‘হৰমুজ সন্মিলন’লৈ আমন্ত্ৰিত হৈছে ভাৰত। ব্ৰিটেইনে ভাৰতক আমন্ত্ৰণ জনাইছে। হৰমুজ প্ৰণালী মুকলি কৰি ৰাখিবলৈ আৰু ইয়াৰ মাজেৰে স্বাভাৱিক জাহাজ চলাচলৰ অনুমতি দিবলৈ ৩৫খন দেশৰ এখন বিশেষ সন্মিলন অনুষ্ঠিত হ’ব। ভাৰতেও সেই সন্মিলনত যোগদান কৰিবলৈ ওলাইছে। ভাৰতৰ বৈদেশিক পৰিক্ৰমা মন্ত্ৰালয়ে এই খবৰ নিশ্চিত কৰিছে।
ভাৰতীয় বৈদেশিক পৰিক্ৰমা মন্ত্ৰালয়ৰ মুখপাত্ৰ ৰণধীৰ জয়ছৱালে বৃহস্পতিবাৰে এই বৈঠক অনুষ্ঠিত হ’ব বুলি জানিবলৈ দিয়ে। ভাৰতৰ বৈদেশিক সচিব বিক্ৰম মিশ্ৰীয়ে ভাৰ্চুৱেলভাৱে অংশগ্ৰহণ কৰিব এই বৈঠকত।
জয়ছোৱালে কয়, “হৰমুজৰ আলোচনালৈ ব্ৰিটেইনে কেইবাখনো দেশক আমন্ত্ৰণ জনাইছে, ভাৰতকো আমন্ত্ৰণ জনোৱা হৈছে। আমাৰ বৈদেশিক সচিবে আলোচনাত অংশগ্ৰহণ কৰিব।”
জয়ছোৱালে কয় যে ইন্ধনৰ যোগান অক্ষুন্ন ৰাখিবলৈ আৰু হৰমুজৰ মাজেৰে জাহাজ চলাচল স্বাভাৱিক কৰি ৰাখিবলৈ ইৰাণৰ সৈতেও আলোচনা চলি আছে। তেওঁ কয় যে, “আমি ইৰাণৰ সৈতে আলোচনা কৰি আছো যে কেনেকৈ এল পি জি, এল এন জি আৰু অন্যান্য সামগ্ৰী কঢ়িয়াই অনা জাহাজ নিৰাপদে উলিয়াই আনিব পাৰি। এতিয়ালৈকে আমাৰ ছখন জাহাজ নিৰাপদে হৰমুজ প্ৰণালীৰ মাজেৰে পাৰ হ’বলৈ সক্ষম হৈছে। আমি এতিয়াও সংশ্লিষ্ট কৰ্তৃপক্ষৰ সৈতে আলোচনা কৰি আছো।”
বিশ্বৰ মুঠ শক্তিৰ ২০ শতাংশ হৰমুজৰ জৰিয়তে সৰবৰাহ হয়। কিন্তু আমেৰিকা আৰু ইজৰাইলৰ সৈতে হোৱা যুদ্ধৰ বাবে ২৮ ফেব্ৰুৱাৰীৰ পৰা জলপথটো বন্ধ হৈ আছে। ইৰানে সময়ে সময়ে হৰমুজ প্ৰণালীৰ মাজেৰে দুই এখন জাহাজ পাৰ হ’বলৈ অনুমতি দিছে যদিও শক্তি সংকট সমাধানৰ বাবে সেয়া যথেষ্ট নহয়। বহু জাহাজ এতিয়াও তাত আবদ্ধ হৈ আছে। হৰমুজ বন্ধ হ’লে ভাৰতত অধিক সমস্যা হ’ব। কাৰণ ভাৰতৰ ৪০ শতাংশ তেল, ৫০ শতাংশ এল এন জি আৰু ৮০ শতাংশ এল পি জি হৰমুজৰ জৰিয়তে আহে।
যদিও আমেৰিকাৰ ৰাষ্ট্ৰপতি ড’নাল্ড ট্ৰাম্পে যুদ্ধৰ অন্ত পেলাব বুলি ইংগিত দিছে, তথাপিও তেওঁ হৰমুজৰ বিষয়ত মূৰ সোমাবলৈ অনিচ্ছুক। বৰঞ্চ ইৰাণৰ বিৰুদ্ধে যুদ্ধত সহায় নকৰাৰ বাবে ব্ৰিটেইন, ফ্ৰান্সৰ দৰে দেশক সমালোচনা কৰিছে। সেই পৰিস্থিতিত ব্ৰিটেইনে আন দেশৰ সৈতে ‘হৰমুজ সন্মিলন’ৰ আহ্বান জনাইছে। এইবাৰ ভাৰতকো নিমন্ত্ৰণ কৰা হৈছে ।
হৰমুজ সন্দৰ্ভত আলোচনাত মিলিত হোৱা ৩৫খন দেশৰ ভিতৰত আছে ব্ৰিটেইন, ফ্ৰান্স, জাৰ্মানী, ইটালী, কানাডা, জাপান, সংযুক্ত আৰব আমিৰশ্বাহী, অষ্ট্ৰেলিয়া, দক্ষিণ কোৰিয়া, নিউজিলেণ্ড, নাইজেৰিয়া, নেদাৰলেণ্ড, ডেনমাৰ্ক, ছুইডেন, নৰৱে, ইষ্ট’নিয়া, বাহৰেইন। এই আলোচনাত আমেৰিকা নাই।
