ভাৰত বনাম ইংলেণ্ডৰ ছেমি ফাইনেল খেলখন শেষ অভাৰলৈকে উত্তেজনাপূৰ্ণ হৈ আছিল। ইংলেণ্ডক ছেমি ফাইনেলত পৰাস্ত কৰি ২০২৬ চনৰ টি-২০ বিশ্বকাপৰ ফাইনেলত প্ৰৱেশ কৰে সূৰ্যকুমাৰৰ দলটোৱে। দেওবাৰে আহমেদাবাদৰ নৰেন্দ্ৰ মোডী ষ্টেডিয়ামত অনুষ্ঠিত হ’বলগীয়া ফাইনেলত নিউজিলেণ্ডক পৰাস্ত কৰিলেই ভাৰতে একেৰাহে দুবাৰকৈ টি-২০ বিশ্বকাপ চেম্পিয়ন হোৱা বিশ্বৰ প্ৰথমখন দেশ হিচাপে ইতিহাস ৰচনা কৰিব।
ইংলেণ্ডৰ বিৰুদ্ধে ছেমি ফাইনেলত সূৰ্য কুমাৰ যাদৱৰ দলটোৱে চমকপ্ৰদ প্ৰদৰ্শন দাঙি ধৰিলে। ইংলেণ্ডৰ অধিনায়ক হেৰী ব্ৰুক’ৰ ভুলৰ বাবে তেওঁৰ দলটোৱে টছত জয়ী হৈও প্ৰথমে বলিং কৰাৰ সিদ্ধান্ত ল’লে, সঞ্জু চেমছনৰ সহজ কেচৰ পৰা আৰম্ভ কৰি – সকলোবোৰে ভাৰতক সুবিধা আনি দিলে।
ৱেষ্ট ইণ্ডিজৰ বিৰুদ্ধে ৯৭ ৰানৰ অপৰাজিত ইনিংছ খেলা সঞ্জুৱে এইবাৰো দুৰ্দান্ত খেল প্ৰদৰ্শন কৰে। তেওঁ ৮টা চাৰি আৰু ৭টা ছয়ৰে ৪২টা বলত ৮৯ ৰান সংগ্ৰহ কৰে। তেওঁ আৰম্ভণিৰে পৰা ইংলেণ্ডৰ বলাৰসকলক আক্ৰমণ কৰিছিল। তেওঁৰ লগত আছিল আক্ৰমণাত্মক ঈশান কিষাণ। কিন্তু অভিষেক শৰ্মাই ছেমি ফাইনেলতো অ’পেন কৰিবলৈ নামি ব্যৰ্থ হয়।
চাৰি নম্বৰ স্থানত নমা শিৱম ডুবেই ২৫টা বলত ৪৩ ৰান সংগ্ৰহ কৰে। সূৰ্যকুমাৰেও আশা কৰা ধৰণে ৰান কৰাত ব্যৰ্থ হয়। তেওঁ ৬টা বলত ১১ ৰান সংগ্ৰহ কৰি আউট হয়। কিন্তু তাৰ পাছতো ভাৰতৰ ৰান সংগ্ৰহৰ গতি বন্ধ নহ’ল। শেষ মুহূৰ্তত হাৰ্দিক পাণ্ডিয়াই ১২টা বলত ২৭ ৰান আৰু তিলক ভাৰ্মাই ৭ টা বলত ২১ ৰান সংগ্ৰহ কৰি ভাৰতৰ বাবে আৰু কিছু ৰান সংযোজন কৰে। ‘মেন ইন ব্লু’ দলটোৱে ২০ অভাৰৰ শেষত ৭ উইকেটত ২৫৩ ৰান সংগ্ৰহ কৰে।
এই হাই ভল্টেজ মেচৰ দিনটোত ইংলেণ্ডৰ বলাৰসকলে কাৰ্যতঃ নিয়ন্ত্ৰণ হেৰুৱাই পেলায়। জেকে ৪০ ৰানত ২ টা উইকেট আৰু ৰছিদে ৪১ ৰানত ২ টা উইকেট দখল কৰে যদিও বিশেষ প্ৰভাৱ পেলাব নোৱাৰিলে। আৰ্চাৰে ৬১ ৰানত ১ টা উইকেট দখল কৰে। আন বলাৰৰ প্ৰভাৱো সীমিত আছিল।
ইংলেণ্ডৰ বেটিঙত আধিপত্য বিস্তাৰ কৰে ২২ বছৰীয়া জেকব বেথেলে। আৰম্ভণিৰে পৰাই তেওঁ আক্ৰমণাত্মক আছিল। তেওঁ ৪৮টা বলত ১০৫ ৰান সংগ্ৰহ কৰে, য’ত ৮টা চাৰি আৰু ৭টা ছয় অন্তৰ্ভুক্ত। অৱশ্যে মেচখনত জয়ী হ’বলৈ তেওঁৰ প্ৰচেষ্টা যথেষ্ট নহ’ল। ভাৰতৰ ফিল্ডিং আৰু বলিং দুয়োটাই ইংলেণ্ডক চাপত পেলাইছিল। বিশেষকৈ অক্ষৰ পেটেল, আৰ্শদীপ সিং আৰু তিলক ভাৰ্মাৰ কেচ-ফিল্ডিঙে দলটোক সকাহ দিয়ে।
ইংলেণ্ডে ৭ উইকেটত ২৪৬ ৰান সংগ্ৰহ কৰে যদিও ভাৰতে নিৰ্ধাৰিত কৰি দিয়া ২৫৪ ৰানৰ লক্ষ্য পূৰণ কৰিব নোৱাৰিলে। ভাৰতীয় বেটছমেনে আৰম্ভণিৰে পৰাই আক্রমণ কৰি মেচখনৰ প্রতিটো মুহূর্ততে চাপ অব্যাহত ৰাখিছিল, যাৰ ফলত ফাইনেলত প্রৱেশ কৰাটো সহজ হৈ পৰিছিল৷ সঞ্জু চেমছনৰ কথাতো ক’বই নালাগে। ছেমি ফাইনেলত জয়লাভ কৰাৰ পাছত এতিয়া দেওবাৰে টি-২০ বিশ্বকাপ ২০২৬ৰ ফাইনেলত ভাৰতে নিউজিলেণ্ডৰ বিৰুদ্ধে খেলিব।
সঞ্জু চেমছন, ঈশান কিষাণ আৰু শিৱম ডুবেৰ ত্ৰিমূৰ্তিয়ে ভাৰতীয় বেটিঙৰ প্ৰাণ সঞ্চাৰ কৰিছে। তেওঁলোকৰ আক্ৰমণাত্মক খেলৰ শৈলীয়ে ফাইনেলৰ বাবে দলটোৰ আত্মবিশ্বাস বৃদ্ধি কৰিছে। শেষত ক’ব পাৰি যে ইংলেণ্ডৰ ভুল আৰু ভাৰতৰ ধাৰাবাহিক আক্ৰমণে ভাৰতক ছেমি ফাইনেলত জয়ী কৰালে।
