দেওবাৰে নৰ্দাৰ্ণ আয়াৰলেণ্ডৰ বেলফাষ্টস্থিত চিভিল চাৰ্ভিচ ক্ৰিকেট ক্লাৱত ঘৰুৱা দল আয়াৰলেণ্ডৰ বিৰুদ্ধে দুখনীয়া শৃংখলাৰ দ্বিতীয় তথা অন্তিমখন টি-২০ মেচত অৱতীৰ্ণ হ‘ব ভাৰতীয় ক্ৰিকেট দল। প্ৰথমখন মেচত অপ্ৰত্যাশিত পৰাজয়ৰ সন্মুখীন হোৱাৰ পাছত বৰ্তমানৰ টি-২০ বিশ্বকাপ চেম্পিয়ন ভাৰতে শৃংখলা সমতা স্থাপনৰ লক্ষ্যৰে খেলপথাৰত নামিব। ভাৰতীয় সময় অনুসৰি সন্ধিয়া ৬ বজাত মেচখন আৰম্ভ হ‘ব আৰু ইয়াৰ আধা ঘণ্টা পূৰ্বে টছ অনুষ্ঠিত হ‘ব।
যোৱা শুকুৰবাৰে অনুষ্ঠিত শৃংখলাৰ প্ৰথমখন মেচত ভাৰতীয় দলটো আটাইকেইটা ফৰ্মতে ব্যৰ্থ হোৱা পৰিলক্ষিত হৈছিল। উক্ত মেচখনত আয়াৰলেণ্ড দলে মাত্ৰ ৩৬ ৰানত ৩টাকৈ উইকেট হেৰুৱাৰ পাছতো সুন্দৰ প্ৰত্যাৱৰ্তন কৰি নিৰ্ধাৰিত অভাৰত ৯ উইকেটৰ বিনিময়ত ১৮২ ৰান সংগ্ৰহ কৰিবলৈ সক্ষম হয়। ইয়াৰ প্ৰত্যুত্তৰত ভাৰতীয় দলটোৱে মাত্ৰ ১৪৮ ৰানতেই আটাইকেইটা উইকেট হেৰুৱায়। এই ঐতিহাসিক বিজয়েৰে আয়াৰলেণ্ডে টি-২০ ক্ৰিকেটত ভাৰতৰ বিৰুদ্ধে প্ৰথমটো জয় সাব্যস্ত কৰাৰ লগতে শৃংখলাটোত ১-০ ব্যৱধানত অগ্ৰগতি লাভ কৰিছে। দেওবাৰৰ মেচখনত জয়লাভ কৰিব পাৰিলে আয়াৰলেণ্ডে তেওঁলোকৰ ক্ৰিকেট ইতিহাসৰ অন্যতম বৃহৎ দ্বিপাক্ষিক টি-২০ শৃংখলা দখল কৰিবলৈ সক্ষম হ‘ব।
আনহাতে, ভাৰতীয় দলৰ বাবে এই মেচখন কেৱল শৃংখলা সমতা স্থাপনতেই সীমাবদ্ধ নহয়। প্ৰথমখন মেচত দলটোৰ পৰিকল্পনা আৰু কাৰ্যকৰীকৰণৰ যি দুৰ্বলতা প্ৰকাশ পাইছিল, তাক শুধৰণি কৰাৰ বাবে এয়া এক গুৰুত্বপূৰ্ণ সুযোগ। দ্বিতীয়খন মেচৰ বাবে ভাৰতীয় দলৰ প্ৰথম একাদশক লৈয়ো বিশেষ চৰ্চা চলিছে, বিশেষকৈ প্ৰথমখন মেচত অংশগ্ৰহণৰ সুযোগ নোপোৱা ১৫ বছৰীয়া উদীয়মান খেলুৱৈ বৈভৱ সূৰ্যবংশীয়ে এই মেচখনত সুযোগ পাব নে নাই, সেয়া ক্ৰীড়াপ্ৰেমীসকলৰ বাবে বিশেষ আকৰ্ষণৰ কেন্দ্ৰবিন্দু হৈ পৰিছে।
ক্ৰীড়াপ্ৰেমীসকলে এই গুৰুত্বপূৰ্ণ মেচখন ছনী স্প‘ৰ্টছ নেটৱৰ্কৰ বিভিন্ন টিভি চেনেলযোগে পোনপটীয়াকৈ উপভোগ কৰিব পাৰিব। ইয়াৰ উপৰি ডিজিটেল মাধ্যমৰ দৰ্শকসকলৰ বাবে ছনী লিভ এপ আৰু ৱেবছাইটৰ জৰিয়তেও মেচখনৰ লাইভ ষ্ট্ৰীমিং উপলব্ধ হ‘ব বুলি সম্প্ৰচাৰক প্ৰতিষ্ঠানৰ তৰফৰ পৰা জনোৱা হৈছে।
