বৃহস্পতিবাৰে লক্ষ্ণৌত অনুষ্ঠিত টী-২০ ছিৰিজৰ প্ৰথমখন মেচত শ্ৰীলংকাক ভাৰতে অনায়াসে পৰাজিত কৰে।মেচখনত ভাৰতে শ্ৰীলংকাক ৬২ৰাণৰ ব্যৱধানত পৰাজিত কৰে।
টছত জিকি শ্ৰীলংকাই প্ৰথমে ভাৰতক বেটিং কৰিবলৈ পঠিয়ায়। বেটিং কৰিবলৈ নামি ভাৰতীয় বেটাৰসকলে একপ্ৰকাৰ তাণ্ডৱ চলায়।
অধিনায়ক ৰোহিত শৰ্মা, ঈষাণ কিষান আৰু শ্ৰেয়াস আয়াৰৰ বেটিং তাণ্ডৱৰ ফলত ভাৰতে নিৰ্দিষ্ট ২০ অভাৰত দুটা উইকেট হেৰুৱাই ১৯৯ৰাণ সংগ্ৰহ কৰে। ইয়াৰ প্ৰত্যুত্তৰত বেটিং কৰিবলৈ নামি শ্ৰীলংকাই ৬টা উইকেট হেৰুৱাই ১৩৭ৰাণতে নিজৰ ইনিংছ সামৰে।
লগতে পঢ়ক: গুগলত নিৰাপদ আশ্ৰয় বিচাৰক; ইউক্ৰেইনত আৱদ্ধ ভাৰতীয়সকলক লুকাই থাকিবলৈ পৰামৰ্শ ভাৰতৰ
মেচখনত ভাৰতীয় অধিনায়ক ৰোহিত শৰ্মাই একাধিক অভিলেখ গঢ়িবলৈ সক্ষম হয়। টী-২০ ফৰ্মেটত বিশ্বৰ ভিতৰতে সৰ্বোচ্চ ৰাণৰ অধিকাৰী হয় ৰোহিত। এইক্ষেত্ৰত তেওঁ নিউজিলেণ্ডৰ মাৰ্টিন গুপ্তিল আৰু ভাৰতৰ পূৰ্বৰ অধিনায়ক বিৰাট কোহলিক অতিক্ৰম কৰে।
ৰোহিতে টী-২০ত ১২৩খন মেচ খেলি মুঠ ৩৩০৭ৰাণ সংগ্ৰহ কৰিছে। আনহাতে, ১২২খন মেচত গুপ্তিলৰ সংগ্ৰহ হৈছে ৩২৯৯ৰাণ। বিৰাট কোহলিয়ে ৯৭খন মেচ খেলি সংগ্ৰহ কৰিছে ৩২৯৬ৰাণ।
বৃহস্পতিবাৰে ৰোহিতে ৩২টা বল খেলি এটা ছয় আৰু দুটা চাৰিৰ সহায়ত ৪৪ৰাণ কৰে। ৰোহিত আৰু ঈষাণ কিষানে ইনিংছ মুকলি কৰি ১১১ৰাণ যোগ দিয়ে। আৰম্ভণিৰে পৰাই আক্ৰমণাত্মক খেল খেলে ঈষাণ কিষানে।
লগতে পঢ়ক: ৰাছিয়া-ইউক্ৰেইন যুদ্ধ: থমকি ৰৈছে নাটো! ইউক্ৰেইনলৈ সৈন্য প্ৰেৰণ নকৰাৰ সিদ্ধান্ত
ৰোহিত ব্যক্তিগত ৪৪ৰাণত আউট হোৱাৰ পিছত তিনি নম্বৰত বেটিং কৰিবলৈ নামে শ্ৰেয়াস আয়াৰ। শ্ৰেয়াসে ঈষাণৰ সৈতে ৪৪ৰাণৰ যুটী বান্ধে। ঈষাণ কিষানে ৫৬টা বলত ৮৯ৰাণৰ এক দমনীয় ইনিংছ খেলে। তেওঁ মুঠতে ১০টা চাৰি আৰু ৩টা ছয় কোবায়। শেষৰ পিনে কোবাবলৈ গৈ আউট হয় ঈষাণ। তেওঁ আউট হোৱাৰ সময়ত ভাৰতৰ ১৫৫ ৰাণ আছিল। পিছত শ্ৰেয়াস আয়াৰেও আক্ৰমণাত্মকভাৱে খেলি ভাৰতৰ ৰাণ ১৯৯লৈকে আগবঢ়াই নিয়ে।
ভাৰতৰ বিশাল ১৯৯ৰাণ অতিক্ৰম কৰাৰ লক্ষ্য লৈ বেটিং কৰিবলৈ নামি আৰম্ভণিৰে পৰা উইকেট হেৰুৱাবলৈ লয় শ্ৰীলংকাই। ভুৱনেশ্বৰ কুমাৰে শূন্য ৰাণতে নিছানকাক উভতাই পঠোৱাৰ পিছত কামিল মিছাৰাও ১৩ৰাণ কৰি ভুৱনেশ্বৰৰ চিকাৰ হয়। ব্যক্তিগত ১১ৰাণত পেভলিয়নমুখী হয় লিয়ানাগে।
শ্ৰীলংকাই ৩৬ৰাণতে ৩টা উইকেট হেৰুৱাই শলঠেকত পৰে। তাৰপিছতো দীনেশ চাণ্ডিমালক ১০ৰাণত জাডেজাই আউট কৰে। ছানাকাই মাত্ৰ ৩ৰাণ কৰিয়েই বিদায় লয়। কৰুনাৰত্নে ২১ৰাণ কৰি ভংকটেশ আয়াৰৰ বলত আউট হয়।
শ্ৰীলংকাৰ হৈ ছাৰিথ আছালংকাই অপৰাজিত ৫৩ৰাণ কৰে। শ্ৰীলংকাৰ ইনিংছৰ তেওঁৱেই আছিল সৰ্বাধিক ৰাণ সংগ্ৰহকাৰী।
ভাৰতৰ হৈ ভুৱনেশ্বৰ কুমাৰ আৰু ভেংকটেশ আয়াৰে দুটাকৈ উইকেট লয়। চাহাল আৰু ৰবীন্দ্ৰ জাডেজাই লাভ কৰে এটাকৈ উইকেট।