গোৱালপাৰা জিলাৰ কৃষ্ণাইত সম্প্ৰতি বৃদ্ধি পাইছে চোৰাং কাঠ ব্যৱসায়ীৰ দৌৰাত্ম্য। একাংশ চোৰাং কাঠ ব্যৱসায়ীৰ সৈতে গোপন বুজাবুজিৰে কৃষ্ণাইৰ বন বিভাগৰ বিষয়া আৰু কৰ্মচাৰীয়ে এনেদৰে ধ্বংস কৰি গৈছে এখনৰ পিছত এখন বনাঞ্চল।
প্ৰাপ্ত তথ্য মতে কৃষ্ণাই বন বিভাগৰ ৰেঞ্জাৰ গৰাকীৰ সৈতে গোপন বুজাবুজি থকাৰ বাবেই একাংশ চোৰাং কাঠ ব্যৱসায়ীয়ে অসম-মেঘালয় সীমান্তৱৰ্তী অঞ্চলত মুকলি কৈ কাঠ ফলা মিল বহুৱাই ৰমৰমীয়া ব্যৱসায় চলাই আহিছে। বিভিন্ন সময়ত কৃষ্ণাইৰ আৰক্ষীয়ে অভিযান চলাই বহু কাঠ ফলা মিল জব্দ কৰিছিল যদিও বন বিভাগৰ আশীৰ্বাদত তেওঁলোকে পুনৰ মিল পাতি ব্যৱসায় চলাই থাকে।
সম্প্ৰীতি কৃষ্ণাইৰ বহু অঞ্চলত মুকলি কৈ চলি আছে এনে বহু কাঠ ফলা মিল। এক সূত্ৰৰ পৰা জানিব পৰা মতে কৃষ্ণাই বন বিভাগৰ ৰেঞ্জাৰ গৰাকীয়ে প্ৰতিটো মিলৰ বাবদ মাহেকত ১৫ৰ পৰা ২০ হাজাৰকৈ টকা সংগ্ৰহ কৰে।
আনহাতে শেহতীয়াকৈ উঠা আন এক অভিযোগ মতে কৃষ্ণাই নৈত দুটাকৈ বৈধ বালিৰ মহল থকাৰ পিছতো ৰেঞ্জাৰ গৰাকীৰ প্ৰত্যক্ষ সহযোগত দুটাকৈ অবৈধ বালিৰ মহল চলাই থকা হৈছে। জানিব পৰা মতে ৰেঞ্জাৰৰ নিৰ্দেশত বন বিভাগৰ দুগৰাকী কৰ্মচাৰীয়ে এই অবৈধ বালিৰ মহলৰ তদাৰক কৰি আহিছে।
উল্লেখযোগ্য যে একাংশ স্থানীয় লোকে উক্ত দুয়োটা বিষয়তে বহুবাৰ অভিযোগ কৰিছে যদিও আজিলৈ এইক্ষেত্ৰত কোনো ব্যৱস্থা গ্ৰহণ কৰা হোৱা নাই। বৰঞ্চ বন বিষয়াৰ ছত্ৰছায়াত পুৰামাত্ৰাই অবৈধ বালি আৰু কাঠৰ ব্যৱসায় চলি থকা দেখিবলৈ পোৱা গৈছে।