আগন্তুক এদিনীয়া বিশ্বকাপৰ বহু প্ৰত্যাশিত ভাৰত-পাকিস্তান মেচৰ দিনাংক আজি পুনৰ নিৰ্ধাৰণ কৰিছে আন্ত:ৰাষ্ট্ৰীয় ক্ৰিকেট পৰিষদ, চমুকৈ আইচিচি- এ। আন্ত:ৰাষ্ট্ৰীয় ক্ৰিকেটৰ মুৰব্বী সংস্থাটোৱে লগতে বিশ্বকাপৰ আন ৮ খন মেচৰ দিনাংকও সলনি কৰিছে।
পূৰ্ব নিৰ্ধাৰিত সূচী অনুসৰি, ১৫ অক্টোবৰত ভাৰত আৰু পাকিস্তানৰ মেচৰ অনুষ্ঠিত হোৱাৰ কথা আছিল যদিও এতিয়া ১৪ অক্টোবৰত এই মেচ অনুষ্ঠিত হ’ব। পূৰ্বৰ সূচী অনুসৰি ১১ নৱেম্বৰত অনুষ্ঠিত হ’বলগীয়া ভাৰত-নেদাৰলেণ্ডৰ মেচখন নতুন সূচী অনুসৰি ১২ নৱেম্বৰত অনুষ্ঠিত হ’ব।
এক বিবৃতি যোগে আইচিচি- এ নতুন সূচীৰ বিষয়ে সদৰী কৰে। ভাৰত-পাকি মেচখন এতিয়া ১৪ অক্টোবৰত অনুষ্ঠিত হোৱাৰ ফলস্বৰূপে ১৪ অক্টোবৰত হ’বলগীয়া আফগানিস্তান বনাম ইংলেণ্ডৰ মেচখন ১৫ অক্টোবৰত অনুষ্ঠিত হ’ব।
Nine fixtures have been rescheduled for #CWC23.
Details 👇
— ICC (@ICC) August 9, 2023
ইফালে শ্ৰীলংকাৰ বিৰুদ্ধে পাকিস্তানৰ মেচখন ১২ অক্টোবৰৰ পৰা ১০ অক্টোবৰলৈ আৰু দক্ষিণ আফ্ৰিকা বনাম অষ্ট্ৰেলিয়াৰ মেচ ১২ অক্টোবৰৰ পৰিৱৰ্তে ১৩ অক্টোবৰলৈ পুনৰ নিৰ্ধাৰিত কৰা হৈছে।
সেইদৰে ১৪ অক্টোবৰত চেন্নাইত অনুষ্ঠিত হ’বলগীয়া বাংলাদেশ বনাম নিউজিলেণ্ডৰ মেচখন এতিয়া ১৩ অক্টোবৰত অনুষ্ঠিত হ’ব। আনহাতে ১২ নৱেম্বৰৰ অষ্ট্ৰেলিয়া বনাম বাংলাদেশ আৰু ইংলেণ্ড বনাম পাকিস্তান মেচ নতুন সূচী অনুসৰি ১১ নৱেম্বৰত অনুষ্ঠিত হ’ব।
