চাহিবজাদা ফাৰহান আৰু সঞ্জু চেমছনে বিশ্বকাপৰ দুই শ্ৰেষ্ঠ অ’পেনাৰ হিচাপে সুযোগ লাভ কৰে। প্ৰতিযোগিতাখনত ফাৰহানে দুটা শতক অৰ্জন কৰে, আৰু তেওঁ ৩৮৩ ৰানেৰে সৰ্বাধিক স্ক’ৰ কৰা খেলুৱৈ।
সঞ্জু চেমচন দললৈ অহাৰ পিছত ভাৰতীয় দলৰ গতি সলনি হয়। তৃতীয় বেটছমেন হিচাপে তেওঁ বিশ্বকাপৰ ছেমি ফাইনেল আৰু ফাইনেল দুয়োটা খেলতে অৰ্ধশতক অৰ্জন কৰিছে। মাত্ৰ ৫খন মেচত ৩২১ ৰান সংগ্ৰহ কৰিছে।
ভাৰতীয় টপ অৰ্ডাৰত দৃষ্টি আকৰ্ষণ কৰিছে ঈশান কিষানেও। প্ৰতিযোগিতাখনত ৩১৭ ৰান সংগ্ৰহ কৰা বেটছমেনগৰাকীক আইচিচিয়েও শ্ৰেষ্ঠ একাদশৰ ভিতৰত অন্তৰ্ভুক্ত কৰিছে।
শ্ৰেষ্ঠ মিডল অৰ্ডাৰ বেটছমেন হিচাপে নিৰ্বাচিত হৈছে এডেন মাৰ্কৰাম, হাৰ্দিক পাণ্ডিয়া, উইল জেকছ আৰু জেছন হোল্ডাৰ। তাৎপৰ্যপূৰ্ণ কথাটো হ’ল তেওঁলোকৰ প্ৰত্যেকেই বলিঙো কৰিব পাৰে। কিন্তু প্ৰতিযোগিতাখনত শিৱম ডুবে আৰু অক্ষৰ পেটেলে ভাল প্ৰদৰ্শন কৰাৰ পিছতো আই চি চিয়ে তেওঁলোকক শ্ৰেষ্ঠ একাদশত ৰখা নাই।
যশপ্ৰীত বুমৰাহে পেচ বিভাগৰ নেতৃত্ব দিয়াৰ সম্ভাৱনা আছে। এই টুৰ্ণামেণ্টত তেওঁ কিয় বিশ্বৰ ভিতৰতে শ্ৰেষ্ঠ সেয়া পুনৰ প্ৰমাণ কৰিলে। তেওঁৰ লগত আছে লুংগি এনগিডি আৰু জিম্বাবুৱেৰ ব্লেছিং মুজাৰাবানি। তেওঁলোকে প্ৰতিযোগিতাখনত সকলোৰে দৃষ্টি আকৰ্ষণ কৰিছে।
এই দলৰ একমাত্ৰ স্পিনাৰ হিচাপে নিৰ্বাচিত হৈছে আদিল ৰছিদ। আমেৰিকান শ্বেডলী ভান শ্বেলউইক হ’ব ১২ নং খেলুৱৈ।
বিশ্বকাপৰ শ্ৰেষ্ঠ একাদশ
চাহিবজাদা ফাৰহান, সঞ্জু চেমচন, ঈশান কিষাণ, এডেন মাৰ্কৰাম (অধিনায়ক), হাৰ্দিক পাণ্ডিয়া, উইল জেকছ, জেছন হোল্ডাৰ, যশপ্ৰীত বুমৰাহ, লুংগি এনগিডি, আদিল ৰছিদ, ব্লেছিং মুজাৰাবানি, শ্বেডলি ভান শ্বালউইক (দ্বাদশ খেলুৱৈ)।
