অসমৰ ছয় জনগোষ্ঠী জনজাতিকৰণৰ বিৰোধিতাৰে সৰৱ হৈছে ইণ্ডিজেনাছ লয়াৰ্ছ এচ’ছিয়েশ্যন অৱ ইণ্ডিয়া(ILAI)ই।
সংগঠনটোৱে দাবী কৰিছে যে অসমৰ ছয় জনগোষ্ঠীক জনজাতিৰ মৰ্যাদা প্ৰদান কৰিলে অসমৰ বৰ্তমানৰ জনজাতিসকলক ধ্বংস কৰাহে হ’ব।
অহা ৮ আগষ্ট ২০২০ তাৰিখে ছয় জনগোষ্ঠী জনজাতিকৰণ সংক্ৰান্তত মন্ত্ৰী ডাঃ হিমন্ত বিশ্ব শৰ্মাৰ নেতৃত্বত অসম চৰকাৰৰ মন্ত্ৰীগোটৰ এক বৈঠক হোৱাৰ কথা।
এই বৈঠকৰ পূৰ্বে ILAIৰ কৰা এই বিৰোধিতাই এক বিশেষ তাৎপৰ্য বহন কৰিছে।
উল্লেখ্য যে, অসমৰ কোচ-ৰাজবংশী, টাই আহোম, চুতীয়া, মটক, মৰাণ আৰু চাহ জনগোষ্ঠীয়ে দীৰ্ঘ দিন ধৰি জনজাতিকৰণৰ দাবী উত্থাপন কৰি আহিলেও অসমৰ তপচীলভূক্ত জনজাতিসমূহে ইয়াৰ তীব্ৰ বিৰোধিতা কৰি আহিছে।
বিজেপি দলে ২০১৬ চনৰ নিৰ্বাচনত অসমৰ ছয়গোষ্ঠীক জনজাতিকৰণৰ মৰ্যাদা দিয়াৰ প্ৰতিশ্ৰুতি দিছিল যদিও সমগ্ৰ বিষয়টোকলৈ ৰাজ্য চৰকাৰে গুৰুত্ব নিদিয়াৰ অভিযোগ উত্থাপন কৰি আহিছে ছয় জনগোষ্ঠীসমূহৰ সংগঠনৰ নেতৃত্ববৃন্দই।
ইফালে অসমৰ ছয় জনগোষ্ঠীক জনজাতিকৰণ কৰি অসমৰ বৰ্তমানৰ অনুসূচীত জনজাতিসকলক ধ্বংস নকৰিব বুলি চৰকাৰক সকিয়াই দিছে ILAI-এ।
“ছয় জনগোষ্ঠীৰ মাজত এনে কিছুমান জনগোষ্ঠী আছে যিসমূহ জনগোষ্ঠীক কোনো চৰকাৰী আৰু নৃতাত্বিক অধ্যয়নে কেতিয়াও ‘জনজাতি’ বুলি গণ্য কৰা নাই আৰু তেওঁলোকৰ জনজাতিৰ কোনো বৈশিষ্ট্যও নাই। সেয়েহে অসম চৰকাৰে অৰ্থনৈতিকভাৱে উন্নত অজনজাতীয় জনগোষ্ঠীক অনুসূচীত জনজাতিৰ তালিকাত অন্তৰ্ভুক্ত কৰা উচিত নহয়। এনে কৰিলে ভাৰতত ‘জনজাতি’ৰ ধাৰণাটোকে নস্যাৎ কৰা হ’ব।” ILAIৰ সম্পাদক দিলীপ কান্তি চাকমাই কয়।
তেওঁ লগতে আৰু কয়ে যে এই জনগোষ্ঠীসমূহৰ কিছুমানক অন্যান্য পিছপৰা শ্ৰেণী(OBC) হিচাপে শ্ৰেণীভুক্ত কৰা হৈছে আৰু তেনে শ্ৰেণীৰ জনগোষ্ঠীক জনজাতিৰ তালিকাভুক্ত কৰাৰ কোনো আইনী প্ৰক্ৰিয়া নাই।
ইফালে এচ’ছিয়শ্যনে দাবী কৰিছে যে উক্ত জনগোষ্ঠীসমূহক জনজাতিৰ মৰ্যাদা প্ৰদান কৰিলে অসমৰ বৰ্তমানৰ জনজাতিসকলৰ ৰাজনৈতিক প্ৰতিনিধিত্বত প্ৰভাৱ পৰিব। যাৰ ফলত তেওঁলোক ৰাজনৈতিকভাৱে বঞ্চিত হ’ব।
অসমৰ জনজাতিসকলে ছয় জনগোষ্ঠীৰ জনজাতিকৰণ প্ৰক্ৰিয়াক তীব্ৰ বিৰোধিতা কৰি অহাৰ পিছতো যদি চৰকাৰে ছয় জনগোষ্ঠীক জনজাতিৰ মৰ্যাদা প্ৰদান কৰে তেনে ভাৰত চৰকাৰে ৰাষ্ট্ৰসংঘক দিয়া জনজাতি সম্পৰ্কীয় আশ্বাসসমূহো উলংঘা কৰা হ’ব বুলিও দাবী কৰিছে ILAI-এ।