আহমেদাবাদত সংঘটিত হোৱা এয়াৰ ইণ্ডিয়াৰ শোকাৱহ বিমান দুৰ্ঘটনাৰ তদন্তক লৈ সম্প্ৰতি এক উত্তপ্ত পৰিস্থিতিৰ সৃষ্টি হৈছে। শেহতীয়াকৈ ইটালীৰ এখন আগশাৰীৰ দৈনিক কাকত ক’ৰিয়েৰ ডেলা চেৰাত প্ৰকাশিত এটা বিস্ফোৰক প্ৰতিবেদনত দাবী কৰা হৈছিল যে এই দুৰ্ঘটনাটো কোনো যান্ত্ৰিক বিজুতি নাছিল, বৰঞ্চ পাইলটে ইচ্ছাকৃতভাৱে বিমানখনৰ ইন্ধনৰ চুইচ বন্ধ কৰি দিছিল। ইয়াৰ ফলতেই বিমানখন দুৰ্ঘটনাগ্ৰস্ত হৈছিল বুলি কাকতখনত উল্লেখ কৰা হৈছিল। ইটালীয় সংবাদ মাধ্যমটোৱে আনকি এইটোও দাবী কৰিছিল যে ভাৰতীয় তদন্তকাৰীসকলৰ তথ্যৰ ওপৰত ভিত্তি কৰিহে তেওঁলোকে এই প্ৰতিবেদন প্ৰস্তুত কৰিছে। এই খবৰটো প্ৰকাশ পোৱাৰ লগে লগে দেশজুৰি তীব্ৰ চাঞ্চল্যৰ সৃষ্টি হয়।
অৱশ্যে ভাৰত চৰকাৰৰ বিমান দুৰ্ঘটনা অনুসন্ধান ব্যুৰোৱে ইটালীৰ এই প্ৰতিবেদনক সম্পূৰ্ণৰূপে ভিত্তিহীন আৰু কাল্পনিক বুলি অভিহিত কৰি খাৰিজ কৰিছে। বৃহস্পতিবাৰে সংস্থাটোৱে স্পষ্ট কৰি দিয়ে যে এই বাতৰিটো সত্য নহয় আৰু এনেধৰণৰ উৰাবাতৰিয়ে জনসাধাৰণৰ মাজত অযথা আতংকৰ সৃষ্টি কৰে। এএআইবিয়ে জনোৱা মতে বিমান দুৰ্ঘটনাৰ তদন্ত এতিয়াও শেষ হোৱা নাই আৰু সকলো দিশ অতি সূক্ষ্মভাৱে পৰীক্ষা কৰি থকা হৈছে। গতিকে তদন্ত সম্পূৰ্ণ নোহোৱাকৈ কোনো এটা পক্ষক দোষাৰোপ কৰাটো অনুচিত।
মন কৰিবলগীয়া যে আহমেদাবাদৰ এই ভয়ংকৰ দুৰ্ঘটনাটোত ২০০ৰো অধিক লোকে প্ৰাণ হেৰুৱাইছিল। ইটালীৰ প্ৰতিবেদনখনত পাইলট সুমিত সভাৰৱালক এই বৃহৎ বিপৰ্যয়ৰ বাবে জগৰীয়া কৰা হৈছিল। যদিও চৰকাৰীভাৱে এই দাবী নাকচ কৰা হৈছে, তথাপিও সংস্থাটোৰ প্ৰাৰম্ভিক তদন্তত এটা বিশেষ কথা চৰ্চালৈ আহিছিল। জানিব পৰা মতে, ইঞ্জিন বন্ধ হোৱাৰ ঠিক আগতে এজন পাইলটে আনজনক ইঞ্জিনটো কিয় বন্ধ কৰিলে বুলি প্ৰশ্ন কৰিছিল আৰু আনজনে তাৰ উত্তৰত একো কৰা নাই বুলি জনাইছিল। এএআইবিয়ে এতিয়া কৈছে যে তদন্তৰ মূল উদ্দেশ্য কাৰোবাক দোষী সাব্যস্ত কৰা নহয়, বৰঞ্চ দুৰ্ঘটনাৰ প্ৰকৃত কাৰণ বিচাৰি উলিয়াই ভৱিষ্যতে সুৰক্ষা ব্যৱস্থা অধিক উন্নত কৰাহে।
আনহাতে পাইলট সুমিত সভাৰৱালৰ ৮৮ বছৰীয়া পিতৃ পুষ্কৰাজ সভাৰৱালে নিজৰ পুত্ৰৰ ওপৰত লগোৱা অভিযোগৰ বিৰুদ্ধে উচ্চতম ন্যায়ালয়ৰ দ্বাৰস্থ হৈছিল। উচ্চতম ন্যায়ালয়েও তেওঁক আশ্বাস দি জনাইছিল যে সঠিক প্ৰমাণ নোহোৱাকৈ কোনেও তেওঁৰ পুত্ৰক জগৰীয়া কৰিব নোৱাৰে। এই ঘটনাৰ পিছতে এতিয়া প্ৰশ্ন উঠিছে যে এএআইবিয়ে নিজৰ পূৰ্বৰ তদন্তৰ দিশ সলনি কৰি পাইলটজনক সুৰক্ষা দিবলৈ বিচাৰিছে নেকি। সমগ্ৰ দেশবাসীয়ে এতিয়া এই স্পৰ্শকাতৰ দুৰ্ঘটনাটোৰ চূড়ান্ত তদন্তৰ প্ৰতিবেদনলৈ অপেক্ষা কৰিছে।
