ভাৰতীয় ক্ৰিকেট দলৰ তাৰকা বলাৰ যশপ্ৰীত বুমৰাহ আজি সমগ্ৰ বিশ্বৰ বাবে এক বিস্ময়ৰ নাম। টি-২০ বিশ্বকাপৰ ছেমি ফাইনেলত ইংলেণ্ডৰ বিৰুদ্ধে তেওঁৰ যাদুকৰীপ্ৰদৰ্শনে পুনৰ এবাৰ প্ৰমাণ কৰিলে যে তেওঁ বৰ্তমান সময়ৰ শ্ৰেষ্ঠ বলাৰ। কিন্তু এই বুমৰাহক আজিৰ এই পৰ্যায়লৈ অনাৰ আঁৰত আছে এগৰাকী ব্যক্তিৰ কঠোৰ পৰিশ্ৰম আৰু দূৰদৰ্শী সিদ্ধান্ত। তেওঁ হ’ল আহমেদাবাদৰ কিশোৰ ত্ৰিৱেদী। ৭৯ বছৰীয়া এই প্ৰশিক্ষকগৰাকীয়েই আছিল সেই প্ৰথম ব্যক্তি, যিয়ে ১৬ বছৰ বয়সতে বুমৰাহৰ মাজত লুকাই থকা প্ৰতিভাক চিনি পাইছিল আৰু তেওঁক সঠিক পথ প্ৰদৰ্শন কৰিছিল।
আহমেদাবাদৰ এক সাধাৰণ ক্ৰিকেট একাডেমীৰ পৰা আৰম্ভ হোৱা বুমৰাহৰ যাত্ৰা মুঠেই সহজ নাছিল। সেই সময়ত বুমৰাহৰ বোলিং শৈলী আছিল অত্যন্ত ব্যতিক্ৰমী আৰু বহুতে তেওঁক ‘চ’কাৰ’ বুলি উপলুঙা কৰিছিল। বহু প্ৰশিক্ষকে হয়তো বুমৰাহৰ এই আচৰিত বোলিং এক্সন সলনি কৰিবলৈ চেষ্টা কৰিলেহেঁতেন, কিন্তু কিশোৰ ত্ৰিৱেদীয়ে তেনে নকৰিলে। তেওঁ অনুভৱ কৰিছিল যে বুমৰাহৰ হাতৰ বিশেষ ধৰণৰ হাইপাৰ এক্সটেনচন আৰু অদ্ভুত ব’লিং এংগেলটোৱেই তেওঁৰ আচল শক্তি। তেওঁ বুমৰাহক সেই শৈলী সলনি কৰিবলৈ নিদি বৰঞ্চ ইয়াক কেনেকৈ আৰু অধিক মাৰাত্মক কৰি তুলিব পাৰি, তাৰ প্ৰশিক্ষণ দিলে।
কিশোৰ ত্ৰিৱেদীয়ে কেৱল বোলিংৰ প্ৰশিক্ষণেই দিয়া নাছিল, বৰঞ্চ তেওঁ বুমৰাহক শৃংখলাবদ্ধ হ’বলৈও শিকাইছিল। ১৬ বছৰ বয়সত বুমৰাহ অত্যন্ত চঞ্চল আছিল, এদিন অনুশীলন কৰিলে তিনিদিন অনুপস্থিত থাকে। ত্ৰিৱেদীয়ে তেওঁৰ মাকৰ পৰা তিনি বছৰৰ বাবে বুমৰাহৰ দায়িত্ব নিজৰ হাতলৈ লৈছিল আৰু তেওঁক কঠোৰ অনুশাসনৰ মাজেৰে আগবঢ়াই নিছিল। একাডেমীত দেৰি কৰি অহা বা প্ৰশিক্ষণৰ প্ৰতি আওকৰা কৰিলে তেওঁক শাস্তিও দিছিল। ইয়াৰ ফলতেই বুমৰাহে ক্ৰিকেটৰ প্ৰতি গুৰুত্ব দিবলৈ আৰম্ভ কৰে আৰু নিজৰ ভুলবোৰ শুধৰাই লয়।
আজি বুমৰাহে ইংলেণ্ডৰ শক্তিশালী বেটাৰসকলক যিদৰে নিজৰ য়ৰকাৰ, কাটাৰ আৰু স্লোৱাৰ বলৰে আচৰিত কৰি পেলাইছে, তাৰ সকলো শিক্ষা কিশোৰ ত্ৰিৱেদীৰ সেই প্ৰাৰম্ভিক দিনবোৰৰ পৰাই অহা। প্ৰশিক্ষকগৰাকীয়ে তেওঁক শিকাইছিল কেনেকৈ বেটাৰৰ মন পঢ়িব লাগে আৰু পৰিস্থিতি অনুযায়ী বলিং কৰিব লাগে। আজি ৭৫ বছৰ অতিক্ৰম কৰা কিশোৰ ত্ৰিৱেদীয়ে প্ৰতিদিনেই নিজৰ সেই সাধাৰণ খেলপথাৰত নতুন প্ৰজন্মক প্ৰশিক্ষণ দিয়ে। তেওঁৰ একমাত্ৰ আশা, ব্যস্ততাৰ মাজতো তেওঁৰ এই আটাইতকৈ সফল ছাত্ৰজনে হয়তো কোনোবা এদিন পুনৰ সেই পুৰণি একাডেমীখনলৈ ঘূৰি আহিব।
