দিল্লীৰ নিজামুদ্দিনত অনুষ্ঠিত তবলিগী জামাতৰ সমাৱেশত অংশ লোৱা লোকসকলৰ বাবে ভাৰতত কৰ’নাৰ সংক্ৰমণৰ ঘটনা বৃদ্ধি পাইছে।
ইপিনে, বিদেশৰ পৰা যোৱা তবলিগী জামাতৰ প্ৰচাৰক ৩২১ লোকক বাংলাদেশত দুটা মছজিদত কোৱাৰেন্টাইনত ৰখা হৈছে।
এই লোকসকলক সম্পূৰ্ণ তলাবন্ধ কৰি ভিতৰত ৰখা হৈছে আৰু কাকো ভিতৰত প্ৰৱেশ কৰিবলৈ বা বাহিৰলৈ ওলাবলৈ দিয়া হোৱা নাই।
জানিব পৰা মতে, তবলিগীৰ দুটা বিৰোধী গোটৰ এটাৰ ১৯১ জনক এটা মছজিদত আৰু বাকী গোটৰ ১৩০জনক আন এটা মছজিদত ৰখা হৈছে।
উক্ত লোকসকলৰ সৈতে কাকো সাক্ষাৎ কৰিবলৈ নিদিবলৈকো নিৰ্দেশ দিয়া হৈছে।
আৰক্ষী সূত্ৰই জানিব দিয়া মতে ১৯১জন লোকক ঢাকাৰ কাকৰাইল জামে মছজিদত আৰু বাকী ১৩০জনক যাত্ৰাবাড়ী কলাপট্টি মদিনা জামে মছজিদত সুকীয়াকৈ ৰখা হৈছে।
মদিনা মছজিদত ভাৰত, পাকিস্তান, ইন্দোনেছিয়া আৰু মালয়েছিয়াৰ নাগৰিকক ৰখা হৈছে। তেওঁলোকৰ পৰীক্ষাও সম্পন্ন কৰা হৈছে। বিমানসেৱা আৰম্ভ হ’লেই তেওঁলোকক নিজ নিজ দেশলৈ প্ৰেৰণ কৰাৰ ব্যৱস্থা লোৱা হ’ব।
দিল্লীৰ নিজামুদ্দিনৰ তবলিগী জামাতৰ এক সমাৱেশত অংশ লোৱা প্ৰায় ৩০০ লোকৰ দেহত কৰ’না ভাইৰাছৰ সংক্ৰমণ ধৰা পৰিছে।
সমাৱেশত অংশ লোৱা প্ৰায় ৯ হাজাৰ লোক দেশ-বিদেশৰ বিভিন্ন স্থানত বিয়পি পৰিছে। সেয়েহে, ভাৰততো কৰ’না সংক্ৰমণ বৃদ্ধি পোৱাৰ আশংকা দেখা গৈছে।
অসমত এতিয়ালৈকে কৰ’না ভাইৰাছ ধৰা পৰা ২৬ জন লোকৰ ভিতৰত ২৫ জন লোকৰেই তবলিগী জামাতৰ সমাৱেশৰ সৈতে সম্পৰ্ক আছিল।
