বৃহস্পতিবাৰে এজনী ১৪ বছৰীয়া ৰহিঙীয়া মুছলিম ছোৱালীক ম্যানমাৰলৈ ঘূৰাই পঠাবলৈ উত্তৰ পূবৰ এখন সীমামূৰীয়া চহৰলৈ লৈ যোৱা হয়।
আৰক্ষী সূত্ৰই এই কথা জনাইছে।
আনহাতে, ৰাষ্ট্ৰসংঘৰ শৰণাৰ্থী আয়োগ আৰু মানৱ অধিকাৰবাদী সংগঠনসমূহে ভাৰত চৰকাৰৰ এই সিদ্ধান্তৰ ওপৰত আপত্তি প্ৰদৰ্শন কৰিছে।
উল্লেখযোগ্য ম্যানমাৰত নাগৰিকত্ব নাপাই প্ৰায় দহ হাজাৰ ৰহিঙীয়া মুছলমান ভাৰতত বাস কৰি আছে, নৰেন্দ্ৰ মোডী চৰকাৰে ম্যানমাৰৰ এই সংখ্যালঘু লোকসকলক ভাৰতৰ সুৰক্ষাজনিত কাৰণত ম্যানমাৰলৈ উভতাই পঠোৱাৰ ব্যৱস্থা কৰিছে।
মণিপুৰৰ এখন সীমান্তমূৰীয়া অঞ্চললৈ ১৪ বছৰীয়া ছোৱালীজনীক আৰক্ষীয়ে লৈ গৈছে।
ছোৱালীজনীক ম্যানমাৰলৈ পঠাবলৈ ইতিমধ্যে প্ৰয়োজনীয় কাম-কাজ হৈ গৈছে।
ছোৱালীজনীয়ে প্ৰায় এবছৰ ধৰি অসমত বাস কৰি আছিল।
তাইৰ পৰিয়ালে বাংলাদেশৰ কক্স বাজাৰত শৰণাৰ্থী বিচাপে বাস কৰি আছে।
নিবেদিতা নাৰী সংস্থা নামৰ এনজিঅ’টোৱে ভাৰত চৰকাৰে ছোৱালীজনীৰ ওপৰত লোৱা সিদ্ধান্তৰ প্ৰতিক্ৰিয়া প্ৰকাশ কৰিছে।
শিলচৰস্থিত এনজিঅ’টোৱে ছোৱালীজনীক চোৱা-চিতা কৰি আছিল।
এনজিঅ’টোৰ প্ৰতিষ্ঠাপক দিবা ৰয়ে কয় যে ম্যানমাৰত ছোৱালীজনীৰ পৰিয়াল নাই যদিও তাইক তালৈ পঠাই দিয়া হৈছে।
ভাৰতৰ বৈদেশিক আৰু গৃহ মন্ত্ৰালয়ে এনজিঅ’টোৰ এই প্ৰতিক্ৰিয়াৰ কোনো প্ৰত্যুত্তৰ প্ৰকাশ কৰা নাই।
আনহাতে, ৰাষ্ট্ৰসংঘৰ শৰণাৰ্থী আয়োগ ইউ.এন.এইচ.চি.আৰ.-এ ভাৰত চৰকাৰৰ এই সিদ্ধান্তৰ প্ৰতিবাদ কৰিছে।
আয়োগৰ মুখপাত্ৰই কয় যে ম্যানমাৰৰ পৰিস্থিত এতিয়াও সুৰক্ষিত হোৱা নাই, সেয়ে ছোৱালীজনীক তালৈ উভতাই পঠালে তাই গভীৰ বিপদৰ সম্মুখিন হ’ব পাৰে।
