আমেৰিকা যুক্তৰাষ্ট্ৰৰ বাণিজ্য সচিব হাৱাৰ্ড লুটনিকে শেহতীয়াকৈ এক চাঞ্চল্যকৰ দাবী কৰিছে। তেওঁৰ মতে, প্ৰধানমন্ত্ৰী নৰেন্দ্ৰ মোদীয়ে আমেৰিকাৰ ৰাষ্ট্ৰপতি ড’নাল্ড ট্ৰাম্পলৈ ফোন নকৰাৰ বাবেই দুয়োখন দেশৰ মাজত হ’বলগীয়া গুৰুত্বপূৰ্ণ বাণিজ্যিক চুক্তিখন চূড়ান্ত নহ’ল। শেহতীয়াকৈ এটা প’ডকাষ্টত ভাগ লৈ লুটনিকে এই তথ্য ৰাজহুৱা কৰিছে। তেওঁ জানিবলৈ দিছে যে চুক্তিখনৰ সকলো চৰ্ত আৰু নীতি-নিয়ম প্ৰস্তুত কৰি থোৱা হৈছিল যদিও কেৱল উচ্চ পৰ্যায়ৰ এটা ফোন কলৰ অভাৱতে সমগ্ৰ প্ৰক্ৰিয়াটো স্তব্ধ হৈ পৰিল।
বাণিজ্য সচিবগৰাকীয়ে প্ৰকাশ কৰা মতে, ৰাষ্ট্ৰপতি ট্ৰাম্পে ভাৰতে ৰাছিয়াৰ পৰা খাৰুৱা তেল ক্ৰয় কৰি থকা কাৰ্যক লৈ একেবাৰেই সুখী নহয়। এই বিষয়টোক লৈ ৱাশ্বিংটনে ইতিমধ্যে নতুন দিল্লীৰ ওপৰত অতি সোনকালে শুল্ক বৃদ্ধি কৰাৰো ইংগিত দিছে। লুটনিকে কয় যে তেওঁ মোডী ডাঙৰীয়াক এই বাণিজ্যিক চুক্তিখনৰ বিষয়ে ট্ৰাম্পৰ সৈতে কথা পাতিবলৈ অনুৰোধ কৰিছিল। কিন্তু ভাৰতীয় পক্ষই হয়তো এই বিষয়ত প্ৰত্যক্ষভাৱে কথা পাতিবলৈ কিছু অস্বস্তি অনুভৱ কৰিছিল আৰু সেইবাবেই প্ৰধানমন্ত্ৰীৰ ফালৰ পৰা কোনো ফোন কল নগ’ল।
এই বাণিজ্যিক চুক্তিখনক লৈ দীৰ্ঘদিন ধৰি দুয়োখন দেশৰ মাজত আলোচনা চলি আছিল। এতিয়ালৈকে মুঠ ছয়টা পৰ্যায়ৰ বৈঠক সম্পন্ন হৈছে। বিশেষকৈ আমেৰিকালৈ যোৱা ভাৰতীয় সামগ্ৰীৰ ওপৰত আৰোপ কৰা ৫০ শতাংশ শুল্কৰ সমস্যাটো সমাধান কৰাই আছিল এই চুক্তিৰ মূল উদ্দেশ্য। কিন্তু ভাৰতে সঠিক সময়ত সঁহাৰি নিদিয়াৰ বাবে আমেৰিকাই অন্য দেশসমূহৰ সৈতে চুক্তিত আৱদ্ধ হোৱাৰ সিদ্ধান্ত লয়।
লুটনিকে এই সন্দৰ্ভত কয় যে আমেৰিকাই ইতিমধ্যে ইণ্ডোনেছিয়া, ফিলিপাইনছ আৰু ভিয়েটনামৰ দৰে দেশসমূহৰ সৈতে বাণিজ্যিক চুক্তি সম্পন্ন কৰিছে। তেওঁলোকে ধৰি লৈছিল যে ভাৰতৰ সৈতে চুক্তিখন এই দেশবোৰৰ আগতেই হ’ব, গতিকে সেই অনুসৰিহে অন্যান্য দেশৰ সৈতে চৰ্তসমূহ আলোচনা কৰা হৈছিল। কিন্তু ভাৰত পিছুৱাই যোৱাৰ ফলত এতিয়া পৰিস্থিতি সলনি হৈছে। যেতিয়া ভাৰতে পাছত যোগাযোগ কৰি জানিব বিচাৰিলে যে তেওঁলোক সাজু, তেতিয়া আমেৰিকাৰ পক্ষৰ পৰা কোৱা হ’ল যে সেই সুযোগ ইতিমধ্যে পাৰ হৈ গৈছে।
বৰ্তমানৰ পৰিস্থিতিত ভাৰত আৰু আমেৰিকাৰ বাণিজ্যিক সম্পৰ্ক এক জটিল সন্ধিক্ষণত উপনীত হৈছে। এফালে আমেৰিকাই শুল্ক বৃদ্ধিৰ ভাবুকি দিছে আৰু আনফালে ৰাছিয়াৰ পৰা তেল ক্ৰয় কৰা বিষয়টোক লৈ অসন্তুষ্টি প্ৰকাশ কৰিছে। এনে অৱস্থাত বাণিজ্যিক চুক্তিখন স্থগিত হৈ থকাটো ভাৰতীয় ৰপ্তানিকাৰীসকলৰ বাবে এক চিন্তাজনক বিষয় হিচাপে দেখা দিছে।
