দেশত সৰ্বাধিক ভিক্ষাৰী কোনখন ৰাজ্যত আছে? বিগত লোকপিয়লৰ হিচাপ অনুসৰি দেশৰ ভিতৰতে সৰ্বাধিক ভিক্ষাৰী আছিল পশ্চিমবঙ্গত। কিন্তু পৰৱৰ্তী সময়ত কোনখন ৰাজ্যত কিমান ভিক্ষাৰী আছে, সেই হিচাপ আৰু পাবলৈ নাই। কিয়নো, আগন্তুক লোকপিয়লত ভিক্ষাবৃত্তিৰ সৈতে জড়িত লোকসকলৰ তথ্য পৃথকে সংগ্ৰহ কৰা নহ’ব। লোকপিয়লৰ প্ৰশ্নসূচীত ‘অৰ্থনৈতিকভাৱে সক্ৰিয় নোহোৱা কাৰ্যকলাপ’ (Non-Economic Activity)-ৰ তালিকাৰ পৰা ‘ভিক্ষাৰী আৰু অঘৰী’ (Beggars and vagrants) বিভাগটো এইবাৰ বাদ দিয়া হৈছে।
চৰকাৰী সূত্ৰৰ উদ্ধৃতিৰে ৰাষ্ট্ৰীয় সংবাদ মাধ্যম ‘টাইমছ অৱ ইণ্ডিয়া’ই প্ৰকাশ কৰা অনুসৰি, বিগত লোকপিয়লত এই বিভাগটোত অতি কম পৰিমাণৰ তথ্যহে লাভ কৰা গৈছিল। সেই কাৰণেই এইবাৰ এই সিদ্ধান্ত গ্ৰহণ কৰা হৈছে। পিআইবিৰ (PIB) তথ্য অনুসৰি, ২০১১ চনৰ লোকপিয়লত দেশত ৪ লাখৰো কিছু অধিক লোকক ভিক্ষাৰী আৰু বঘূৰে হিচাপে নথিবদ্ধ কৰা হৈছিল।
‘অন্যান্য’ বিভাগত কৰা হ’ব অন্তৰ্ভুক্ত
২০১১ চনৰ লোকপিয়ল বা তাৰ পূৰ্বৰ লোকপিয়লসমূহত ‘অৰ্থনৈতিকভাৱে সক্ৰিয় নোহোৱা কাৰ্যকলাপ’-ৰ তালিকাত শিক্ষাৰ্থী, পেঞ্চনভোগী, ঘৰুৱা কামত নিয়োজিত ব্যক্তি আৰু আনৰ ওপৰত নিৰ্ভৰশীল ব্যক্তিৰ সমান্তৰালকৈ ভিক্ষাৰী আৰু বঘূৰেসকলকো পৃথকে নথিবদ্ধ কৰা হৈছিল। নতুন নিয়ম অনুসৰি, এতিয়া তেওঁলোকক ‘অন্যান্য’ (Others) বিভাগৰ অন্তৰ্ভুক্ত কৰিহে গণনা কৰা হ’ব। ইয়াৰ ফলস্বৰূপে দেশত ভিক্ষাৰীৰ প্ৰকৃত সংখ্যা, তেওঁলোকৰ বয়স, তেওঁলোক কোনখন ৰাজ্যৰ বাসিন্দা বা তেওঁলোকৰ শিক্ষাগত অৰ্হতা কি— সেয়া লোকপিয়লৰ তথ্যত পৃথকে উল্লেখ নাথাকিব।
কিয় লোৱা হ‘ল এই সিদ্ধান্ত?
সূত্ৰৰ দাবী অনুসৰি, পূৰ্বৰ লোকপিয়লসমূহত ‘ভিক্ষাৰী আৰু অঘৰী’ বিভাগত লাভ কৰা সংখ্যাখিনিক নিৰ্ভৰযোগ্য তথ্য বুলি বিবেচিত কৰা হোৱা নাছিল। সমাজত ‘কলংকিত’ হোৱাৰ ভয়ত বা সামাজিক সংকোচনৰ বাবে বহুতেই নিজকে এই বিভাগত নথিবদ্ধ কৰিবলৈ অস্বীকাৰ কৰিছিল। কেৱল বিগত লোকপিয়লতেই নহয়, ১৯৯১ আৰু ২০০১ চনৰ লোকপিয়লতো এই বিষয়টোত আশানুৰূপ তথ্য পোৱা হোৱা নাছিল। পৰিসংখ্যা অনুসৰি, ১৯৯১ চনত প্ৰায় ৫.৪ লাখ আৰু ২০০১ চনত ৬.৩ লাখৰো অধিক লোকক এই বিভাগত নথিবদ্ধ কৰা হৈছিল। আনহাতে ২০১১ চনত এই সংখ্যা আছিল ৩.৮ লাখ।
২০১১ৰ লোকপিয়লত শীৰ্ষত থকা ৫ খন ৰাজ্য
যোৱা লোকপিয়লৰ তথ্য অনুসৰি, ভিক্ষাৰীৰ সংখ্যাৰ ফালৰ পৰা দেশৰ ভিতৰতে শীৰ্ষত আছিল পশ্চিমবঙ্গ। সেই সময়ৰ শীৰ্ষ ৫ খন ৰাজ্য আছিল ক্ৰমে পশ্চিমবঙ্গ, উত্তৰ প্ৰদেশ, অন্ধ্ৰ প্ৰদেশ, বিহাৰ আৰু মধ্য প্ৰদেশ। পৰিসংখ্যা অনুসৰি সেই সময়ত পশ্চিমবঙ্গত ৮১,২৪৪ জন, উত্তৰ প্ৰদেশত ৬৫,৮৩৫ জন, অন্ধ্ৰ প্ৰদেশত ৩০,২১৮ জন, বিহাৰত ২৯,৭২৩ জন আৰু মধ্য প্ৰদেশত ২৮,৬৯৫ জন ভিক্ষাৰী নথিবদ্ধ কৰা হৈছিল।
