ভাৰত চৰকাৰে অৰুণাচল প্ৰদেশক লৈ ডাঙৰ পদক্ষেপ লৈছে। ভাৰতৰ চৰকাৰী মানচিত্ৰত অৰুণাচলৰ ২৭ টা স্থান আৰু ভৌগোলিক অঞ্চল আনুষ্ঠানিকভাৱে নিৰ্দিষ্ট নামেৰে চিহ্নিত কৰা হৈছে।
এই সিদ্ধান্ত ঘোষণা কৰি ভাৰত চৰকাৰৰ এক বিবৃতিত কোৱা হৈছে যে, ‘অৰুণাচল প্ৰদেশৰ চাৰ্ভে অফ ইণ্ডিয়াৰ মানচিত্ৰত সেই স্থানসমূহক আনুষ্ঠানিকভাৱে চিহ্নিত কৰাৰ লক্ষ্য হৈছে তেওঁলোকক সঠিক স্বীকৃতি দিয়া আৰু বৃহত্তৰ জনসাধাৰণৰ মাজত অধিক সজাগতা সৃষ্টি কৰা।’
সংশ্লিষ্ট মহলৰ মতে ইয়াত চীনক এক শক্তিশালী বাৰ্তা দিয়াৰ বিষয়টোও জড়িত হৈ আছে। কাৰণ বেইজিঙে অৰুণাচল প্ৰদেশৰ বিভিন্ন ঠাইৰ নাম বিগত সময়ত অসংখ্যবাৰ উল্লেখ কৰিছে। যিটো ভাৰতে সদায় নিৰ্দ্বিধায় নাকচ কৰি আহিছে।
নতুন দিল্লীয়ে এনে পদক্ষেপক সদায় ‘বৃথা আৰু অযুক্তিকৰ’ বুলি অভিহিত কৰি আহিছে। লগতে কৈ অহা হৈছে যে কোনো এখন ঠাইৰ নাম ৰাখিলেই সেইখন চীনৰ নহয়। অৰুণাচল প্ৰদেশ ভাৰতৰ অবিচ্ছেদ্য আৰু অখণ্ড অংগ আছিল, আছে আৰু থাকিব।
শুকুৰবাৰে নতুন দিল্লীয়ে ভাৰতৰ ২৭ টা স্থান আৰু ভৌগোলিক অঞ্চল চৰকাৰী মানচিত্ৰত চিহ্নিত কৰে। এই তালিকাত ভাৰত আৰু চীনৰ পূর্বে সংঘাতৰ সৃষ্টি হোৱা ঠাইৰ নাম সন্নিবিষ্ট কৰা হৈছে৷ চীনৰ সেনাইও ১৯৫৯ চনত প্ৰকৃত নিয়ন্ত্ৰণ ৰেখাৰে লং জুত অবৈধভাৱে প্ৰৱেশ কৰিছিল। আকৌ লং জুৰ ওচৰৰ মাজা গাঁওখনো আনুষ্ঠানিকভাৱে মানচিত্ৰত অন্তৰ্ভুক্ত কৰা হৈছে।
একেদৰে টাৱাং জিলাৰ নামকা চু উপত্যকাৰ টেগ লাকো মানচিত্ৰত অন্তৰ্ভুক্ত কৰা হৈছে। ১৯৬২ চনত ভাৰত আৰু চীনৰ যুদ্ধ আৰম্ভ হোৱা ঠাইবোৰৰ ভিতৰত এখন আছিল টেগ লা। আকৌ পূব সীমান্তৰ দুৱাৰ হিচাপে পৰিচিত জয়ৰামপুৰ, বৈশাখী, যশৱন্ত গড় (১৯৬২ চনৰ ভাৰত-চীন যুদ্ধত শ্বহীদ হোৱা সৈনিক যশৱন্ত সিং ৰাৱটৰ স্মৃতিসৌধ) আদি ঠাইবোৰ মানচিত্ৰত চিহ্নিত কৰা হৈছে।
