বাংলাদেশত নিযুক্ত ভাৰতীয় উচ্চায়ুক্ত প্ৰণয় বাৰ্মাই শনিবাৰে অৰ্থাৎ ১০ জানুৱাৰী, ২০২৬ তাৰিখে বাংলাদেশ জাতীয়তাবাদী দলৰ (বিএনপি) নৱ-নিৰ্বাচিত অধ্যক্ষ তাৰিক ৰহমানক সাক্ষাৎ কৰে। ১২ ফেব্ৰুৱাৰীত অনুষ্ঠিত হ’বলগীয়া সাধাৰণ নিৰ্বাচনৰ মাত্ৰ এমাহ পূৰ্বে এই বৈঠক অনুষ্ঠিত হৈছে। উল্লেখযোগ্য যে, শুকুৰবাৰে দলটোৱে আনুষ্ঠানিকভাৱে ৰহমানক অধ্যক্ষ হিচাপে নিৰ্বাচিত কৰাৰ ঠিক এদিন পিছতে এই সৌজন্যমূলক সাক্ষাৎকাৰ অনুষ্ঠিত হয়। বিএনপিৰ মিডিয়া চেলৰ মুখপাত্ৰ ছাইৰুল কবীৰ খানে জানিবলৈ দিয়া মতে, প্ৰায় ৪০ মিনিট ধৰি চলা এই বৈঠকত দুয়োপক্ষৰ মাজত বিভিন্ন গুৰুত্বপূৰ্ণ বিষয়ত কথা-বতৰা হয়।
বাংলাদেশৰ চলিত ৰাজনৈতিক পৰিস্থিতিত এতিয়া বিএনপি এক মুখ্য শক্তি হিচাপে আত্মপ্ৰকাশ কৰিছে। ১২ ফেব্ৰুৱাৰীৰ নিৰ্বাচনত পদচ্যুত প্ৰধানমন্ত্ৰী শ্বেখ হাছিনাৰ নেতৃত্বাধীন আৱামি লীগৰ অনুপস্থিতিত এতিয়া বিএনপি আৰু ইয়াৰ এসময়ৰ মিত্ৰ দল জামাত-ই-ইছলামীৰ মাজতে মূল প্ৰতিদ্বন্দ্বিতা হোৱাৰ সম্ভাৱনা আছে। ২০২৪ চনৰ ৫ আগষ্টত ছাত্ৰ-জনতাৰ এক তীব্ৰ আন্দোলনৰ ফলত আৱামি লীগ চৰকাৰৰ পতন ঘটিছিল। ইয়াৰ পিছতে মহম্মদ ইউনুছৰ নেতৃত্বত গঠিত অন্তৱৰ্তীকালীন চৰকাৰে এক কাৰ্যবাহী নিৰ্দেশৰ জৰিয়তে আৱামি লীগক ভংগ কৰি দলটোক নিৰ্বাচনত অংশগ্ৰহণ কৰাত বাধা প্ৰদান কৰে।
তাৰিক ৰহমানে ২০১৮ চনৰ পৰাই বিএনপিৰ ভাৰপ্ৰাপ্ত অধ্যক্ষ হিচাপে দায়িত্ব পালন কৰি আহিছিল। তেওঁৰ মাতৃ তথা প্ৰাক্তন প্ৰধানমন্ত্ৰী খালেদা জিয়াৰ দীৰ্ঘদিনীয়া অসুস্থতাৰ পাছত মৃত্যু হোৱাৰ ১০ দিনৰ পিছত দলৰ নীতি নিৰ্ধাৰক স্থায়ী সমিতিয়ে তেওঁক আনুষ্ঠানিকভাৱে দলৰ মুৰব্বী হিচাপে নিৰ্বাচিত কৰে। মন কৰিবলগীয়া যে, ভাৰতীয় উচ্চায়ুক্তৰ পূৰ্বে শুকুৰবাৰে বাংলাদেশত থকা পাকিস্তানৰ উচ্চায়ুক্ত ইমৰাণ হাইদৰেও ৰহমানক সাক্ষাৎ কৰিছিল। প্ৰায় ১৭ বছৰ ধৰি লণ্ডনত নিৰ্বাসিত জীৱন কটোৱাৰ পিছত যোৱা ২০২৫ চনৰ ২৫ ডিচেম্বৰত ৰহমান নিজ দেশলৈ উভতি আহিছিল আৰু এতিয়া তেওঁৰ নেতৃত্বতে দলটোৱে আগন্তুক নিৰ্বাচনত অৱতীৰ্ণ হ’বলৈ সাজু হৈছে।
