ভাৰতীয় ক্ৰিকেট নিয়ন্ত্ৰণ ব’ৰ্ডে ভাৰতীয় পুৰুষ দলটোৰ আগন্তুক ঘৰুৱা শৃংখলাৰ বাবে পূৰ্ণাংগ সূচী প্ৰকাশ কৰিছে। এই সূচী অনুসৰি, ২০২৭ চনৰ জানুৱাৰীৰ পৰা আৰম্ভ হ’বলগীয়া বৰ্ডাৰ-গাভাস্কাৰ ট্ৰফীৰ এখন গুৰুত্বপূৰ্ণ টেষ্ট মেচ গুৱাহাটীৰ বৰ্ষাপাৰা ক্ৰিকেট ষ্টেডিয়ামত অনুষ্ঠিত হ’ব। তদুপৰি, আগন্তুক ঘৰুৱা ক্ৰিকেট বৰ্ষটোত অনুষ্ঠিত হ’বলগীয়া মুঠ ৯ খন এদিনীয়া মেচত ৰোহিত শৰ্মা আৰু বিৰাট কোহলীৰ অংশগ্ৰহণৰ সম্ভাৱনা আছে।
বিচিচিআইৰ ঘোষণা অনুসৰি, ভাৰতীয় দলটোৱে ঘৰুৱা মাটিত পাঁচখন টেষ্ট, নখন এদিনীয়া আৰু আঠখন টি-২০ মেচ খেলিব। এই ঘৰুৱা ক্ৰিকেট বৰ্ষৰ মুখ্য আকৰ্ষণ হৈছে অষ্ট্ৰেলিয়াৰ বিৰুদ্ধে অনুষ্ঠিত হ’বলগীয়া বৰ্ডাৰ-গাভাস্কাৰ ট্ৰফী। ২০২৭ চনৰ জানুৱাৰী, ফেব্ৰুৱাৰী আৰু মাৰ্চ মাহজুৰি অনুষ্ঠিত হ’বলগীয়া এই শৃংখলাটোৰ প্ৰথমখন টেষ্ট ২১ জানুৱাৰীত নাগপুৰত আৰম্ভ হ’ব। ইয়াৰ পিছতে দ্বিতীয়খন টেষ্ট চেন্নাইত আৰু তৃতীয়খন টেষ্ট ১১ ফেব্ৰুৱাৰীৰ পৰা ১৫ ফেব্ৰুৱাৰীলৈ গুৱাহাটীত অনুষ্ঠিত হ’ব। পৰৱৰ্তী সময়ত চতুৰ্থখন টেষ্ট ৰাঁচীত আৰু শৃংখলাৰ চূড়ান্ত টেষ্টখন ২৭ ফেব্ৰুৱাৰীৰ পৰা আহমেদাবাদত অনুষ্ঠিত হ’ব। প্ৰণিধানযোগ্য যে, ইয়াৰ পূৰ্বে ২০২৫ চনৰ নৱেম্বৰ মাহত দক্ষিণ আফ্ৰিকাৰ বিৰুদ্ধে গুৱাহাটীয়ে ঘৰুৱা টেষ্ট শৃংখলাৰ এখন খেল আয়োজন কৰিছিল।
অষ্ট্ৰেলিয়াৰ বিৰুদ্ধে এই টেষ্ট শৃংখলাৰ উপৰিও ভাৰতে ৱেষ্ট ইণ্ডিজ, শ্ৰীলংকা আৰু জিম্বাবৱেৰ বিৰুদ্ধেও অৱতীৰ্ণ হ’ব। চলিত বৰ্ষৰ ২৭ ছেপ্টেম্বৰৰ পৰা ৱেষ্ট ইণ্ডিজৰ ভাৰত ভ্ৰমণ আৰম্ভ হ’ব, য’ত তিনিখন এদিনীয়া আৰু পাঁচখন টি-২০ মেচ অনুষ্ঠিত হ’ব। এই শৃংখলাৰ দ্বিতীয়খন এদিনীয়া মেচো অহা ৩০ ছেপ্টেম্বৰত গুৱাহাটীতে অনুষ্ঠিত হোৱাৰ কথা ঘোষণা কৰা হৈছে। আনহাতে, ডিচেম্বৰ মাহত শ্ৰীলংকাই ভাৰতৰ বিৰুদ্ধে তিনিখন এদিনীয়া আৰু সমসংখ্যক টি-২০ মেচ খেলিব। নতুন বছৰৰ আৰম্ভণিতে, অৰ্থাৎ ২০২৭ চনৰ জানুৱাৰী মাহত জিম্বাবৱেই ভাৰত ভ্ৰমণ কৰিব আৰু তিনিখন এদিনীয়া মেচত ভাগ ল’ব। উল্লেখনীয় যে, ২০০২ চনত সৌৰভ গাংগুলীৰ নেতৃত্বত ভাৰতীয় দলে খেলাৰ পিছত এয়া জিম্বাবৱেৰ প্ৰথমটো দ্বিপাক্ষিক ভাৰত ভ্ৰমণ হ’ব। বিচিচিআইৰ এই সম্পূৰ্ণ সূচী অনুসৰি ভাৰতৰ ১৭ খন চহৰত মুঠ ২২ খন আন্তঃৰাষ্ট্ৰীয় মেচ অনুষ্ঠিত কৰাৰ প্ৰস্তুতি চলোৱা হৈছে।
