ভাৰত চৰকাৰে ঔষধ, পেট্ৰ’কেমিকেল আৰু সাৰ উদ্যোগৰ বিকাশৰ বাবে বাজেটত বৃহৎ পৰিমাণৰ ধন আৱণ্টন কৰিছে যদিও এই পুঁজিৰ সঠিক আৰু সম্পূৰ্ণ ব্যৱহাৰ হোৱা নাই বুলি শেহতীয়াকৈ সংসদৰ ৰাসায়নিক আৰু সাৰ বিভাগৰ স্থায়ী সমিতিয়ে এক প্ৰতিবেদনত গভীৰ উদ্বেগ প্ৰকাশ কৰিছে। সংসদৰ মজিয়াত দাখিল কৰা এই প্ৰতিবেদন অনুসৰি, ঘৰুৱা উৎপাদন বৃদ্ধি আৰু আমদানিৰ নিৰ্ভৰশীলতা হ্ৰাস কৰাৰ লক্ষ্যৰে পুঁজি বৃদ্ধি কৰা হৈছিল যদিও প্ৰশাসনিক লেহেমীয়া গতিৰ বাবে এই ধন অব্যৱহৃত হৈ ৰৈছে।
ঔষধ খণ্ডৰ সন্দৰ্ভত দাখিল কৰা প্ৰতিবেদনত উল্লেখ কৰা অনুসৰি, ২০২২-২৩ বৰ্ষৰ ২,২৪৪.১৫ কোটি টকাৰ বিপৰীতে ২০২৫-২৬ বৰ্ষত বাজেটৰ আৱণ্টন ৬,৯২০.২০ কোটি টকালৈ বৃদ্ধি কৰা হৈছিল। পিছে আৱণ্টিত ধনৰ প্ৰায় ১৫ৰ পৰা ১৭ শতাংশ ধন পুনৰীক্ষণ পৰ্যায়ত কৰ্তন কৰিবলগীয়া হয়। বিভাগীয় কৰ্তৃপক্ষই জানিবলৈ দিয়া মতে, আন্তঃগাঁথনি প্ৰকল্পসমূহ সময়মতে আগনবাঢ়া, আইনী অনুমতি লাভৰ ক্ষেত্ৰত হোৱা পলম আৰু ‘প্ৰডাকচন-লিংকড ইনচেণ্টিভ’ তথা ‘বাল্ক ড্ৰাগ পাৰ্ক’ আঁচনিসমূহৰ লেহেমীয়া ৰূপায়ণৰ বাবেই এই ধন খৰচ কৰাত বাধাৰ সৃষ্টি হৈছে। আনহাতে, ৰাসায়নিক আৰু পেট্ৰ’কেমিকেল খণ্ডৰ বাবে ২০২৬-২৭ বৰ্ষত বিভাগে ১৯৯.৭৬ কোটি টকাৰ প্ৰস্তাৱ দিছিল যদিও বিত্ত মন্ত্ৰালয়ৰ পৰীক্ষণৰ পিছত সেয়া ১৮৫.৭২ কোটি টকালৈ হ্ৰাস পায়।
সাৰ খণ্ডৰ ক্ষেত্ৰতো একেই প্ৰতিচ্ছবি দেখিবলৈ পোৱা গৈছে। প্ৰতিবেদনখনত উল্লেখ কৰা অনুসৰি, দেশত ইউৰিয়াৰ উৎপাদন ২০১৮-১৯ বৰ্ষৰ ২৩৯ লাখ মেট্ৰিক টনৰ পৰা ২০২৪-২৫ বৰ্ষত ৩০৭ লাখ মেট্ৰিক টনলৈ বৃদ্ধি পাইছে আৰু ফছফেটিক তথা পটাছিক সাৰৰ উৎপাদনো ১৭৫ৰ পৰা ২১৪ লাখ মেট্ৰিক টনলৈ বৃদ্ধি পাইছে। তথাপিও, মূল কেঁচামালৰ বাবে উদ্যোগটো এতিয়াও আমদানিৰ ওপৰতে নিৰ্ভৰশীল হৈ আছে আৰু সামগ্ৰীৰ মূল্য নিৰ্ধাৰণ তথা বিতৰণ ব্যৱস্থাটো ৰাজসাহায্যৰ ওপৰতে কেন্দ্ৰীভূত হৈ আছে।
