১৯ বছৰ অনুৰ্ধৰ এদিনীয়া বিশ্বকাপতো ভাৰতৰ আধিপত্য অব্যাহত আছে। বাংলাদেশ আৰু আমেৰিকাৰ পিছতে শনিবাৰে আয়ুষ মাত্ৰেৰ দলটোৱে নিউজিলেণ্ডকো পৰাস্ত কৰে। বৰষুণ বিঘ্নিত খেলখনত নিউজিলেণ্ডক ৭ উইকেটত পৰাস্ত কৰে ভাৰতে।
বলিঙৰ জৰিয়তে আৰ এছ অম্বৰীশ আৰু হেনিল পেটেলে আধিপত্য প্ৰদৰ্শন কৰে। পেচাৰ দুজনৰ দমনীয় প্ৰদৰ্শনৰ আগত নিউজিলেণ্ডে মাত্ৰ ১৩৫ ৰান সংগ্ৰহ কৰিয়েই অল আউট হয়। বলাৰসকলে গঢ়ি তোলা সহজ লক্ষ্যৰ বাকী কামখিনি আয়ুষ মাত্ৰে, বৈভৱ সূৰ্যবংশীয়ে সম্পন্ন কৰে। ক্ৰিকেটাৰ দুগৰাকীৰ বিস্ফোৰক ইনিংছৰ সহায়ত ভাৰতে লক্ষ্যত উপনীত হয়। এই জয়েৰে টিম ইণ্ডিয়াই গ্ৰুপ ‘বি’ৰ শীৰ্ষস্থান দখল কৰি ছুপাৰ ছিক্সত স্থান লাভ কৰে।
বৰষুণৰ বাবে আউটফিল্ড তিতি থকাৰ বাবে মেচখন প্ৰায় এঘণ্টা পলমকৈ আৰম্ভ হয়। অভাৰৰ সংখ্যা ৪৭ লৈ হ্ৰাস পায়। টছত জয়ী হৈ ভাৰতীয় অধিনায়ক আয়ুষ মাত্ৰেই প্ৰথমে বলিং কৰাৰ সিদ্ধান্ত লয়। আৰম্ভণিৰে পৰা নিয়মীয়া ব্যৱধানত উইকেট হেৰুৱাইছিল নিউজিলেণ্ডে। যেতিয়া তেওঁলোকৰ স্ক’ৰ ১৭-৩ হয়, তেতিয়া পুনৰ বৰষুণৰ ফলত খেলখন বাধাগ্ৰস্ত হয়।
অলপ বিৰতিৰ পিছত পুনৰ খেল আৰম্ভ হয়। এইবাৰ অভাৰৰ সংখ্যা ৩৭ লৈ হ্ৰাস পায়। কিন্তু ভাৰতীয় পেচাৰৰ আধিপত্যত নিউজিলেণ্ডে ২২ ৰানত ৫ টা উইকেট হেৰুৱাই থানবান হ’বলৈ আৰম্ভ কৰে। এই পৰিস্থিতিৰ পৰা কিছু যুঁজ দিয়ে জেকব কল্টৰ (২৩), কালাম চেমছন (৩৭) আৰু চেলৱিন সঞ্জয়ে (২৮)।
শেষত নিউজিলেণ্ডে ১৩৫ ৰানত অল আউট হয়। খেলখনত অম্বৰীছে ২৯ ৰানত ৪টা উইকেট দখল কৰে। হেনিল পেটেলে ৩ উইকেট দখল কৰে।
ডি এল এছ পদ্ধতিত ভাৰতৰ লক্ষ্য আছিল ১৩০। বেটিঙৰ আৰম্ভণিতে এৰন জৰ্জ (৭)ৰ উইকেট হেৰুৱাইও ভাৰতে কোনো সমস্যাৰ সন্মুখীন নহ’ল। বৈভৱ আৰু আয়ুষে ৭৬ ৰানৰ পাৰ্টনাৰশ্বিপ গঢ়ি তুলিছিল। বৈভৱে ২৩টা বলত ৪০ ৰানৰ বিস্ফোৰক ইনিংছ খেলি আউট হয়। আয়ুষেও অৰ্ধশতক অৰ্জন কৰে। তেওঁ ২৭টা বলত ৫৩ ৰানৰ ইনিংছ খেলে।
ইয়াৰ পিছত বিহন মালহোত্ৰা আৰু বেদান্ত ত্ৰিবেদীয়ে বাকী কামখিনি সহজে সমাপ্ত কৰি পেলালে। ১৩.৩ অভাৰতে ভাৰতে জয়লাভ কৰে। গ্ৰুপটোৰ তিনিখন খেলৰ তিনিওখন খেলতে জয়লাভ কৰি টিম ইণ্ডিয়াই ছুপাৰ ছিক্সত স্থান দখল কৰে।
