বাংলাদেশৰ পৰা হোৱা অবৈধ অনুপ্ৰৱেশক লৈ চুবুৰীয়া দেশখনক ভাৰতৰ উদ্বিগ্নতা জনাইছে গৃহ মন্ত্ৰী অমিত শ্বাহে।
বিশেষকৈ অসমকে ধৰি উত্তৰ-পূবলৈ হোৱা অবৈধ অনুপ্ৰৱেশকাৰীৰ বিষয়টো নতুন দিল্লীত দুয়ো দেশৰ গৃহ মন্ত্ৰীৰ বৈঠকত উত্থাপিত হৈছে।
“সমস্যাটোৰ এক সমাধান বিচাৰি উলিওৱাৰ বাবে, সীমান্তত নথিপত্ৰহীন লোকৰ চালচলন বিষয়টো সন্দৰ্ভত গৃহ মন্ত্ৰী অমিত শ্বাহে ভাৰতৰ উদ্বিগ্নতা উত্থাপন কৰে,” যোৱা ৭ আগষ্টত অনুষ্ঠিত বৈঠকক লৈ গৃহ বিভাগৰ বিবৃতিত প্ৰকাশ।
শ্বাহ আৰু বাংলাদেশৰ গৃহ মন্ত্ৰী আচাদুজ্জআমান খানৰ মাজত নতুন দিল্লীত অনুষ্ঠিত সপ্তম ভাৰত-বাংলাদেশ গৃহ মন্ত্ৰী পৰ্য্যায়ৰ বৈঠকত বিষয়টো উত্থাপিত হৈছে।
দুয়ো গৃহ মন্ত্ৰীয়েই সীমান্ত সুৰক্ষা আৰু সীমা ভেদি চলি থকা অপৰাধ ৰোধৰ ক্ষেত্ৰত অধিক কৰণীয়তাৰ প্ৰয়োজনীয়তাত সন্মতি প্ৰকাশ কৰে।
সীমান্তৰ অপৰাধ ৰোধৰ বিপৰীতে দুয়ো দেশৰ নাগৰিকৰ মাজত যোগাযোগ আৰু ব্যৱসায়, স্বাস্থ্য আৰু পৰ্য্যটন সুচল কৰাৰ ওপৰত দুয়ো নেতাই গুৰুত্ব আৰোপ কৰে।
তাৰোপৰি, উগ্ৰপন্থীক বাংলাদেশৰ ভূমি ব্যৱহাৰৰ অনুমতি নিদিয়াক লৈ গৃহ মন্ত্ৰী শ্বাহে চুবুৰীয়া দেশখনৰ নীতিৰ শলাগ লয়।
বৈঠকত নিৰাপত্তা আৰু সীমান্তৰ আন্তঃগাঁথনি সম্পৰ্কেও পৰ্য্যালোচনা হয়।
“এই বিষয়সমূহৰ ক্ষিপ্ৰ সমাধানৰ বাবে পদক্ষেপ গ্ৰহণত (দুয়ো পক্ষই) সন্মতি প্ৰকাশ কৰে,” বিবৃতিত প্ৰকাশ।
চুবুৰীয়া দেশ দুখনৰ মাজৰ “কৌশলগত অংশীদাৰিত্ব” (strategic partnership)ক লৈ বৈঠকত দুয়ো পক্ষই সন্তুষ্টি ব্যক্ত কৰে।
“আজি আমাৰ জোঁটবন্ধন পৃথিৱীজুৰি ভাল চুবুৰীয়াজনিত সম্পৰ্কৰ আদৰ্শ,” বিবৃতিত প্ৰকাশ।
