কেন্দ্ৰীয় চৰকাৰে শেহতীয়াকৈ দেশৰ আধাৰ কাৰ্ড ব্যৱস্থাত এক ডাঙৰ পৰিৱৰ্তন আনিছে। যোৱা মাত্ৰ ৬ মাহৰ ভিতৰত সমগ্ৰ দেশতে প্ৰায় ২.৫ কোটি আধাৰ কাৰ্ড বাতিল কৰা হৈছে। এই তথ্যই বৰ্তমান দেশজুৰি ব্যাপক চৰ্চা লাভ কৰিছে কাৰণ ২০১১ চনৰ পৰা ২০২৫ চনলৈ এই দীঘলীয়া ১৪ বছৰত যিমান সংখ্যক আধাৰ কাৰ্ড বাতিল হৈছিল, তাৰ তুলনাত যোৱা ৬ মাহতে দুগুণ অধিক কাৰ্ড নিষ্ক্ৰিয় কৰা হৈছে। ইণ্ডিয়া টুডেৰ এক প্ৰতিবেদনত এই বিস্ফোৰক তথ্য পোহৰলৈ আহিছে। অৱশ্যে এই কাৰ্যত সাধাৰণ ৰাইজে চিন্তিত হোৱাৰ কোনো বিশেষ কাৰণ নাই।
দৰাচলতে এই বৃহৎ সংখ্যক আধাৰ কাৰ্ড যিসকল লোকৰ নামত বাতিল কৰা হৈছে, সেইসকল আটাইকেইজনেই মৃত ব্যক্তি। দেশত মৃত্যুৰ হাৰৰ তুলনাত আধাৰ কাৰ্ড নিষ্ক্ৰিয় কৰাৰ হাৰ যোৱা কেইবছৰমানত অতি কম আছিল। পূৰ্বে দাখিল কৰা এক আৰ টি আইৰ উত্তৰত ইউআইডিএআইয়ে জনাইছিল যে ১৪ বছৰত মাত্ৰ ১.১৫ কোটি আধাৰ কাৰ্ডহে বাতিল হৈছিল, যিটো চৰকাৰী মৃত্যুৰ হাৰৰ হিচাপতকৈ বহু কম। ইয়াৰ ফলত দেশত বহুতো অস্তিত্বহীন লোকৰ নামত আধাৰ কাৰ্ড সক্ৰিয় হৈ আছিল আৰু ইয়াৰ অপব্যৱহাৰ হোৱাৰ এক ভয়াৱহ সম্ভাৱনা গঢ়ি উঠিছিল।
চৰকাৰে সংসদত জনোৱা অনুসৰি মৃত্যুৰ হাৰ আৰু আধাৰ কাৰ্ড নিষ্ক্ৰিয় কৰাৰ মাজত এক ভাৰসাম্য ৰক্ষা কৰিবলৈ এই খৰতকীয়া পদক্ষেপ গ্ৰহণ কৰা হৈছে। মৃতকৰ আধাৰ কাৰ্ডসমূহ সক্ৰিয় হৈ থাকিলে বিভিন্ন চৰকাৰী আঁচনিৰ ধন আত্মসাৎ কৰা বা ভুৱা নথি-পত্ৰ প্ৰস্তুত কৰাৰ দৰে অপৰাধমূলক কাৰ্যৰ সুযোগ থাকে। যিহেতু বৰ্তমান আধাৰ অবিহনে কোনো চৰকাৰী সেৱা লাভ কৰাটো সম্ভৱ নহয়, সেয়েহে এই সুৰুঙা বন্ধ কৰিবলৈ কেন্দ্ৰীয় চৰকাৰে কঠোৰ স্থিতি গ্ৰহণ কৰিছে। মৃত লোকসকলৰ পৰিচয় ব্যৱহাৰ কৰি যাতে কোনো ধৰণৰ জালিয়াতি হ’ব নোৱাৰে, সেই লক্ষ্যৰেই এই আধাৰ কাৰ্ডসমূহ সম্পূৰ্ণৰূপে বাতিল কৰা হৈছে।
