পাকিস্তান সীমান্তত আকাশ দখল কৰি বৃহৎ যুদ্ধ অনুশীলন চলাব ভাৰতে, জাৰি নোটাম

পাকিস্তানৰ আকাশমাৰ্গৰ ঠিক কাষতে ভাৰতে যুদ্ধ অনুশীলন চলাব। হয়, ভাৰতীয় বায়ুসেনাই পশ্চিম ৰাজস্থানৰ আকাশত এক বৃহৎ যুদ্ধ অনুশীলন কৰিবলৈ ওলাইছে। তাৰ বাবে NOTAM জাৰি কৰা হৈছে।

জানিব পৰা মতে, ভাৰতীয় বায়ুসেনাই ২১ ছেপ্টেম্বৰৰ পৰা ৭ অক্টোবৰলৈ জয়ছালমেৰ, ফালোডী, বিকানেৰ আৰু যোধপুৰৰ নিকটৱৰ্তী আকাশ সুৰক্ষিত কৰাটো নিশ্চিত কৰিছে।

আটাইতকৈ তাৎপৰ্যপূৰ্ণ কথাটো হ’ল ভাৰতে যুদ্ধ অনুশীলন কৰিবলৈ যোৱা অংশটো পাকিস্তানৰ পৰা অৰ্থাৎ আন্তঃৰাষ্ট্ৰীয় সীমান্তৰ পৰা মাত্ৰ ২০ কিলোমিটাৰ দূৰত।

ভাৰতীয় বায়ুসেনাৰ পৰা পোৱা তথ্য অনুসৰি অহা ২১ ছেপ্টেম্বৰৰ পৰা অনুষ্ঠিত হ’বলগীয়া বিশেষ যুদ্ধ অনুশীলন আকাশৰ ৪০ হাজাৰ ফুট উচ্চতাত অনুষ্ঠিত হ’ব।

জনা গৈছে যে বায়ুসেনাই দিনটোৰ বিভিন্ন সময়ত পৰ্যায়ক্ৰমে এই অনুশীলনৰ আয়োজন কৰিব। কোৱা বাহুল্য যে এইবাৰ ভাৰতীয় বায়ুসেনাৰ এই অনুশীলন পূৰ্বৰ যুদ্ধ অনুশীলনতকৈ দীঘলীয়া আৰু বৃহৎ হ’ব।

জানিব পৰা মতে, যিহেতু যোৱা বছৰৰ পৰা ভাৰত আৰু পাকিস্তানে ইটোৱে সিটোৰ আকাশমাৰ্গৰ ওপৰেৰে বিমান উৰণত সম্পূৰ্ণৰূপে নিষেধাজ্ঞা আৰোপ কৰি ৰাখিছে, সেয়েহে পাকিস্তান সীমান্তৰ ঠিক কাষতে ভৱিষ্যতৰ যুদ্ধৰ কথা মনত ৰাখি ভাৰতীয় বায়ুসেনাই এই বৃহৎ সামৰিক অনুশীলনৰ আয়োজন কৰিবলৈ ওলাইছে।

অৱশ্যে উল্লেখ কৰিব লাগিব যে এই বৃহৎ সামৰিক অনুশীলনৰ পূৰ্বে ৯ ছেপ্টেম্বৰৰ পৰা ২১ ছেপ্টেম্বৰলৈ যোধপুৰ বিমান ঘাটিত ভাৰত-জাপানৰ যৌথ অনুশীলন বীৰ গাৰ্ডিয়ান ২৬ অনুষ্ঠিত হ’ব।

খবৰ অনুসৰি জাপান এয়াৰ ছেল্ফ ডিফেঞ্চ ফোৰ্চে এই অনুশীলনৰ বাবে তিনিখন এফ টু এ যুদ্ধ বিমান আৰু ১১০ জন জোৱান নিয়োগ কৰিব। ভাৰতীয় বিমান ঘাটিৰ পৰা জাপানৰ যুদ্ধ বিমানে প্ৰথমবাৰৰ বাবে উৰা মাৰি ভাৰতীয় সামৰিক অনুশীলনৰ প্ৰশিক্ষণ চলাব।

A NOTAM has been issued from september 21 to october 7 covering Jaisalmer – barmer- phalodi-jodhpur sector , NAL-bikaner is also blocked .

According to sources from CNN-News 18 the security apparatus of pakistan is worried and convened an urgent defence meeting about the Indian… pic.twitter.com/5aqZr2iPiY

— Nightmare (@Nightshade00077) September 3, 2026

এই সকলোবোৰ যোধপুৰ আৰু ইয়াৰ আশে-পাশে থকা অঞ্চলত কৰা হ’ব। আৰু এই প্ৰশিক্ষণ পৰ্যায় শেষ হ’লেই ২১ ছেপ্টেম্বৰৰ পৰা মূল অনুশীলন আৰম্ভ হ’ব। আচলতে পাকিস্তান সীমান্তৰ ঠিক কাষতে ভাৰতীয় বায়ুসেনাৰ এই অনুশীলন নিয়মীয়া প্ৰস্তুতিৰ অংশ যদিও ভৌগোলিক দিশৰ পৰা ই যথেষ্ট তাৎপৰ্যপূৰ্ণ।