কলম্বোত অনুষ্ঠিত ২০২৬ চনৰ আইচিচি টি-২০ বিশ্বকাপৰ এক উত্তেজনা পূৰ্ণ মেচত আজি ক্ৰিকেট বিশ্বই কেৱল বেট-বলৰ যুঁজৰ লগতে প্ৰত্যক্ষ কৰিছে তীব্ৰ কূটনৈতিক উত্তেজনাও । ভাৰত আৰু পাকিস্তানৰ মাজৰ এই মেচখনত টছৰ সময়ত দুই অধিনায়কে কৰমৰ্দন নকৰাৰ ঘটনাই বৰ্তমান তীব্ৰ চৰ্চা লাভ কৰিছে।
কলম্বোৰ আৰ প্ৰেমদাসা ষ্টেডিয়ামত অনুষ্ঠিত মেচখনত পাকিস্তানৰ অধিনায়ক ছলমান আলী আঘাই টছত জয়লাভ কৰি প্ৰথমে বলিং কৰাৰ সিদ্ধান্ত লয়। পাকিস্তানৰ দলত কোনো সালসলনি কৰা হোৱা নাই যদিও ভাৰতীয় দলত দুটা গুৰুত্বপূৰ্ণ পৰিৱৰ্তন কৰা হৈছে। সঞ্জু চেমছনৰ ঠাইত অভিষেক শৰ্মা আৰু আৰ্শদীপ সিঙৰ পৰিৱৰ্তে স্পিনাৰ কুলদীপ যাদৱক চূড়ান্ত একাদশত স্থান দিয়া হৈছে।
খেলপথাৰত দুই অধিনায়ক সূৰ্যকুমাৰ যাদৱ আৰু ছলমান আলী আঘাই টছৰ সময়ত পৰম্পৰাগত কৰমৰ্দনৰ পৰা বিৰত থাকে। ৰাজনৈতিক উত্তেজনাৰ প্ৰেক্ষাপটত দুই দেশৰ খেলুৱৈৰ মাজত এনে আচৰণ আইচিচিৰ কোনো ইভেণ্টত সম্ভৱত প্ৰথমবাৰৰ বাবে দেখা গৈছে। এছিয়া কাপৰ সময়ত পহলগাম হত্যাকাণ্ড আৰু ‘অপাৰেশ্যন সেন্দূৰ’ৰ পাছত সৃষ্টি হোৱা তীব্ৰ উত্তেজনাৰ পৰাই এই ‘কৰমৰ্দন বিতৰ্ক’ৰ সূত্ৰপাত হৈছিল। সেই সময়তো সূৰ্যকুমাৰ যাদৱে পাকিস্তানী অধিনায়কৰ সৈতে হাত মিলাবলৈ অস্বীকাৰ কৰিছিল।
মেচৰ পূৰ্বে অনুষ্ঠিত সংবাদমেলতো এই বিষয়টোৱে বিশেষ গুৰুত্ব লাভ কৰিছিল। কৰমৰ্দন কৰিব নে নাই বুলি সোধা প্ৰশ্নৰ উত্তৰত সূৰ্যকুমাৰ যাদৱে ৰহস্য বজাই ৰাখি কৈছিল, “২৪ ঘণ্টা অপেক্ষা কৰক আৰু চাওক।” আনহাতে, পাকিস্তানৰ অধিনায়ক ছলমান আঘাই কূটনৈতিক উত্তৰ দি কয় যে হাত মিলোৱা বা নিমিলোৱাটো ভাৰতীয় দলৰ সিদ্ধান্তৰ ওপৰত নিৰ্ভৰ কৰিব।
লাহোৰত অনুষ্ঠিত দুই দেশৰ ক্ৰিকেট বোৰ্ডৰ বৈঠকত প্ৰতীকী কৰমৰ্দনৰ প্ৰস্তাৱ দিয়া হৈছিল যদিও পাছলৈ তাক নাকচ কৰা হয়। ক্ৰিকেট খেলপথাৰৰ এই শীতল যুদ্ধই এতিয়া স্পষ্ট কৰি দিছে যে দুই দেশৰ ৰাজনৈতিক শত্ৰুতাৰ প্ৰভাৱ ক্ৰিকেটৰ পৰম্পৰাগত সৌজন্যতাৰ ওপৰতো পৰিছে।
