পাকিস্তান আৰু বাংলাদেশৰ বিৰুদ্ধে ফেভাৰিট হিচাপে চেম্পিয়নছ ট্ৰফীত প্ৰৱেশ কৰিছিল ভাৰতে। ফলাফল আশা কৰা মতেই হ’ল। কিন্তু আচল পৰীক্ষা আছিল নিউজিলেণ্ডৰ বিৰুদ্ধে। নিজৰ ঘৰুৱা মাটিত টেষ্টত ভাৰতক পৰাস্ত কৰা দলটোৰ বিৰুদ্ধে এদিনীয়া মেচত জিলিকি উঠিব পাৰিবনে টিম ইণ্ডিয়াই? গ্ৰুপ পৰ্যায় শীৰ্ষত শেষ কৰিব পাৰিবনে? উত্তৰ অৱশ্যে ভাৰতৰ পক্ষেই থাকিল।
টছত জয়ী নোহোৱাৰ লগতে স্ক’ৰব’ৰ্ডত বৃহৎ ৰান নথকা সত্ত্বেও ৰোহিত শৰ্মাৰ দলটোৱে জয়ৰ হেট্ৰিক অৰ্জন কৰিবলৈ সক্ষম হয়। ৰোহিতে আকৌ এবাৰ জোৰ দি কয় যে দলটো কোনো এজন ব্যক্তিৰ ওপৰত নিৰ্ভৰশীল নহয়। নিউজিলেণ্ডক পৰাস্ত কৰাটো কেৱল টীম গেমতহে সম্ভৱ হ’ল।
দেওবাৰে যুঁজখন মূলতঃ ভাৰতৰ বেটিং আৰু নিউজিলেণ্ডৰ স্পিনৰ মাজত আছিল। অৱশ্যে মেথিউ হেনৰীয়ে সকলো সমীকৰণ সলনি কৰি দিলে। তেওঁৰ বিধ্বংসী গতিৰ বাবে ভাৰতীয় টপ অৰ্ডাৰ সম্পূৰ্ণৰূপে তচনচ বৈ পৰে। ৰোহিত (১৫)ক আগতীয়াকৈ আউট কৰে জেমিছনে। তাৰ পিছত হেনৰীয়ে দ্ৰুতগতিত গিল আৰু কোহলীক পুনৰ পেভিলিয়নলৈ ঠেলি দিলে।
দায়িত্ব চম্ভালে শ্ৰেয়াছ আয়েৰ আৰু অক্ষৰ পেটেলে। তেওঁলোকৰ পাৰ্টনাৰশ্বিপেৰে দলটোৱে ঘূৰি আহিল। শ্ৰেয়াছে চাপৰ মুহূৰ্তত নিজৰ শীতল মস্তিষ্কৰে ৭৯ ৰান সংগ্ৰহ কৰে। ৪টা চাৰি আৰু দুটা ছয় মাৰে। হাৰ্দিক পাণ্ডিয়াৰ ফাইটিং ইনিংছে ভাৰতক যুঁজ দিব পৰ পজিচনলৈ নিলে।
অৱশ্যে এনে পৰিস্থিতিত বেটিং ক্ৰমত অক্ষৰক আগলৈ আৰু কে এল ৰাহুলক পিছলৈ অনাৰ দল পৰিচালনাৰ সিদ্ধান্তক লৈ প্ৰশ্ন উত্থাপন হৈছে। অৱশ্যে এই আলোচনাত ৰোহিত বিশেষভাৱে প্ৰভাৱিত নহ’বও পাৰে কিয়নো অক্ষৰে স্ক’ৰব’ৰ্ডত ৪২ ৰান সংযোজন কৰে।
ৰোহিত-বিৰাট-গিলৰ বিফলতাৰ দিনটোত শ্ৰেয়াছ, অক্ষৰ আৰু হাৰ্দিকৰ দায়িত্বশীল বেটিঙে আশাৰ সঞ্চাৰ কৰিছে। ইয়াত দলটোৱে স্পষ্ট কৰি দিলে যে বিশ্বৰ এক নম্বৰ দল ভাৰতক প্ৰতিহত কৰাটো অসম্ভৱ। তেওঁলোক অপ্ৰতিৰোধ্য।
বলিং বিভাগৰ ক্ষেত্ৰতো একেই কথা। প্ৰথম দুখন মেচত বেঞ্চত বহি থকা স্পিনাৰগৰাকীয়ে আজি উইলিয়ামছনৰ আতংকৰ সৃষ্টি কৰে। তেওঁ হৈছে বৰুণ চক্ৰৱৰ্তী। ৰাণাৰ ঠাইত আৰম্ভণিৰ একাদশত স্থান লাভ কৰাৰ সুযোগ পোৱাৰ লগে লগে নিজৰ সৰ্বস্ব উজাৰি দিলে। তেওঁৰ ঘূৰ্ণীৰ জালত নিউজিলেণ্ডৰ বেটাৰ আবদ্ধ হৈ পৰিল। ২৫০ ৰানৰ লক্ষ্য অনুসৰণ কৰি নিউজিলেণ্ডে ২০৫ ৰান সংগ্ৰহ কৰিয়েই অল আউট হয়।
অৱশ্যে এটা অধ্যায় শেষ হোৱাৰ লগে লগে ৰোহিতে আন এক কঠিন পৰীক্ষাৰ বাবে প্ৰস্তুতি আৰম্ভ কৰিব লাগিব। গ্ৰুপৰ শীৰ্ষস্থান দখল কৰাৰ পিছত শেষৰ চাৰিটাত তেওঁলোকৰ প্ৰতিদ্বন্দ্বী হ’ব অষ্ট্ৰেলিয়া। ২০২৩ চনৰ বিশ্বকাপৰ ফাইনেলত তেওঁলোকৰ হাতত পৰাস্ত হোৱাৰ আঘাত এতিয়াও সজীৱ হৈ আছে।
অষ্ট্ৰেলিয়াৰ দলটোৱে যিকোনো মুহূৰ্ততে খেল ঘূৰাই দি আচৰিত কৰিব পাৰে। ফলত টিম ইণ্ডিয়াই ভালদৰেই জানে যে ফাইনেলৰ পথ একেবাৰে সহজ নহয়। সেয়ে একেৰাহে জয়ী হোৱাৰ পিছতো ৰোহিতৰ বাবে আত্মতুষ্টিৰ কোনো স্থান নাই। বৰঞ্চ গম্ভীৰৰ দৃষ্টি এতিয়া মঙলবাৰে ট্ৰেভিছ হেডক নিৰস্ত্ৰ কৰাৰ কৌশল উদ্ভাৱনৰ ওপৰত। কাৰণ এই মেচখনেই ভাৰতীয় দলত তেওঁৰ ভৱিষ্যত নিৰ্ণয় কৰিব। আনখন ছেমি ফাইনেলত নিউজিলেণ্ডে দক্ষিণ আফ্ৰিকাৰ বিৰুদ্ধে খেলিব।
সংক্ষিপ্ত স্কোৰঃ
ভাৰতঃ ২৪৯/৯ (শ্ৰেয়াছ-৭৯, হাৰ্দিক-৪৫, হেনৰী-৪২/৫)
নিউজিলেণ্ডঃ ২০৫/১০ (উইলিয়ামছন-৮১, বৰুণ-৪২/৫)
ভাৰতে ৪৪ ৰানত জয়লাভ কৰে।
