“অতি স্পষ্টভাৱে উত্থাপন কৰিব বিচাৰিছো মই অখিল গগৈয়ে নৰেন্দ্ৰ মোদী আৰু বিজেপি চৰকাৰৰ বিৰুদ্ধে এটা গছৰ মুঢ়াকো ভোট দিবলৈ ভাল পাম”, মাছখোৱাস্থিত প্ৰাগজ্যোতিষ প্ৰকল্পত নাগৰিক সমাজে আয়োজন কৰা যুৱ অভিৱৰ্তনত ভাষণ ৰাখি এই ঘোষণা কৃষক মুক্তি সংগ্ৰাম সমিতিৰ নেতা অখিল গগৈৰ।
গগৈয়ে ভাষণ প্ৰসংগত কয় যে বিজেপি প্ৰাৰ্থীৰ বিৰুদ্ধে প্ৰতিদ্বন্দ্বিতা কৰা প্ৰাৰ্থীজনৰ কোনো যোগ্যতা থকাৰ প্ৰয়োজন নাই।
ইপিনে দেশখনক বচাবলৈ হ’লে বিজেপিৰ বিৰুদ্ধে ভোটদান কৰিব লাগিব বুলি গগৈয়ে জনসাধাৰণক আহ্বান জনায়।
“যদি সঁচাকৈ দেশ বচাব লাগে, গণতন্ত্ৰ, সংবিধান বাচিব লাগে তথা নিবনুৱা সমস্যা সমাধান কৰিব লাগে, তেন্তে প্ৰত্যেকজন নাগৰিকে মুকলি মূৰীয়াকৈ চিঞৰি চিঞৰি ক’ব লাগিব “আমি এই নিৰ্বাচনত বিজেপিক পৰাভূত কৰিবই লাগিব”, বিজেপিৰ বিৰুদ্ধে ভোট দিয়াৰ আহ্বান জনাই কয় কৃষক নেতাজনে।
গগৈৰ মতে “ভাৰতৰ প্ৰত্যেকজন মানুহ নৰেন্দ্ৰ মোদীতকৈ যোগ্য। বিজেপিক পৰাভূত কৰাটো দেশৰ প্ৰত্যেকজন দেশপ্ৰেমিক নাগৰিকৰ বাবে জাতীয় দায়িত্ব।”
ইপিনে, নাগৰিকত্ব সংশোধনী বিধেয়কৰ জৰিয়তে বিদেশৰ পৰা মানুহ আনিব খোজা বিজেপিৰ বিৰুদ্ধে অসমীয়া ৰাইজে স্থিতি ল’ব নোৱাৰিলে তেতিয়া ‘অসমীয়া’ হৈ জীয়াই থকাৰ কোনো অৰ্থ থাকিব নোৱাৰে বুলিও এক তেওঁ এক মন্তব্য কৰে।
আনহাতে, লোকসভা নিৰ্বাচনৰ পাছতেই সক্ৰিয় ৰাজনীতিলৈ অহাৰ কথা ঘোষণা কৰে গগৈয়ে। লগতে বিজেপি নাইবা কংগ্ৰেছক ভোট নিদিবৰ বাবে কাকো আহ্বান নজনায় বুলিও স্পষ্ট কৰে নেতাজনে।
“কৃষক মুক্তি সংগ্ৰাম সমিতি আৰু বহু শুভাকাংক্ষীৰ দাবী অনুসৰি লোকসভা নিৰ্বাচনৰ পাছত বিকল্প ৰাজনৈতিক শক্তিৰ বাবে একেলগে কাম কৰি যাম”, নিকট ভৱিষ্যতৰ ৰাজনৈতিক পৰিকল্পনাৰ ইংগিত দি গগৈয়ে কয়।
তদুপৰি ২০১৪ চনত কংগ্ৰেছক পৰাভূত কৰাটো জাতীয় দায়িত্ব আছিল বুলি উল্লেখ কৰি তেওঁ কয়, “কংগ্ৰেছ আৰু বিজেপি পুঁজিপতি আৰু জমিদাৰৰ দল। গতিকে এই দুটা দলক পৰাভূত কৰাটো জাতীয় দায়িত্ব।”
“এবাৰ কংগ্ৰেছ, এবাৰ বিজেপি এনেকৈয়ে মোৰ জীৱনটো যাব, গতিকে অহা বাৰৰ পৰা কংগ্ৰেছ-বিজেপি এটাও নকওঁ। ২০১৯-য়েই শেষ। এইবাৰ বিকল্প দল এটাৰ কথাহে ক’ম।” গগৈয়ে কয়।
