গুৱাহাটীৰ তৰুণৰাম ফুকন ইনড’ৰ ষ্টেডিয়ামত চলি থকা ৮৩ সংখ্যক ছিনিয়ৰ ৰাষ্ট্ৰীয় বেডমিণ্টন প্ৰতিযোগিতাত ভাৰতৰ তাৰকা শ্বাটলাৰ তথা বৰ্তমান বিশ্ব ৰেংকিঙৰ দ্বিতীয় স্থানৰ খেলুৱৈ পি ভি সিন্ধুৰ লগতে অসমৰ প্ৰতিভাৱান শ্বাটলাৰ অস্মিতা চলিহাই প্ৰতিযোগিতাৰ ছেমি ফাইনেলত প্ৰৱেশ কৰে।
কোৱাৰ্টাৰ ফাইনেলত অসমৰ খেলুৱৈ গৰাকীয়ে ১৬-২১, ২১-১৭, ২১-১৯ ব্যৱধানত পৰাস্ত কৰে আকৰ্ষি কাশ্যপক। অলিম্পিক পদক বিজয়ী খেলুৱৈ পি ভি সিন্ধুৱে কোৱাৰ্টাৰ ফাইনেলত ২১-১৬, ২১-৭ ব্যৱধানত পৰাস্ত কৰে ৰিয়া মুখাৰ্জীক।
পদক জয়ৰ বাবে মাত্ৰ এটা খোজ দুৰত থকা অস্মিতা চলিহাই ছেমিফাইনেলত শক্তিশালী পি ভি সিন্ধুৰ মুখামুখি হ’ব।
আনহাতে, বৃহস্পতিবাৰে প্ৰি-কোৱাৰ্টাৰ ফাইনেলত দেশৰ আন এগৰাকী তাৰকা শ্বাটলাৰ চাইনা নেহৱালে ক’ৰ্টৰ বিসংগতিৰ বাবে আধাতে নিজৰ খেল সামৰিছিল, পৰবৰ্তী সময়ত অনুষ্ঠিত হোৱা খেলখনত চাইনাই ২১-১১, ২১-১০ ব্যৱধানত শ্ৰুতি মণ্ডাদাক পৰাস্ত কৰি কোৱাৰ্টাৰ ফাইনেলত স্থান সুৰক্ষিত কৰে। আধা ঘন্টাৰ ভিতৰতে সমাপ্ত হোৱা খেলখনত চাইনাৰ সন্মুখত কোনোধৰণৰ প্ৰত্যাহবান আগবঢ়াব নোৱাৰিলে শ্ৰুতি মণ্ডাদাই।
পুৰুষৰ শাখাত লক্ষ্য সেনে ছেমি ফাইনেলত প্ৰৱেশ কৰিছে। আৰ্যমান টেণ্ডনক পৰাস্ত কৰি ছেমিত প্ৰৱেশ কৰে লক্ষ্য সেনে।
