শুল্কক লৈ আমেৰিকাৰ উচ্চতম ন্যায়ালয়ত বিপৰ্যয়ৰ সন্মুখীন হৈছে ড’নাল্ড ট্ৰাম্প। এনে পৰিস্থিতিত দুয়োখন দেশৰ মাজত বাণিজ্য চুক্তিৰ আলোচনা স্থগিত ৰখা হৈছে। এই সপ্তাহত দুয়োখন দেশৰ প্ৰতিনিধিয়ে তিনিদিনীয়া আলোচনাত মিলিত হোৱাৰ কথা আছিল। অৱশ্যে এতিয়া সেয়া স্থগিত কৰা হৈছে।
উল্লেখযোগ্য যে ভাৰত আৰু আমেৰিকাই অন্তৱৰ্তীকালীন বাণিজ্য চুক্তিৰ বাবে মাৰ্চ মাহৰ সময়সীমা নিৰ্ধাৰণ কৰিছিল। অৱশ্যে সেই সময়সীমাৰ ভিতৰত বাণিজ্য চুক্তি সম্পূৰ্ণ নহ’ব বুলি ধাৰণা কৰা হৈছে।
জানিব পৰা মতে, ২৩ ফেব্ৰুৱাৰীত ভাৰত আৰু ৱাশ্বিংটনৰ প্ৰতিনিধিৰ মাজত আলোচনা হ’ব লাগিছিল। কিন্তু বৰ্তমানৰ পৰিস্থিতিত দুয়োপক্ষই ‘সময় লৈছে’। ইফালে ইউৰোপীয় সংসদেও আমেৰিকাৰ বাণিজ্য চুক্তি চূড়ান্ত কৰাৰ কাম পিছুৱাই দিছে। ইউৰোপীয় সংসদৰ বাণিজ্য মুৰব্বীগৰাকীয়ে কয় যে ট্ৰাম্প প্ৰশাসনে শুল্ক নীতিৰ বিষয়ে স্পষ্ট ধাৰণা নিদিয়ালৈকে সংসদত বাণিজ্য চুক্তি গৃহীত নহ’ব।
ইপিনে, আমেৰিকাৰ বাণিজ্য প্ৰতিনিধি জেমিছন গ্ৰীৰে দাবী কৰিছে যে আমেৰিকাই আশা কৰিছে যে তেওঁলোকৰ অংশীদাৰসকলে এই বাণিজ্য চুক্তিৰ পক্ষত থাকিব।
ইয়াৰ পূৰ্বে ২০ ফেব্ৰুৱাৰীত আমেৰিকাৰ উচ্চতম ন্যায়ালয়ে ৰায় দিছিল যে আমেৰিকাৰ ৰাষ্ট্ৰপতিৰ পাৰস্পৰিক শুল্ক নীতি আচলতে অবৈধ। আদালতে এই নীতিৰ অধীনত এতিয়ালৈকে সংগ্ৰহ কৰা সকলো কৰ ঘূৰাই দিয়াৰ নিৰ্দেশো দিয়ে। উচ্চতম ন্যায়ালয়ৰ ৰায়দানৰ মাত্ৰ ২৪ ঘণ্টাৰ পিছতে আমেৰিকাৰ ৰাষ্ট্ৰপতিয়ে বিশ্বব্যাপী শুল্ক বৃদ্ধিৰ কথা ঘোষণা কৰে।
মন কৰিবলগীয়া যে ইয়াৰ পূৰ্বে ৰাষ্ট্ৰপতি ট্ৰাম্পে আমেৰিকাৰ কংগ্ৰেছক অতিক্ৰমি কেইবাবাৰো বিভিন্ন দেশৰ ওপৰত শুল্ক আৰোপ কৰিছিল। কিন্তু আমেৰিকাৰ উচ্চতম ন্যায়ালয়ে জৰুৰীকালীন ক্ষমতাৰ অধীনত শুল্ক আৰোপ কৰিবলৈ ট্ৰাম্পৰ কাৰ্যক অসাংবিধানিক বুলি ঘোষণা কৰে।
ইয়াৰ পিছত ছ’চিয়েল মিডিয়াত এটা পোষ্টত ট্ৰাম্পে আদালতৰ সিদ্ধান্তক ‘হাস্যকৰ, দুৰ্বল লিখা আৰু আমেৰিকা বিৰোধী’ বুলি অভিহিত কৰে। তেওঁৰ শুল্ক নীতিৰ বিৰুদ্ধে ৰায় দিয়া ন্যায়াধীশসকলকো ট্ৰাম্পে তীব্ৰ সমালোচনা কৰে। একে সময়তে তেওঁৰ শুল্ক নীতিৰ সপক্ষে ভোট দিয়া তিনিজন ন্যায়াধীশক (ব্ৰেট কাভানা, ক্লেৰেন্স থমাছ আৰু চেমুৱেল আলিটো) প্ৰশংসা কৰে।
প্ৰসংগক্ৰমে ট্ৰাম্পে ১৯৭৭ চনৰ আন্তঃৰাষ্ট্ৰীয় জৰুৰীকালীন অৰ্থনৈতিক ক্ষমতা আইন (আইইইপিএ)ৰ অধীনত বিভিন্ন দেশৰ ওপৰত পাৰস্পৰিক শুল্ক আৰোপ কৰিছিল। কিন্তু উচ্চতম ন্যায়ালয়ে ৰায় দিয়ে যে ৰাষ্ট্ৰপতিয়ে এই আইনৰ অধীনত একপক্ষীয়ভাৱে শুল্ক আৰোপ কৰিব নোৱাৰে।
এই সিদ্ধান্তৰ অৰ্থ হ’ল ভাৰতকে ধৰি বহু দেশৰ ওপৰত আৰোপ কৰা অতিৰিক্ত শুল্ক পূৰ্বৰ স্তৰ প্ৰায় ৩.৫ শতাংশলৈ ঘূৰাই আনিব লাগিব। কিন্তু ২০ ফেব্ৰুৱাৰীৰ নিশা ট্ৰাম্পে কংগ্ৰেছক অতিক্ৰম কৰি ১০ শতাংশ শুল্ক আৰোপ কৰিবলৈ কাৰ্যবাহী আদেশত স্বাক্ষৰ কৰে। আকৌ এদিন নৌহওঁতেই তেওঁ শুল্কৰ হাৰ ১৫ শতাংশলৈ বৃদ্ধি কৰিলে।
