আমেৰিকা যুক্তৰাষ্ট্ৰৰ ৰাষ্ট্ৰপতি ডনাল্ড ট্ৰাম্পে ইৰাণৰ সৈতে দুসপ্তাহৰ যুদ্ধবিৰতি ঘোষণা কৰাৰ মাত্ৰ কেইঘণ্টামানৰ পাছতেই, বুধবাৰে ইৰাণত অৱস্থিত ভাৰতীয় দূতাবাসে তাত থকা সকলো ভাৰতীয় নাগৰিকক ক্ষিপ্ৰতাৰে দেশখন ত্যাগ কৰিবলৈ কঠোৰ নিৰ্দেশনা জাৰি কৰিছে। শেহতীয়া পৰিস্থিতিৰ প্ৰতি লক্ষ্য ৰাখি ভাৰতীয় দূতাবাসৰ সৈতে সমন্বয় ৰক্ষা কৰি সুৰক্ষিত পথেৰে ইৰাণ এৰিবলৈ এই সতৰ্কবাণী জাৰি কৰা হৈছে।
যোৱা ৭ এপ্ৰিলত জাৰি কৰা পূৰ্বৰ এক নিৰ্দেশনাৰ আধাৰতেই বুধবাৰে দূতাবাসে পুনৰ এই জৰুৰী বিবৃতি প্ৰকাশ কৰে। দূতাবাসে স্পষ্ট কৰি দিছে যে কোনো ভাৰতীয় নাগৰিকে দূতাবাসৰ সৈতে পূৰ্ব আলোচনা আৰু সমন্বয় নকৰাকৈ কোনো আন্তঃৰাষ্ট্ৰীয় স্থল সীমান্তৰ কাষ চাপিবলৈ চেষ্টা কৰা অনুচিত। জৰুৰীকালীন অৱস্থাৰ বাবে দূতাবাসে কেইবাটাও ম‘বাইল নম্বৰ আৰু এটা ইমেইল ঠিকনা মুকলি কৰিছে, যাতে নাগৰিকসকলে যিকোনো মুহূৰ্তত যোগাযোগ কৰিব পাৰে। সুৰক্ষিত প্ৰত্যাৱৰ্তনৰ বাবে দূতাবাসে নিৰ্ধাৰণ কৰা পথসমূহ ব্যৱহাৰ কৰিবলৈ নাগৰিকসকলক দৃঢ়তাৰে পৰামৰ্শ দিয়া হৈছে।
উল্লেখ্য যে আমেৰিকাৰ ৰাষ্ট্ৰপতি ডনাল্ড ট্ৰাম্পে ইৰাণৰ ওপৰত চলোৱা আক্ৰমণ সাময়িকভাৱে স্থগিত ৰাখি দুসপ্তাহৰ যুদ্ধবিৰতিৰ কথা ঘোষণা কৰিছে। ৰাষ্ট্ৰপতিগৰাকীয়ে লগতে উল্লেখ কৰে যে ইৰাণে আগবঢ়োৱা দহ-দফীয়া প্ৰস্তাৱটো কাৰ্যকৰী কৰিব পৰা বিধৰ। ইৰাণৰ এই বিস্তৃত প্ৰস্তাৱনাত ‘অনাক্ৰমণ’ নীতিৰ লগতে বিশ্বৰ অন্যতম গুৰুত্বপূৰ্ণ তেল সৰবৰাহৰ পথ ‘হৰমুজ প্ৰণালী’ৰ ওপৰত ইৰাণৰ নিয়ন্ত্ৰণ অক্ষুণ্ণ ৰখাৰ দৰে গুৰুত্বপূৰ্ণ চৰ্তসমূহ অন্তৰ্ভুক্ত কৰা হৈছে।
সাম্প্ৰতিক যুদ্ধবিৰতিৰ ঘোষণাই মধ্যপ্ৰাচ্যত কিছু আশাৰ সঞ্চাৰ কৰিলেও, ভাৰতীয় দূতাবাসৰ এই ক্ষিপ্ৰ প্ৰত্যাৱৰ্তনৰ নিৰ্দেশনাই সামগ্ৰিক পৰিস্থিতি এতিয়াও উদ্বেগজনক হৈ থকাৰ কথাকে প্ৰতিপন্ন কৰিছে।
