ৰাজস্থানৰ আলৱাৰৰ ই এছ আই চি মেডিকেল কলেজত সংঘটিত হৈছে এক ভয়ংকৰ ঘটনা। ৱাৰ্ডত চিকিৎসাধীন হৈ থকা এগৰাকী মহিলাক টোপনিৰ ঔষধ দি চিকিৎসালয়ৰ নাৰ্চিং ষ্টাফে ধৰ্ষণ কৰাৰ অভিযোগ উত্থাপন হৈছে। ঘটনাৰ সময়ত পৰিয়ালৰ লোকসকল ৱাৰ্ডৰ ঠিক বাহিৰতে আছিল।
অভিযোগ অনুসৰি চিকিৎসালয় কৰ্তৃপক্ষই প্ৰথমে ঘটনাটো ঢাকি ৰাখিবলৈ চেষ্টা কৰিছিল। পিছত যেতিয়া বিষয়টো আৰক্ষীৰ ওচৰ পালে তেতিয়াহে অভিযুক্তৰ বিৰুদ্ধে এফআইআৰ দাখিল কৰা হয়।
আৰক্ষীৰ সূত্ৰ অনুসৰি যোৱা ৪ জুনৰ নিশা ৩২ বছৰীয়া মহিলাগৰাকীক চিকিৎসালয়খনৰ আই চি ইউত ভৰ্তি কৰোৱা হৈছিল। এগৰাকী নাৰ্চিং কৰ্মচাৰীয়ে নিশা তেওঁৰ বিচনাৰ চাৰিওফালে পৰ্দা টানি লৈ মহিলাগৰাকীক টোপনিৰ বেজী দিয়ে। প্ৰায় অচেতন হৈ পৰাত মহিলাগৰাকীক যৌন নিৰ্যাতন চলোৱা হয়।
পিছত মহিলাগৰাকীয়ে অৰ্ধ চেতন অৱস্থাতে স্বামীৰ নাম চিঞৰিবলৈ আৰম্ভ কৰে। আই চি ইউৰ আন কৰ্মচাৰীসকলে কথাটো জানিব পাৰি স্বামীক ৱাৰ্ডলৈ মাতে। ৰাতিপুৱা সাৰ পোৱাৰ পিছত মহিলাগৰাকীয়ে সমগ্র ঘটনাৰ কথা পৰিয়ালক জনায়। বিষয়টো পোহৰলৈ অহাৰ লগে লগে স্বামীয়ে ততাতৈয়াকৈ চিকিৎসালয় কৰ্তৃপক্ষৰ ওচৰলৈ যায়।
অভিযোগ অনুসৰি চিকিৎসালয় কৰ্তৃপক্ষই প্ৰথমে সমগ্ৰ ঘটনাটো ঢাকি ৰাখিব বিচাৰিছিল। ইফালে, হেঁচাত পৰি অভিযুক্তই নিজেই মহিলাগৰাকী আৰু তেওঁৰ পৰিয়ালৰ ওচৰত ক্ষমা বিচাৰে। তথাপিও কৰ্তৃপক্ষই কোনো ব্যৱস্থা গ্ৰহণ নকৰিলে।
অৱশেষত স্থানীয় অতিৰিক্ত জিলা দণ্ডাধীশৰ কাষ চাপে ভুক্তভোগীৰ পৰিয়ালে। তেওঁ আৰক্ষীক বিষয়টোৰ তদন্ত কৰিবলৈ নিৰ্দেশ দিয়ে। ইয়াৰ পিছতে মহিলাগৰাকী আৰু পৰিয়ালৰ অভিযোগৰ ভিত্তিত আৰক্ষীয়ে গোচৰ ৰুজু কৰি তদন্ত আৰম্ভ কৰে।
আলৱাৰ থানাৰ সহকাৰী উপ-পৰিদৰ্শক মহাবীৰ সিঙে কয় যে, “ঘটনাৰ পিছত মহিলাগৰাকী আৰু তেওঁৰ পৰিয়ালৰ বক্তব্য লোৱা হৈছে। চিকিৎসা পৰীক্ষাও কৰা হৈছে।”
চিকিৎসালয় কৰ্তৃপক্ষইও তদন্ত আৰম্ভ কৰিছে। দোষীৰ বিৰুদ্ধে কঠোৰ ব্যৱস্থা গ্ৰহণ কৰাৰ আশ্বাস দিছে। ঘটনাৰ পিছতে চিকিৎসা মহাবিদ্যালয়ৰ ডীন ডাঃ অসীম দাসে কয়, “আমি এখন তদন্ত সমিতি গঠন কৰিছো। অহা শনিবাৰৰ ভিতৰত তেওঁলোকে প্ৰতিবেদন দাখিল কৰিব। দোষী সাব্যস্ত হোৱাসকলৰ বিৰুদ্ধে কঠোৰতম ব্যৱস্থা গ্ৰহণ কৰা হ’ব।”ঘটনাৰ দিনটোৰ চিচিটিভি ফুটেজো পৰীক্ষা কৰি আছে আৰক্ষীয়ে। জানিব পৰা মতে, ভুক্তভোগীৰ সম্পূৰ্ণ বিবৃতি, চিকিৎসা প্ৰতিবেদন আৰু প্ৰত্যক্ষদৰ্শীৰ বক্তব্যও লোৱা হৈছে।
