মাত্ৰ ২১ দিনীয়া এগৰাকী কন্যা শিশুৰ টিউমাৰ বুলি ভাবি অস্ত্ৰোপচাৰ কৰিবলৈ গৈ হতভম্ব চিকিৎসক! কণমানি শৰীৰটোতে তৈয়াৰ হৈছে একাধিক ভ্ৰূণ। দুই বা তিনিটা নহয়,কেঁচুৱাজনীৰ পেটত মুঠ আঠটা ভ্ৰূণ পোৱা গৈছে। এইটো অত্যন্ত বিৰল ঘটনা। চিকিৎসকসকলৰ মতে পৃথিৱীৰ কোনো ঠাইতে এনে ঘটনাৰ কোনো উদাহৰণ নাই। সেই দৃষ্টিকোণৰ পৰা এই কেঁচুৱাজনীয়ে এক নতুন অভিলেখ গঢ়িছে।
ঝাৰখণ্ডৰ ৰামগড় জিলাত এই অদ্ভুত ঘটনাটো সংঘটিত হৈছে। কেঁচুৱাটোৰ জন্ম ১০ অক্টোবৰত হৈছিল। তেতিয়া কণমানিৰ পেটৰ এটা অংশ ফুলি থকা দেখা যায়। প্ৰাৰম্ভিক পৰীক্ষাৰ পিছত চিকিৎসকে অনুভৱ কৰে যে শিশুটিৰ পেটত টিউমাৰ আছে। যিমান সম্ভৱ সোনকালে অস্ত্ৰোপচাৰ কৰি টিউমাৰটো আঁতৰ কৰাৰ সিদ্ধান্ত লোৱা হয়।
সেইদৰে, শিশুটোৰ বয়স ২১ দিন হোৱাৰ পিছত চিকিৎসালয়ত ভৰ্তি কৰোৱা হয়। তাৰ পিছত চিকিৎসকসকলে শিশুটোৰ পেটত অস্ত্ৰোপচাৰ কৰে।
অস্ত্ৰোপচাৰৰ সময়তে আশ্চৰ্যজনক ঘটনাটো ঘটে। চিকিৎসকসকলে টিউমাৰ বুলি ভবা মাংসপিণ্ডৰ পৰা মুঠ আঠটা ভ্ৰূণ ওলাই আহে। অৱশ্যে ভ্ৰূণবোৰ অতি সৰু আৰু অপৰিপক্ক। ভ্ৰূণবোৰে আনকি তেনেদৰে কোনো আকৃতি পোৱা নাছিল। টিউমাৰত দুটা ভ্ৰূণ একেলগে সংলগ্ন হৈ আছিল। অৱশ্যে ভ্ৰূণসহ টিউমাৰটো অস্ত্ৰোপচাৰৰ দ্বাৰা আঁতৰ কৰা হয়।
কেঁচুৱাজনী বৰ্তমান সম্পূৰ্ণ সুস্থ। চিকিৎসকসকলে তেওঁক এসপ্তাহৰ বাবে পৰ্যৱেক্ষণত ৰাখিব। তাৰ পিছত তেওঁক চিকিৎসালয়ৰ পৰা অব্যাহতি দিয়া হ’ব।
চিকিৎসকৰ ভাষাত এই সমস্যাটোক ফিটাছ-ইন-ফিটু বুলি কোৱা হয়। পাঁচ লাখ শিশুৰ ভিতৰত এটাত এনেদৰে ভ্ৰূণৰ অস্তিত্ব দেখা যায়। অৱশ্যে আজিলৈকে কেঁচুৱাৰ শৰীৰত কেৱল এটা ভ্ৰূণহে পোৱা গৈছে।
ঝাৰখণ্ডত শিশুটোৰ অস্ত্ৰোপচাৰ কৰা ডাঃ মহম্মদ ইমৰানে কয়, “পৃথিৱীৰ কোনো আলোচনী বা কাকতত এটি শিশুৰ শৰীৰত আঠটা ভ্ৰূণ আছে বুলি কোনো উল্লেখ নাই।” ৰাঁচী চিকিৎসালয়ৰ মুৰব্বী ৰাজেশ সিঙে কয়, “এনে ঘটনা অতি বিৰল। আমি এই ঘটনাটো এখন আন্তৰ্জাতিক আলোচনীত প্ৰকাশৰ কথা নিশ্চিত কৰিবলৈ চেষ্টা কৰি আছো।”
