ইটালীত পথ দুৰ্ঘটনাত এক ভাৰতীয় দম্পতীৰ মৃত্যু ঘটিছে। মহাৰাষ্ট্ৰৰ নাগপুৰৰ হোটেল মালিক জাভেদ আখতাৰ (৫৫) আৰু তেওঁৰ পত্নী নাদিৰা গুলশান (৪৭)ৰ মৃত্যু হৈছে। তেওঁলোকৰ ২১ বছৰীয়া কন্যা অৰ্জু আখতাৰ সংকটজনক অৱস্থাত সেই দেশতে চিকিৎসাধীন হৈ আছে।
ইটালীত থকা ভাৰতীয় দূতাবাসে তেওঁলোকৰ মৃত্যুৰ খবৰ নিশ্চিত কৰিছে। একে সময়তে মৃতকৰ পৰিয়ালৰ সৈতেও তেওঁলোকৰ যোগাযোগ থকা বুলি অৱগত কৰা হৈছে।
জাভেদ নাগপুৰৰ এজন সুপৰিচিত হোটেল মালিক আৰু উদ্যোগী আছিল। সীতাবল্ডি ফ্লাইঅভাৰৰ ওচৰত তেওঁৰ বিশাল হোটেল গুলশান প্লাজা। জাভেদ আৰু নাদিৰাৰ তিনিটা সন্তান। দুগৰাকী কন্যা অৰ্জু আৰু শ্বিফা আৰু পুত্ৰ জাজিল আখতাৰ। শেহতীয়াকৈ তেওঁ পত্নী আৰু সন্তানৰ সৈতে ইটালী ভ্ৰমণলৈ গৈছিল। বৃহস্পতিবাৰে গ্ৰ’ছেটোৰ ওচৰৰ অ’ৰেলিয়া ঘাইপথত সংঘটিত হয় এই ভয়ংকৰ দুৰ্ঘটনা।
সূত্ৰ অনুসৰি, পৰিয়ালটোৱে ২২ ছেপ্টেম্বৰৰ পৰা ফ্ৰান্সৰ পৰা ভ্ৰমণ আৰম্ভ কৰিছিল। তাৰ পিছত তাৰ পৰাই ইটালী পায়হি। ঘটনাৰ দিনা তেওঁলোকে ইটালীৰ বিভিন্ন স্থান ভ্ৰমণ কৰাৰ পৰিকল্পনা কৰিছিল। ভাড়াত লৈছিল এখন ৯ আসনযুক্ত গাড়ী। অৰেলিয়া ঘাইপথত এখন ভ্যানত খুন্দা মাৰে তেওঁলোকৰ গাড়ীখনে। দম্পতীহাল আৰু গাড়ীখনৰ চালকৰ থিতাতে মৃত্যু হয়।
তিনিটা ল’ৰা-ছোৱালীৰ ভিতৰত অৰ্জুৱে মূৰত গুৰুতৰভাৱে আঘাত পোৱাৰ বাবে ছিয়েনাৰ লি স্কট হাস্পতালত ভৰ্তি কৰোৱা হয়। তেওঁৰ অৱস্থা এতিয়াও সংকটজনক। আনহাতে, শ্বিফা আৰু জেজেলক ফ্ল’ৰেন্স আৰু গ্ৰ’চেটোৰ চিকিৎসালয়ত ভৰ্তি কৰা হৈছে।
সূত্ৰৰ পৰা জানিব পৰা মতে, দুৰ্ঘটনা সংঘটিত হোৱাৰ পিছত জেজেলে স্থানীয় হেল্পলাইন নম্বৰতো যোগাযোগ কৰে। স্থানীয় নিউজ পৰ্টেল Italien.News ৰ মতে, সেই সহায় লাভ কৰিবলৈ বহু দেৰি হৈছিল। পিছত অগ্নিনিৰ্বাপক বাহিনীৰ দুটা দলে ছিন্নভিন্ন গাড়ীৰ পৰা আহতসকলক উদ্ধাৰ কৰে।
ইটালীত থকা ভাৰতীয় দূতাবাসে এই দুৰ্ঘটনাক লৈ শোক প্ৰকাশ কৰি নিজৰ এক্স হেণ্ডেলত লিখিছে, “গ্ৰ’ছেটোৰ সমীপত সংঘটিত দুৰ্ঘটনাত নাগপুৰৰ দুজন ভাৰতীয় নাগৰিকৰ মৃত্যুত দূতাবাসে গভীৰভাৱে শোক প্ৰকাশ কৰিছে। আহতসকলৰ আশু আৰোগ্য কামনা কৰে। দূতাবাসে নিহতসকলৰ পৰিয়ালৰ সৈতে সংস্পৰ্শত আছে। আমি পৰিয়ালক সম্ভৱপৰ সকলো সহায় আগবঢ়াইছো।”
