দক্ষিণ আফ্ৰিকাৰ বিৰুদ্ধে চলিত টেষ্ট শৃংখলাৰ দ্বিতীয় টেষ্টৰ পূৰ্বে মোক্ষম আঘাত ভাৰতীয় শিবিৰত। আঘাতৰ বাবে দ্বিতীয় টেষ্টৰ পৰা বাহিৰ হৈছে ভাৰতীয় অধিনায়ক বিৰাট কোহলী।
পিঠিৰ বিষৰ বাবে কোহলীয়ে মেচখনৰ পৰা বাহিৰ হয় বুলি জানিব পৰা গৈছে। আনহাতে কোহলীৰ অনুপস্থিতিত প্ৰথমবাৰৰ বাবে ভাৰতীয় টেষ্ট দলৰ নেতৃত্ব দিছে দলৰ অপেনিং বেটাৰ কে এল ৰাহুলে।
দ্বিতীয় টেষ্টৰ বাবে দলত কোহলীৰ স্থানত হনুমা বিহাৰীক অন্তৰ্ভূক্ত কৰা হৈছে।
ইতিমধ্যে টছত জয়ী হৈ ভাৰতে প্ৰথমে বেটিং কৰাৰ সিদ্ধান্ত লয়। বৰ্তমানলৈকে ভাৰতীয় ইনিংছত ১৬ ৰান যোগ হৈছে। ৰাহুলে ১ ৰান আৰু মায়াংক আগৰৱালে ১৪ ৰান কৰি বেটিং কৰি আছে।
উল্লেখ্য যে ভাৰতীয় দল বৰ্তমানলৈকে জোহান্সবাৰ্গত এখন টেষ্টতো পৰাজিত হোৱা নাই। জোহান্সবাৰ্গত অংশ লোৱা পাঁচখন মেচৰ দুখনত জয়ী হোৱাৰ বিপৰীতে তিনিখন খেল ড্ৰ ৰাখিছে ভাৰতে।
ভাৰতে ইতিমধ্যে প্ৰথমখন টেষ্টত ১১৩ ৰানত জয় সাব্যস্ত কৰি শৃংখলাত ১-০ ৰ অগ্ৰগতি লাভ কৰিছে।