কোনো ডাঙৰ ঘটনা নঘটিলে ৱেষ্ট ইণ্ডিজৰ বিৰুদ্ধে প্ৰথমখন টেষ্ট তিনিদিনতেই শেষ হ’বলৈ আগবাঢ়িছে। টেষ্টখনত জয়ৰ দিশে আগবাঢ়িছে ভাৰত। আৰু সেইটোও ইনিংছ ব্যৱধানত।
গুজৰাটৰ নৰেন্দ্ৰ মোডী ষ্টেডিয়ামত তৃতীয় দিনা মধ্যাহ্ন ভোজন বিৰতিলৈকে ৱেষ্ট ইণ্ডিজৰ ৰান ৫ উইকেটত ৬৬ ৰান। এতিয়াও ২২০ ৰানত পিছ পৰি আছে দলটো। তিনিটা উইকেট দখল কৰিছে ৰবীন্দ্ৰ জাদেজাই। জাষ্টিন গ্ৰীভছৰ দলটোৱে যে বহু সময়লৈ প্ৰতিৰোধ বজাই ৰাখিব পাৰিব সেয়া আশা কৰিব নোৱাৰি।
প্ৰায় একপক্ষীয় হৈছে মেচখন। য’ত ভাৰতৰ আধিপত্যৰ সন্মুখত ক্ৰিকেট জগতৰ এসময়ৰ দুৰ্দান্ত দল ৱেষ্ট ইণ্ডিজ অস্বস্তিকৰ পৰিস্থিতিত। প্ৰথম ইনিংছত সংগ্ৰহ কৰে মাত্ৰ ১৬২ ৰান।
ইয়াৰ প্ৰত্যুত্তৰত প্ৰথম ইনিংছত ভাৰতৰ ৰান দ্বিতীয় দিনৰ শেষত ৫ উইকেটত ৪৪৮ ৰান হয়। ২৮৬ ৰানত আগবাঢ়ি আছিল টিম ইণ্ডিয়া। কে এল ৰাহুল আৰু ধ্ৰুৱ জুৰেলৰ পিছত ৰবীন্দ্ৰ জাদেজাইও শতক অৰ্জন কৰে।
তৃতীয় দিনৰ আৰম্ভণিতে ভাৰতৰ অধিনায়ক শুভমন গিলে ইনিংছ ঘোষণা কৰে। ভাৰতৰ বিজয়ৰ ওপৰত কোনো সন্দেহ নাছিল। প্ৰশ্ন হৈছিল, কিমান দিনত সম্ভৱ হ’ব। পৰিস্থিতিৰ প্ৰতি লক্ষ্য ৰাখি ক’ব পাৰি যে গোটেই তৃতীয় দিনটো নালাগিবও পাৰে।
প্ৰথম ইনিংছত যদি পেচাৰসকল ভয়ংকৰ আছিল, তেন্তে দ্বিতীয় ইনিংছত স্পিনাৰসকলে যাদু দেখুৱালে। পিটচখনত ‘মাৰ্ক’ হৈ ৰৈছে। ৰঙা মাটিৰ এটা নিৰ্দিষ্ট স্থানত বলটো পৰিলেই ই বহুত স্পীন কৰে। যিটো কেৰিবিয়ানৰ বাবে সম্পূৰ্ণ বুজিব নোৱাৰা অৱস্থা। সেই সুযোগতে জাদেজাই তিনিটা উইকেট দখল কৰে। খেলপথাৰৰ অৱস্থা, জাডেজাৰ ঘূৰ্ণী আৰু ৱেষ্ট ইণ্ডিজৰ বেটছমেনৰ দুৰ্দশালৈ চাই এনে লাগে যেন যিকোনো মুহূৰ্ততে আৰু এটা উইকেট পৰিব পাৰে।
