আই পি এল ২০২৬ সমাপ্ত হোৱাৰ পিছতেই ভাৰত আৰু আফগানিস্তানৰ মাজত তিনিখন এদিনীয়া আৰু এখন টেষ্ট মেচৰ ক্ৰিকেট শৃংখলা অনুষ্ঠিত হ’ব। এই গুৰুত্বপূৰ্ণ শৃংখলাৰ বাবে ভাৰতীয় ক্ৰিকেট নিয়ন্ত্ৰণ ব’ৰ্ড চমুকৈ বি চি চি আইৰ জ্যেষ্ঠ বাচনি সমিতিয়ে ভাৰতীয় দল ঘোষণা কৰিছে। এইবাৰৰ দল ঘোষণাত আটাইতকৈ ডাঙৰ আৰু আচৰিত কৰা খবৰটো হ’ল যে উইকেটৰক্ষক বেটছমেন ঋষভ পণ্টক এদিনীয়া দলৰ পৰা সম্পূৰ্ণৰূপে বাদ দিয়া হৈছে। কেৱল ইমানেই নহয়, তেওঁক টেষ্ট দলৰ সহ-অধিনায়কৰ গুৰুত্বপূৰ্ণ দায়িত্বৰ পৰাও আঁতৰাই দিয়া হৈছে।
এদিনীয়া দলত ঋষভ পণ্টৰ স্থানত উইকেটৰক্ষক হিচাপে ঈশান কিষাণক দললৈ ঘূৰাই অনা হৈছে। টি-২০ বিশ্বকাপ ২০২৬ ৰ পিছত সঞ্জু চেমচনক এদিনীয়া দলত স্থান দিয়া হ’ব বুলি তীব্ৰ চৰ্চা চলিছিল যদিও বাচনি সমিতিয়ে এইবাৰো তেওঁক আওকাণ কৰিলে। এই এদিনীয়া দলৰ অধিনায়কত্বৰ দায়িত্ব শুভমন গীলক অৰ্পণ কৰা হৈছে আৰু শ্ৰেয়স আয়াৰক সহ-অধিনায়কৰ দায়িত্ব দিয়া হৈছে। ইফালে কে এল ৰাহুলক মুখ্য উইকেটৰক্ষক হিচাপে দলত অন্তৰ্ভুক্ত কৰা হৈছে।
চলিত বৰ্ষৰ আই পি এলত উৎকৃষ্ট প্ৰদৰ্শন কৰা যুৱ তীব্ৰবেগী বলাৰ প্ৰিন্স যাদৱ আৰু গুৰনুৰ ব্ৰাৰক প্ৰথমবাৰৰ বাবে ৰাষ্ট্ৰীয় দলত খেলাৰ সুযোগ দিয়া হৈছে। অলৰাউণ্ডাৰ হাৰ্দিক পাণ্ডিয়াই এদিনীয়া দললৈ প্ৰত্যাৱৰ্তন কৰিছে যদিও তেওঁৰ খেলাটো সম্পূৰ্ণৰূপে ফিটনেছৰ ওপৰত নিৰ্ভৰ কৰিব। অভিজ্ঞ বেটছমেন ৰোহিত শৰ্মা আৰু বিৰাট কোহলী দলত বাহাল আছে। খেলুৱৈৰ কামৰ চাপ নিয়ন্ত্ৰণ কৰাৰ বাবে তাৰকা তীব্ৰবেগী বলাৰ যশপ্ৰীত বুমৰাহক এই শৃংখলাৰ বাবে সম্পূৰ্ণ জিৰণি দিয়া হৈছে, যাৰ বাবে তেওঁ এদিনীয়া আৰু টেষ্ট কোনো এটা দলতে নাই। ইয়াৰ উপৰিও অভিজ্ঞ অলৰাউণ্ডাৰ ৰবীন্দ্ৰ জাদেজাকো এদিনীয়া দলত স্থান দিয়া হোৱা নাই।
টেষ্ট দলৰ আটাইতকৈ ডাঙৰ খবৰটো হ’ল ঋষভ পণ্টৰ পৰা মাত্ৰ ছয় মাহৰ ভিতৰতে সহ-অধিনায়কৰ দায়িত্ব কাঢ়ি লোৱা হৈছে। তেওঁৰ ঠাইত কে এল ৰাহুলক টেষ্ট দলৰ নতুন সহ-অধিনায়ক মনোনীত কৰা হৈছে। তীব্ৰবেগী বলাৰ গুৰনুৰ ব্ৰাৰ আৰু স্পিনাৰ মানৱ সুথাৰক প্ৰথমবাৰৰ বাবে টেষ্ট দলত অন্তৰ্ভুক্ত কৰা হৈছে। অলৰাউণ্ডাৰ হৰ্ষ ডুবেয়ো প্ৰথমবাৰৰ বাবে টেষ্ট দলত সুযোগ পাইছে। শেহতীয়াকৈ দক্ষিণ আফ্ৰিকাৰ বিৰুদ্ধে খেলা অক্ষৰ পেটেল আৰু ৰবীন্দ্ৰ জাদেজাই এই টেষ্ট দলত স্থান পোৱা নাই। ইয়াৰ উপৰিও আকাশ দ্বীপকো দলৰ পৰা বাদ দিয়া হৈছে। টেষ্টত ইনিংছ মুকলি কৰাৰ দায়িত্ব কে এল ৰাহুল আৰু যশস্বী জয়ছোৱালৰ ওপৰত থাকিব। মধ্যক্ৰমৰ দায়িত্বত থাকিব সাই সুদৰ্শন, দেৱদত্ত পড়িক্কল, ঋষভ পণ্ট আৰু শুভমন গীল। ধ্ৰুৱ জুৰেল বেকআপ উইকেটৰক্ষক হিচাপে থাকিব। ৱাশ্বিংটন সুন্দৰ, কুলদীপ যাদৱ আৰু মানৱ সুথাৰ স্পিনাৰ হিচাপে থাকিব। আনহাতে বেগী বলিং বিভাগৰ দায়িত্বত থাকিব মহম্মদ চিৰাজ, প্ৰসিদ্ধ কৃষ্ণ আৰু গুৰনুৰ ব্ৰাৰ।
আফগানিস্তানৰ বিৰুদ্ধে ভাৰতৰ সম্পূৰ্ণ এদিনীয়া দলটোত আছে শুভমন গীল (অধিনায়ক), ৰোহিত শৰ্মা, বিৰাট কোহলী, শ্ৰেয়স আয়াৰ (সহ-অধিনায়ক), কে এল ৰাহুল (উইকেটৰক্ষক), ঈশান কিষাণ (উইকেটৰক্ষক), হাৰ্দিক পাণ্ডিয়া, নীতিশ কুমাৰ ৰেড্ডী, ৱাশ্বিংটন সুন্দৰ, কুলদীপ যাদৱ, অৰ্শদীপ সিং, প্ৰসিদ্ধ কৃষ্ণ, প্ৰিন্স যাদৱ, গুৰনুৰ ব্ৰাৰ আৰু হৰ্ষ ডুবে।
আফগানিস্তানৰ বিৰুদ্ধে ভাৰতৰ একমাত্ৰ টেষ্ট মেচৰ দলটোত আছে শুভমন গীল (অধিনায়ক), যশস্বী জয়ছোৱাল, কে এল ৰাহুল (সহ-অধিনায়ক), সাই সুদৰ্শন, ঋষভ পণ্ট, দেৱদত্ত পড়িক্কল, নীতিশ কুমাৰ ৰেড্ডী, ৱাশ্বিংটন সুন্দৰ, কুলদীপ যাদৱ, প্ৰসিদ্ধ কৃষ্ণ, গুৰনুৰ ব্ৰাৰ, মানৱ সুথাৰ, হৰ্ষ ডুবে আৰু ধ্ৰুৱ জুৰেল।
